STENBOL - Dayîkê/Merdimê Şemeyî hewteyê 1032ine ê çalakîya xo de aqûbetê birayanê Ayhan Efeoglû û Alî Efeoglû persayî û waştî ke kiştoxê înan bêrê cezakerdiş.  

 

Dayîkê/Merdimê Şemeyî ke her hewte Meydanê Galatasarayî de yenê têhet û aqûbetê merdimanê xo yê ke destbendkerde bîyî û ameyî qetilkerdiş persayî û semedo ke kiştoxê înan bêrê muhakemekerdiş çalakîya xo ya hewteyê 1032ine pê ardî. Dayîkê Şemeyî ke bi qerenfîlanê destê xo de û fotografê vînîbîyayeyan Meydanê Galatasarayî de ameyî têhet,  çalakîya nê hewteyî de aqûbetê Ayhan Efeoglû û Alî Efeoglû yê birayê yewbînan bî, persayî. Xeylêk merdimê vînîbîyayeyan û aktîvîstê heqê merdiman beşdarê eşkerayîya çapemenîye ke ameye dayîş, bîyî. Çalakî de metnê çapemenîye hetê Sekretera Şubeyê ÎHDyî ya Stenbolî Oya Ersoy ra ame wendiş.

 

2 birayê yewbînan ê vînîbîyayeyî

 

Oya Ersoy, ard ziwan ke Ayhan Efeoglû 6ê teşrîna verêne 1992ine de verê Unîversîteya Yildiz Teknîkî ke wendekar bî, hetê polîsê ke cil û belgê sivîlî înan ra bî ame destbendkerdiş û badê ke berdîya Şubeyê Têkoşînê Terorî yê Stebolî, reyke bîn xebere ci ra nêameye girewtiş. Oya Ersoy dîyar kerd ke 2 serrî badê Ayhan Efeoglû destbendkerdiş de ame vînîkerdiş, birayê ey Alî Efeoglû zî 5ê Çeleyê 1994ine de derûdorê Pendîkê Stenbolî de ame destbendkerdiş. Oya Ersoy vat: "Keyeyo ke nêeşka Ayhanî bivîno, na rey semedê aqûbetê Alî muracatê Serdozgerîya Komare ya Stenbolî kerd. La derheqê vînîkerdişê Ayhan û Alî Efeoglû de cipersayîşêk bi tesîr nêame kerdiş. Cipersayîş bi sebebê dem derbaz bîyo, ame peynîkerdiş.”