Zelal Tunç

 

WAN - Hemşaredara verêne ya Erdîşî Yildiz Çetîna HDPyî ke qeyûm tayînê herinda aye ame kerdiş û nika bi namzeta hemşaredarîye ya DEM Partî Guler Temele reyde xebetîyena, dîyar kerd ke do bajar bi rengê cinîye bixemilnê. Gulere zî da zanayîş ke dimayê weçînayîşî do heme destkewtişê cinîyan, dezgehê ke ameyî girewtiş destê qeyûman ra bigîrê. 

 

Weçînayîşê herêmî ke 31ê Adare de pê bêro rê demêk kilm mend û Partîya Têduştîye û Demokrasîyî yê Şaran (DEM Partî) xebatê xo bêmaben rayîr ra bena. Wan û qezayanê ci de weçînayîşê verênan de DEM Partî bû partîya yewine û seba weçînayîşê 31ê Adare de heme qezayê ci wayîrê îdîayê. Erdîş de buroyê weçînayîşî yê cinîyan ame akerdiş û xebate bê maben dewam kena. 

 

Temmuza 1930î de goreyê dayeyê fermî Gelîyê Zîlane de 15 hezar kurdî ameyî qetilkerdiş û qirkerdişê Gelîyê Zîlane vîran de cayê xo girewt. Sewbîna xozaya ci her tim hedef ame girewtiş û xozaya ci bi HESî binê lepê qirkerdişî de ya. Heto bîn de projeye asîmîlekerdişê nasnameyê kurdî Zanên Pamîr ê Afganîstanî serra 1982yî de Tirkê Kirgizî ameyî taxa Ulupamîrî ya Erdîşî de bi ca bîyî. Vera heme xîretkerdişan polîtîkayê dewlete veng ameyî vetiş. AKP îqtîdarîyê 22 serran de polîtîkayan ra netîce nêgirewt. Vera polîtîkayê înkar û îmhayî de DEM Partî Kurdistan de partîya yewine ya.

 

Şar rayê xo hetê DEM Partîye de şixulneno. Weçînayîşê 30ê Adara 2014î de vera heme teda û kayan BDP bî partîya yewine û reyna serra 2019î de HDP ser kewt. Serra 2014î de namzeta hemşaredarîye ya BDPyî Dîba Keskîne se ra 49,4ê rayan girewt. Yew serrî û nîme wezîfeyê xo rayîr ra berd û nê demî mîyan de nizdîyê Mewzîya TOKÎ ya Corî de serê 10 donim erdî de rez ramit û dewrê cinîyan kerd. Nameyê projeyî zî kerd ‘rezê aştîye’. La 2016î de qeyûm tayînê şaredarîye ame kerdiş û heme proje vist binê konrolê xo. Dîba zî ameye tepiştiş. 

 

Hemşaredara verên û namzete kişta yewbînan de xebetîyenê 

 

Hemşaredara ke 2019î de ameye weçînayîş Yildiz Çetîne, senî ke ameye weçînayîş xeylê projeyan vist cuye. La dimayê demêke kilm ameye tepiştiş. Dima ra zî tehlîye bî. Yildize nika weçînayîşê 31ê Adare ra ver bi namzete Guler Temele reyde mil bi mil xebetîyena. 

 

Yildiz Çetîna ke qeyûm tayînê herinda aye ame kerdiş wina vat: “2019î de ez sey hemşaredara Erdîşî ya HDPyî ameya weçînayîş. Nêverdayî ma xebatê weçînayîşî rayîr ra berê. Şarê Erdîşî îradeyê xo rona raşte. Serê îtîrazê AKPyî weçînayîş newe ra ame kerdiş. Sindoqî newe ra ameyî hûmartiş. Rayê ma kêm nêbî, ekse ci zêde vejîya.” 

 

5 aşman de xizmetê 5 serran 

 

Yildize qala xizmet û projeyê xo kerd û wina dewam kerd: “Şaredarî nizdîyê qerekolî ameye viraştiş. Ameyîş û şîyayîşê şarî ameyêne astengkerdiş. Ma 5 aşman xebetîyayî. Ma 5 aşman xebatê 5 serrî rayîr ra berd. Şaredarî mîyanê deynê awe de bî. Seba şarî tu xizmet nêame kerdiş. La vera nê ma 5 aşman de xizmet pîl kerd.”

 

 ‘Ma reng û vengê xo bidê eşnawitiş’ 

 

Yildiza ke nika bî namzeta DEM Partî Guler Temele reyde xebatan mil bi mil rayîr ra bena wina veng kerd: “Ma sey cinî reng û vengê xo bidê eşnawitiş.” 

 

Namzeta hemşaredarîye ya DEM Partî ya Erdîşî Guler Temela ke verweçînayîş de ameye weçînayîş wina vat: “Qeyûmê ke tu xizmet nêkerd, şaredarî kerdî binê deyn û açarnayî xirbe. Ma do projeyê wirdî hemşaredarê xo yê cinî bikerê cuye û projeyê ke nîmcet mendî bifînî cuye û serê nê çîyî de ma xebatê xo rayîr ra berê.”

 

 ‘Ma do nê bajarî bi rengê cinîye bixemilnê’ 

 

Gulere dîyar kerd ke dimayê weçînayîşê 31ê Adare do heme destkewtişê cinîyan, dezgehê ke ameyî girewtiş deste qeyûman ra bigîrê û wina dewam kerd: “Dimayê 31ê Adare ma do bajarê xo bi renge cinîyan bixemilnê. Na game ma ya yewine ya. Ma do mudirîyetê polîtîkayê cinîyan newe ra akerê. Ma do seba cinîyan meymanxaneyan akerê. çike qeyûm nê cayan girewtbî. Rayîrê peravî de merkezê cinîyane est bî. Ma do newe ra akerê. Cinî do tîya de spor bikerê û kitab biwanê. Do tîya de kreşî bibê û tutî zî tîya de wextê xo derbaz bikerê. Ma do bi raybazê temsîlkarîya têduştîye her raşteyê şaredarîye cinîyan rê akerê. Ma do heme bîrîman, heme raşteyan cinîyan rê akerê.” 

 

‘Mil bi mil ma do wayîrê îradeyê cinîyan bivejê’ 

 

Gulere wina qiseykerdişê xo qedêna: “Derheqê cinîyan de xeylê projeyê ma est ê. Nê çîyê ke mi vat tena qismêk o. Ma do bajarê xo bi wayê xo reyde, bi dayîk û cinîyan reyde rayîr ra berê. Ma nîmeyê komelî yê. Vatişê ma kare ma yo ke ma bikerê yo. Ma do bi paştîdayîş nê çîyan yew bi yew bîyarê ca. Mil bi mil ma do wayîrê îradeyê cinîyan bivejê. Ma na nuqata de paştîdayîş wazenê.”