ŞIRNEX- Qezaya Cizîrî ya Şirnexî de varayîşê varano zêde vera heme rayîrî binê awe de mendî. Bi desan keyeyan de zî xesaro madî virazîya û 2 hemwelatîyî wesayîtan de cuya xo vindî kerdî

 

Qezaya Cizîrî ya Şirnexî de saetanê şewe de varayîşê varano zêde vera cuye vindete. Varayişê varano zêde yê bi saetan vera cereyan birîya. Hema hema pêroyê rayîrê ke hetê qayûmî ra ameybî newekerdene û timî propagandaya înan kerdêne binê awe de mendî. Berzbîyayîşê awe vera xeylê wesayîtî binê awe de mendî û hemwelatîyî nêeşkayî şêrî keye.

 

Bi desan keyeyî binê awe de mendî

 

Taybetî taxanê Konak, Nûr, Şah û Cûdî yê Cizîrî de bi desan keye binê awe de mendî. Borîyê kanalîzasyonan teqayî û keyeyê ke qala înan yeno kerdene de xesaro madî virazîya. Taxa Konak de wesayîtî bi awe de şîyî û hemwelatijî bi îmkananê xo xo xelisnayî.

 

2 kesî cuya xo vindî kerdî

 

Ame vatene ke wesayîtê meleyo ke nameyê ci nêame zanayene û wextêko kilmo ke tayînê ci ameyo Cizîrî zî awe de heta Çemê Dîcle şî û wesayît de cinî, dayîk û domanê mele zî estbî. Ame zanayene ke mele û domanê xo awe ra xelisîyasî, la dayîk û cinîya ci cuya xo vindî kerdî.

 

Parlementerê HDPyî Huseyîn Kaçmazî serê hesabê xo yê medyaya komelkî de xebera hedîse pare kerd. Sewbîna xeylê cayanê cîya-cîyayan yê qeza de qezayê trafîkî zî virazîyayî. Yeno pawitene ke xisarê varayîşê varano zêde rojanê verênan de bêro eşkerakerdene.