Pelşîn Çetînkaya

 

AMED - Ver bi 8ê Adare Roja Cinîyanê Dinya ra dezgehê cîya yê cinîyan dîyar kerdî ke do 8ê Adare bikerê roja serkewtişî û venga herikîyayîşê raşteyan kerdî. 

 

8ê Adare Roja Cinîyanê Dinya serra 2024î de bi hêzo ke nuqtaya "Jin jiyan azadî" ra yeno girewtiş, yena pêşwazîkerdiş. Sîstemê serdestî pratîkê kolekerdişê cinîyan semedo ke ameyox de zî daîmî bikero, vera cinîyan de hêrişan ra qet gamêke tepîya nêerzeno û her serre 8ê Adare de sozê serkewtişî reyna yeno newekerdiş. Emser zî cinî her ca de vengê xo berz kenê û venga têkoşînî kenê. 

 

‘Ma cuye de têduştîye û cuyêke hempar wazenê’  

 

Hemsereka Enstîtuya Kurdî ya Amedî Mîne Karataşe da zanayîş ke 8ê Adare mizgînîya hêvî û rojê weşan a û cinîyan seba na roje bedelê giranan dayo û xover dayo. Mîne ard ziwan ke cinîyan vera astengîyan de gamêke tepîya nêeşta û wina vat: “Hem kurdî hem zî cinîyan teda û şîdetê pîl dîyî. Cinî her serre de têduştîye wazenê. Bi hawayêkê sistematik cinî bi cîyakarî reyde ameyî rî bi rî û her tim planê peynî de ameyî verdayîş. Ma cinî her serre raşteyan de têduştîye û cuya hempar wazenê.”

 

 ‘Ma do 8ê Adare bi coş pêşwazî bikerê’ 

 

Hemsereka Şûbeyê hûmara 1ine ya Egîtîm Senî ya Amedî Salîha Zorluye zî eşkera kerd ke do 8ê Adare bikerê roja serkewtişê cinîyan û wina dewam kerd: “Sîstemê serdest yê camêrdî keda cinî, bedenê cinî her hete ra binpay keno. Na 8ê Adare de zî ma dezgehê cinîyan û rêxistinê demokratîke do na roje taybet bi coş pêşwazî bikerê. Ma do şêrê roja serkewtişê cinîyan. Ma wazenê heqê cinîyan yê ke dest ronîyayî ser tepîya bigîrê. Pêkerdişê Stenbolî ame kerdiş. Reyna heqê nefeqeyê cinîyan ame munaqaşakerdiş û nika zî qanûnê medenî munaqaşa rê yeno akerdiş. Ma qanûnêk bingeyîn ke cuya asayî paweno wazenê. Seba demokrasîyî ganî heme cinî 8ê Adare de raşteyan de bê.”

 

 ‘Ma têkoşînê xo her îmkanî de anê ziwan’ 

 

Endama Heyetê Rayîrberîya Komeleya Cinîyan a Rosaye Ezgî Sila Demîre zî dîyar kerd ke ê azadîya cinî û na çarçewa de îmkanê ke nasnameyê cinî bêro ciwîyayîş de wazenê û wina peynî kerd: “Ma do na nuqta de têkoşînê xo her îmkanî de bîyarê ziwan. Ma ancax bi paştîdayîşî şîdet û sîstemî ra xelas benê. Ma do bi cinîyê xover danê reyde têkoşînê xo dewam bikerê. Ma mecbur ê bi paştîdayîşî têkoşînê xo rayîr ra berê. Ma 8ê Adare bi nê rihî pêşwazî kenê.”