Elfazî Toral

 

STENBOL - Merdimê tepişteyan ra Fînce Akman bale ant binpaykerdişê heqan yê zîndanan û dîyar kerd ke zîndanan de wareyê cuya tepişteyan teng bîyo û şertî her ke şinê giran benê.

 

Binpaykerdişê heqan ê zîndanan her ke şinê giran benê û tepişteyî bi binpaykerdişê heqan ê cidî dir yenê rî bi rî. Binpaykerdişê heqan ke her roje zêde benê, açaryayê îşkence.

 

Merdima tepişteyan ra Fînce Akman JINNEWSî rê qisey kerd û da zanayîş ke wareyê cuye yê tepişteyan her ke şino teng beno û şert û mercî giran benê.

 

Fînce Akman da zanayîş ke heqê tewr sereyîn û hewcedarîyê tepişteyan yeno binpaykerdiş û wina vat: “Mi di aşmî verê mont û pûncî lajê xo Yakup Akmanî rê şirawit. La hema nêdayê lajê mi. Tepişteyê sîyasî pêwa nêweş ê zî semedê înan tedbîrî nînê girewtiş. Lajê mi û tepişteyê bînî binpaykerdişan dir yenê rî bi rî. Waştişê înan bica nînê. Înan awa pake ra zî bêpar verdenê. Cil û belgê kalinan nêdanê tutanê ma. Çi wazenê nêdanê. Cezayan pey yewbînan danê tepişteyan. Qedexeyê telefonî yê pêvînayîşî û cezaya hucreyê yew kesî danê.” 

 

‘Wazenê waştişê tutanê ma bica bêrê’

 

Fînce Akman dîyar kerd ke hemverê şarê kurdî hêrişêk babeta vatişî ya û wina vat: “Rojnamegerê kurdî yenê qetilkerdiş, yenê tepiştiş. Sebebê nê zî o yo ke rojnamegerî raştî vejenê werte. Tirkîya semedê şermê xo binimno, her wareyî de hêrişê kurdan kena. Tutanê ma tepişnenê û erzenê zîndanan. Madem wina berpirsyarîyê xo bîyarê ca. Ganî waştişanê ma bica bîyarê.”

 

'Şima nêeşkenê ma bixapênê'

 

Fînce Akman dîyar kerd ke do heta peynî tutanê xo bipawê û vat: “Ma heq, huqûq û edalet wazenê. Ma kurd ê. Şima çira rojnamegeran qetil kenê. Tu ferqê înan DAIŞî ra çin o. Şima nêeşkenê ma bixapênê. Ma do heta peynî semedê tutanê xo têkoşîn bikerê. Ma fek israrê xo yê heq, huqûq û edaletî ra vera nêdanê.”