Dîlan Babat

 

ŞIRNEX - Elkê ke yew cayê ke hedefê îqtîdarî de yo, 5 serrî yo şaredarîye destê AKPyî de bî û tu xizmetêk seba qezaye nêameyo dayîş. Qezaya ke çimeyê awe zêde yê, şar problemê awe ciwîyeno û yew xizmetêke zî şarî rê nêameyo kerdiş. 

 

Qezaya Elkê ya Şirnexî bi cografyaya xo merdiman heyranê xo verdena, koyê Kato merdiman pêşwazî kena. Qezaya ke çimeyê îdareyê aye heywankarî yo, qedexeyê zozanan vera şar mecbur maneno heywananê xo biroşo. Coka ra şar krîzê ekonomîye xorî ra hîs keno û bi serran o şar problemê awe ciwîyeno. 

 

Kişta problemê herêmî de problemê weçînayoxê kaçax 

 

Şaredarî 5 serrî yo destê AKPyî de ya û şar şaredarîye ra tu xizmetêk nêgirewte. Rayîrê aye hema hema heme xirab ê û vera heme muracatan cewabê ‘ma do virazê’ yeno dayîş. Yew problemê bîn yê qezaye zî problemê weçînîtoxê kaçax o. Hûmara weçînîtoxanê qezaye 11 hezar û 351î ra vejîya, 12 hezar û 44î. Yeno vatiş ke beşêk pîl ê 693 weçînîtoxan leşker û polîsê newîyê. 

 

Devlet Aşana ke 4 serrî yo Mersîn ra ameya Elkê derheqê problemê qezaye de ercnayîş kerd.

 

'Çareserîya şaredarîye kelepulê sefênayîşî ya' 

 

Devlete da zanayîş ke problemê tewr pîl ê Elkê rayîr o, weşî yo û wina dewam kerd: “Awe her tim lêşin herikîyena. Ma awa lêşin çiran ra anê. Problemê ma yê weşîye est o. Nêweşê ma est ê. Ma nêeşkenê înan derman bikerê. Coka ra ma şinê Şirnex, Mêrdîn yan zî Amedî. Problemê rayîrî pîl o. Cinî nêeşkenê biresê xizmetê weşîye. Bi nê zî nêmaneno barêke pîl serê milê cinîyan de yo. Awa ma lêşin a. Seba problemî vanê kelepulê sefênayîşî lazim o. Vanê ma ardê. La reyna zî awe lêşin a.”

 

‘Pesdewarî ameyo merheleya çinîbîyayîşî’ 

 

Devlete qiseykerdişê xo yê peyênan de wina vat: “Semedo ke rayîrî xerepnayeyê merdim nêeşkeno şêro dewanê xo. Nêeşkenê şêrê zozanan. Tena krîzê ekonomîye çin o. Heywankarî ameyo merheleya çinîbîyayîşî. Raşteyo ke heywanî şêrê çerênayîş nêmendo. Seba cinîyan raşte çin o. Ma wazenê 31ê Adare de DEM Partî serbikewa. Ma namzetê DEM Partî tesdîq kenê. Şar tersan vera nêeşkeno raşteyan de qisey bikero. Xeylê weçînayoxê kaçax ardî tîya. La vera înan de reyna zî do DEM Partî ser bikewa.”