Rabîa Onver

 

COLEMÊRG - Namzeta hemşaredarîye ya DEM Partî ya Colemêrgî Viyan Tekçe da zanayîş ke do dezgehê ke ameyî girewtiş newe ra akerê û vat: “Wa AKP baş bizano ke şar vera nê polîtîkayê leşine de sere çewt nêkeno. Çend ke xoverdayîş bibo serkewtiş zî nizdî beno.” 

 

Weçînayîşê herêmî yê 31ê Adare rê demêk kilm mend, partîyê sîyasî xebatê xo zêde kerdî. Yew bajarê ke xebat tede bêmaben dewam kena Colemêrg o. Di demê ke Colemêrg de bi qeyûman îradeyê şarî yeno xespkerdiş, weçînayîş rê demêk kilm mend. Rayîrberê DEM Partî, namzetê hemşaredarîye yê DEM Partî kuçe bi kuçe, raşte bi raşte û dew bi dewe gêrenê. Namzetê hemşaredarîye Viyan Tekçe û Mehmet Siddik Akiş xebatê xo dewam kenê.

 

 Namzeta hemşaredarîya Colemêrgî Viyan Tekçe JINNEWSî rê qisey kerd û qala projeyanê xo kerd. 

 

‘Paştîdayîşê şarî moral dano mi’ 

 

Viyane da zanayîş ke DEM Partî esasê paradîgmaya azadiwaştoxe ya cinîye de her raşteyê cuye de wayîrê temsîlkarîya têduştîye yo û wina vat: “Coka ra şar wayîrê ci vejîyeno û no wayîrvejîyayîş beno moral. Cagirewtişê cinîyan ê temsîlkarîya têduştîye de hem seba înan û hem zî seba ma do paştîdayîşêk pîl awan bikerê. Ez sey ciwanêk û dadîyêke şarî ra reaksîyonê weş gêna. Wexto ke mi vînenê vanê ma to ra hêz gênê. No mi kêfweş keno. Paştîdayîşê şarî hêz û moral dano mi.” 

 

 ‘Ma benê cewabê polîtîkayê lêşin’ 

 

Viyane dîyar kerd ke xeta hemserekatîye ya DEM Partî ke bi serran o dewam kena, xeylê muhîm o û wina vat: “Dewlete bi polîtîkayê şerê taybetî û heme polîtîkayê bîn reyde serdestîya camêrd û sazbîyayîşê feodal her raşteyî de şuxilnena. Têkoşînê ma de vera heme polîtîkayan de rayîr ra berdişê têkoşînî heme komelê ma nuqtaya temsîlkarîya têduştîye de demokratîke kena. Sîstemê hemserekatîye şorişê cinîyan o. Ma bi sîstemê hemserekatîye heme raşteyan de cewab danê.

 

 ‘Do îradeyê şarî bi pereyan negîrê’ 

 

Viyane dewamê qiseykerdişê xo de vat: “Îqtîdar hemverê şarî de têkşîyayîş hezm nêkeno. Qeyûm tayînê îradeyê şarî kenê û xesp kenê. Kesê ke vanê do îradeyê şarî bi pereyan bigîrê, akerdişê buroyî yê 19ê Sibate de cewabê xo girewtî. Cinî û ciwan do her raşteyî de rolê xo kay bikerê û polîtîkayê lêşin veng bivejnê. Vera heme teda û polîtîkayan de ma do dezgehê xo akerê û şarî bipawê. Wezîfeyê ma yê yewine no yo ke ma dezgehanê xo tepîya akerê. Ma do Colemêrgo ke îqtîdar açarnayo zîndanê akerde, bîyarê merheleyêk winasî ke cuye tede biba.”

 

 ‘Do şar vera polîtîkayê lêşin de sere çewt nêkero’ 

 

Viyane qiseykerdişê xo yê peyênan de venga wayîrvejîyayîşê sindoqan şarî rê kerd û vat: “Colemêrg bi vindertiş, têkoşîn û rûmetê xo bajarêke ke sere netewênayo ya. Her ke xoverdayîş bibo do serkewtiş nizdî bibo. Wa AKP baş bizano. No şar do vera polîtîkayê leşine de sere çewt nêkero.”

 

 Viyan Tekçeye kam a? 

 

Viyan Tekçe ya namzeta hemşaredarîya Colemêrgî serra 1995î de Colemêrg de ameya dinya û dayîka tutêk a. Mektebê Amadekarîyî yê Colemêrgî ra mezûn bîya. Serra 2023yî de hemserekatîya Partîya Çep a Keske ya Colemêrgî kerda.