AMED - Emîne Ale dîyar kerd ke vera komelê feodalî de bi tutanê xo ra têkoşînî musaya û vat: “Ez venga heme cinîyan kena. Wa sere wedarnê. Semedo ke verê cu bêveng menda poşman a. Werekêna mi verê cu sere wedarnayêne û bivatêne ‘Ez cinî ya, xo nas bikera’.”

 

Cinî keye de, mekteb de, cayê karî de, raşteyan de têkoşînê xo bi 8ê Adaran pîl kenê. Cinî her serre 8ê Adare de hêzê xo yê rêxistinkerde nîşan danê û vejîyenê raşteyan. Cinîyê kurdî ke bi nasnameyê etnik û cînsîyetî hedef yenê girewtiş bi reng û sloganê xo raşteyan de ca gênê. Cinîyê kurdî ke pêroyê tarîxê komare de raştê tedaye ameyî, vera her tewir polîtîkayê şerê taybetî de xover danê û vengê xo danê eşnawitiş. Emîne Ale nê cinîyan ra yew a. Ma Emîne Ale bi têkoşîno ke seba kênaya xo ya tepişte Gulîstan Ale dana nas kenê. 

 

Cuya aye bi zor û zehmetîyan derbaz bî Emîneye dewa Terbilî ya Çermûgî ya Amedî de yena dinya. 8 way û bira yê. 16 serrîya xo de yena zewecnayîş. Emîneye wina vana: “Wexto ke ez zewecîyaya fikrê mi nepersayî. Verê cu kesêk ra nêpersayêne. Ameyî mi waştî. Pîyê mi mi da. 16 serrî ez bîya dayîk. Kênayêka mi virazîya. Nika 4 kêna û 2 lajê mi est ê. Tutîya mi zehmet derbaz bî. Mi şivanî kerd. Mi pîlîya xo de zî zehmetî ant."

 

‘Mi cesaret tutanê xo ra girewt’ 

 

Emîneye da zanayîş ke vera feqîrîye de tutê aye pêser ameyî dinya û vat: “Ez hem xebetîyayêne û hem zî mi ewnîyayêne tutanê xo ra. Ma bizinan antêne. Heta nîmroje ma xebetîyayêne û tutî milê mi ser de bî. Dimayê nîmroje ma werd hadre kerdêne. Ma dima ra pez berdêne çerênayîş. Ma pembo arêdayêne. Heqê ma çinî bî ke ma derdê xo zî vajî. Qiseykerdiş ma rê qedexe bî. Cinîyê winasî wa sere wedarnî. Bêveng mebê. Ma heqanê xo nêzanayêne. Ma nêpersayêne. Heta ke tutê mi tewrê têgêrayîşî bîyî, mi heqanê xo nêpersa. Mi tutanê xo ra cesaret girewt.”

 

‘Ez xebetîyayêne mi pere şirawitêne’ 

 

Emîneye dîyar kerd ke serra 2000î de koçê Antalya kerda û uca de seba tutanê xo bida wendiş xîret kerda. Emîneye wina dewam kerd: “Ma ewil Çermûgî ra ameyî Amed û çewlîk de mendî. Dima ra ma agêrayî dewe axur de mendî. Çike keyeyê ma çinî bî. Kênaya ke tuta mi ya tewr pîl bî 13 serrî bî. Ma feqîr bî. Ma şîyî Antalya. Ez û tutanê xo seraya vilikan de xebetîyayî. Dima ra mi tutanê xo şirawit mekteb. 3 tutê mi şîyî unîversîte. Lajê mi şî Isparta, Gulîstane şî Meletî. Ez xebetîyayêne mi pere înan rê şirawitêne. O wext tewrê têgêrayîşî bî. Ma agêrayî Amed û mi fek xebate ra verda. Ez seba zîndanan xebetîyena. Çi destê mi ra biameyêne mi kerdêne.” 

 

‘Ez nika serê rêça înan de ya’ 

 

Emîneye wina qiseykerdişê xo qedêna: “Tutê mi unîversîte de nasnameyê xo vera raşte tedayan ameyî. Mi zî seba tutanê xo dest bi têkoşînî kerd. Lajê mi şî unîversîteya Suleyman Demîrelî ya Isparta. Yurd de mendêne. Her şewe beyraqe dayêne serê cayê ci. Bi zilmê înan tutê mi tewrê nê têgêrayîşî bî. O mecburî wina kerd. Gulîstane zî wina bî. Meletî de wendêne. Ê zilm qebûl nêkerdî. Ez serê rêçe înan de ya. Çi destê mi ra bêro ez kena. Ez bi cesaretê înan keye ra vejîyaya. Ez venga heme cinîyan kena. Wa sere wedarnê. Wa bêveng nêmanê. Sere çewt nêkerê.”