Elfazî Toral

 

MÛŞ - Namzeta hemşaredarîye ya Gimgimî Gulbahar Kaya da zanayîş ke Gimgim her tim wayîrê îradeyê xo vejîyayo û wina vat: “Şar îradeyê xo do hetê DEM Partîye ra bişuxilno.” 

 

Îqtîdarîyê AKPyî bi polîtîkayê tayînkerdişê qeyûman rayîrberîyê her cayê Kurdistanî gêno destê xo la şarê kurdî qeyûman qet nas nêkerd. DEM Partî seba weçînayîşê herêmî yê 31ê Adare bi qerardarîyêke pîl xebatê xo rayîr ra beno. Yew cayê ke do hetê DEM Partîye ra rayê xo bierzo Gimgim o. Şarê Gimgimî qerardaro ke bi îradeyê xo qeyûman bişirawo. 

 

Gulbahar Kayaye serra 1978î de dewa Segranî ya qezaya Gimgimî ya Mûşî de ameye dinya. Mektebê mîyanên û lîse Gimgim de temam kerda û serra 2009î de Beşê Hunerê Destan a Unîversîteya Balikesîrî wenda. Dimayê mektebî agêrena Gimgim û di demî perwerdeyê şarî de derse resîmî dana tutan. Serra 2012î di demî rayîrberî û hemserekatîya Partîya Aştî û Demokrasîyî (BDP) kerd. 2016î de merkeze Cinîyan Savuşka de xebat kerd. La dima ke şaredarî hetê qeyûmî ra ame girewtiş û Gulbahare 2017î de bahaneyê falîyetê sîyasî vera ameye tepiştiş û 4 serran tepişte mende. Aşma teşrîna verêne ya 2021î de cezaya aye qedîya û serbest ameye veradayîş. 

 

Namzeta hemşaredarîye ya Gimgimî ya DEM Partîye Gulbahar Kaya derheqê xebatanê xo de ajansê ma rê qisey kerd. 

 

‘Qeyûm hêrişêke vera temsîlkarîya cinîye bî’

 

Gulbahare da zanayîş ke bi Têgêrayîşê Cinîyanê Azade (TJA) reyde bi serran xebate rayîr ra berda û hema zî xebatanê TJAyî rayîr ra bena. Gulbahare dîyar kerd ke 2016î ra nata Gimgim de rayîrberîyê qeyûmî est o û vat: “Şaredarîyê ma ameyî xespkerdiş. Yew sebebê polîtîkayê qeyûmî sîstemê hemserekatîye bî. No hêriş vera temsîlkarîya cinîye bî. Merkeze Cinîyan ê Savuşka est bî. Qeyûm aye zî girewt. Karkerê cinî est bî la ê zî kar ra ameyî vetiş.” 

 

Lêşinîya hewaye zaf zêdeyo! 

 

Gulbahare ard ziwan ke Gimgim de babeta ekonomîye şarî dana zehmetî û vat ke hema ne binesazî û ne zî gaz ameyî qeza. Gulbahare wina dewam kerd: “Rewşa ekonomî ya şarî zaf xirab a. Şar nêeşkeno wayîr bibo û germ bibo. Komur vilayê şarî kenê. La xeylê xirab o. Beno sebebê lêşinîya hewa. Lêşinîya hewa zaf zêde yo. Yew hedefê ma no yo ke ma gaz bîyarê Gimgim. Amancê ma no yo ke ma şarî nê hewayê lêşin ra bixelisnê.”

 

‘Şarê Gimgimî wayîrê îradeyê xo vejîyeno’ 

 

Gulbahare dewamê qiseykerdişê xo de vat: “Şarê Gimgimî qet qeyûm qebûl nêkerd. Şarê Gimgimî welatperwer o. Wayîrê îradeyê xo vejîyeno. No şar qet qeyûmî qebûl nêkerd. No şar timî hetê DEM Partîye de cayê xo girewt. Ma do zî hetê şarê xo de ca bigîrê. Têkoşîn û xîretkerdişê ma do no het de bibo.” 

 

‘Ma do bi cinîyan reyde newe ra cuye awan bikerê’ 

 

Gulbahare sewbîna dîyar kerd ke nê di demî ke qeyûm tayînê şaredarîya Gimgimî beno û wina qiseykerdişê xo qedêna: “Ma do vera polîtîkayê qeyûm û hedefe ci de têkoşîn bikerê. Rayîrberîyê herêmî de seba ke keda cinîyan bêra dîyîş ma do xîret bikerê. Sîstem, qetilkerdişê cinîyan meşru keno. Cinî verê xo danê xokiştişî. Ma Merkezê Cinîyan ê Savuşka seba paştîdayîşê cinîyan akerd. Ma seba cinîyan raşteyê newîye awan kerdbî. Ma do bi embazanê xo yê cinî reyde newera nê raşteyan awan bikerê. No şar wayîrê nasnameyê welatperwer o. Coka ra îradeyê xo hetê DEM Partî ra şuxilneno.”