STENBOL - Goreyê dayeyê ÎSÎGî aşma sibate de tewr tay 144 karkeran dinyaya xo bedelnaye û nînan ra 6 ci tutê karker ê û tewr zêde raşteyê înşaetî de mergî virazîyayî. 

 

Meclisê Weşîye û Asayîşê Karî (ÎSÎG) raporê xo yê cînayetê karî yê aşma sibate eşkera kerd. ÎSÎGî bale ant serê felaketê madenî yê qezaya Licikî ya Erzînganî û vat ke pêwa 22 rojî ser ra derbaz bîyo zî hema 9 karkerî nêameyê vînayîş. 

 

Rapor de sewbîna muşahadeyê Maden-Îş Sendîkayî yê derheqê felaketê madenî de hîrayî ame dayîş. Sewbîna rapor de ÎSÎGî bale ant serê Kafkametlerî yê 19ê teşrîna peyêne de Behrê Sîya noqê awe bîyo û keştiya barî ya Batuhan Ayî 15ê sibatêe de Marmara de noqê awe bî û vat ke mergê karkeran sey “cînayeta karî” nêameyo hesibnayîş. 

 

ÎSÎGî da zanayîş ke aşma sibate de tewr tay 144 karkeran û her roje “tewr tay” 5 karkeran cînayetê karî de dinyaya xo bedelnayê. Sewbîna ame dîyarkerdiş ke mîyanê beşê karî de bi 39 karkeran tewr zêde karkeran beşê înşaetî de dinyaya xo bedelnayê.  ÎSÎGî dîyar kerd ke aşma çeleyî de 6 û di aşmê sibate de zî tewr tay 7 karkerê tutî cînayetê karî de dinyaya xo bedelnayî.