Elfazî Toral

 

STENBOL - Endama SESî, teknîkera patolojîye Halîme Altane da zanayîş ke cinî nêeşkenê xo biresnê xizmetê weşîye yê şertê başan û vat: “Vera heme cînsîyetperestî û nêtêduştîye yê raşteyê cuye û weşîye de vatişê ma est ê. Ma eşkenê 8ê Adare de îqtîdarî zî û sîsîtemî zî bibedilnê.” 

 

Cinî vera heme polîtîkayê dişmenîya cinîyan, camêrd û dewlete de têkoşînê xo bi qerardarî pîl kenê. Cinî vera binpaykerdişê kede, şîdetê camêrd-dewlete, qirkerdişê ekolojiye de vengê xo berz kenê. Ver bi 8ê Adare Roja Cinîyanê Dinya de cinî bajar, raşte, kuçe û taxan de xebatan rayîr ra benê û metodê têkoşînê rêxistinkerde yê vera şîdetî munaqaşa kenê. 

 

Endama Sendîkaya Kedkarê Xizmetê Weşî û Komelî (SES) teknîkera patolojîye Halîme Altane derheqê 8ê Adare de qisey kerd. 

 

Cuyêka bê weşîye bi cinîyan yena ferzkerdiş 

 

Halîme da zanayîş ke kedkarê weşîye xeylê probleman reyde yenê rî bi rî û seba ke raşteyê weşî de cinî bêra dîyîş xîret kenê. Halîme wina dewam kerd: “Ganî her raşte û her babete de cinî qeraran bigêra. Tena raşteyê weşîye de nê heme raşteyanê cuye de cinî nesne ya. Ma seba nê çîyî xîret kenê. Vera cînsîyetperestî û nêtêduştî raşteyê weşîye de komel û cemawerîye de vatişê ma est o. Sîstemê weşîye ya ke kapîtalîzm ferz keno ganî bêro wedaritiş. Cinî binê şertê xirabî de ciwîyenê.” 

 

‘Sîstemê ekolojîst dayî sîstemê kapîtalîst’ 

 

Halîmeye ard ziwan ke wextê neololîtîkî ra heta nika derheqê cinîyan de xeylê çîyî ameyî bedilnayîş û wina dewam kerd: “Têkilîya cinîyan a bi şifaye reyde û zanayîşê weşîye destê înan ra ameyî girewtiş. Wexto ke sîstemê ekolojîst derbazê sîstemê kapîtalîst bî cinî ked û weşî rê ameyî xerîbkerdiş. Roja ke sîstemê ekolojîst dewrê sîstemê kapîtalîst ame kerdiş gerdun xira bîyo. Cinîyan kerdî hetkarê camêrdî. Kewtî binê serdestîya camêrdî.” 

 

Hûmara kedkarê cinîye ya camêrdan ra zêde ya 

 

Halîme dîyar kerd ke ewro hûmara kedkarê cinîye ya raşteyê weşîye ya camêrdan ra zêde ya û wina vat: “Karê keye, karê pakîye, karê ke kede wazenê her tim cinî gênê serê xo. Ma vera nê de yê. Hêzê ma cinîyan est o ke ma vatişê xo bivajê. Bi serran o ez nêweşxane de xebetîyena. Proseso ke ez xebetîyaya de xeylê çîyî bedilîyayî. Ma xeylê çîyan dî. Qezencê ma vînîbîyayîşê ma virazîyayî. Heqdesto ke heqê ma bî, ma qet nêgirewt. Di tutê mi virazîyayî. Destûrê welidnayîşî kêm bî. Hîjyeno ferz nêame kerdiş. Wexto ke ez vejîyaya destûrê bêpere hetê ekonomîye de xeylê mi zehmetî ant. Saetê xebate xeylê merdiman rincan keno.” 

 

Seba 8ê Adare vengdayîş

 

Halîme qiseykerdişê xo yê peyênan de venga cinîyan kerd û vat: “Hêzê ma est o ke ma sîstem bibedilnê. Yê tewr bi cesaret cinî yê. Eke cinî xo ra bawer bikera do her çîyî çareser bikera. Ma eşkenê 8ê Adare de bibedilnê. Ma eşkenê sîstem û îqtîdarî zî bibedilnê. Ganî heme cinîyê kedkar têkoşînê xo dewam bikerê. Ganî raşteyan û sendîkayan de bi hawayêkê yewbîyaye têkoşîn bêro dayîş. Ez venga pîlkerdişê têkoşînî kena.”