Pelşîn Çetînkaya

 

ÊLIH - Çalakîyê Nobeda Edaletî ke seba azadîya Rayberê PKKyî Abdullah Ocalan dîyayî destpêkerdiş ê 8 bajaran dewam keno. Dayîkê ke nobede tepişenê vatî: "Eke Serekatî azad nêbo kes azad nêbeno. Ma do heta azadîye xoverdayîşê xo dewam bikerê.” 

 

9ê Teşrîna Verêne ya 1998î de hemverê Rayberê PKKyî Abdullah Ocalanî de komployê mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdê giran de yeno tepiştiş. 35 aşmî yo tu xeberêke ci ra nîna girewtiş. Vera tecrîdî û seba azadîya Abdullah Ocalanî 10ê Teşrîna Verêne de 74 merkezanê dinya de bi sloganê "Abdullah Ocalanî rê azadî, problemê kurdî rê çareserîya sîyasî" kampanya dîya destpêkerdiş. 27ê Teşrîna Peyêne de zî zîndananê Kurdistan û Tirkîya de grevê vêşanîye bi eynî taleban dîya destpêkerdiş. Bi sloganê “Seba edaletî ma tecrîdî bişikinê, seba aştîye ma bibê vengê zîndanan” Wan, Amed, Mêrdîn, Êlih, Mêrsîn, Edene, Stenbol û Îzmîr de bî bi eynî taleban çalakîya "Nobeda Edaletî" dîya destpêkerdiş. 

 

Çalakîya Nobeda Edaletî Amed de bi serkêşîya Komeleya Hetkarîya bi Keyeyê Tepişteyan Reyde (TUAY-DER) ra dîya destpêkerdiş û awanîya Rêxistina Partîya Têduştîye û Demokrasîyî yê Şaran (DEM Partî) ya qezaya Rezanî ya Amedî de dewam kena. Dayîkê ke nobede tepiştenê her roje êlegê ke serê înan de "Tecrîd sucê merdimîye yo" nuseno xora danê û dest bi çalakîye kenê. 

 

Dayîkê ke tewrê nobede bîyî ajansê ma JINNEWSî rê qisey kerdî. 

 

 'Tutî zî tecrîdî ra tesîr bîyî’ 

 

Elîf Tulukmure da zanayîş ke ganî Rayberê PKKyî Abdullah Ocalan muxatab bêro girewtiş û wina dewam kerd: “Mifte destê Serekatî de yo. Mifteyê aştîye destê ci de yo. Eke Rayber Apo muxatab bêro girewtiş û bêro goşdarîkerdiş do o wext her kes zî azad bibo. La kesê bi wijdan çin o ke şer rê vajo nê. Ma çend tutanê xo rê qala tecrîdî nêkerê zî tutê ma zanê. Wexto ke vengê ambulansî zî yeno vanê 'Polîs ame polîs' tersenê û yenê keye de xo nimnenê. No metodêk tecrîdî yo û tutanê ma ser de tesîr keno. Tutê ma nika ra tepişte yê. La eke ma bibê yew ma eşkenê tecrîdî birijnê.” 

 

'Her ca de tecrîd est o' 

 

Hurîye Acare venga wedaritişê tecrîdî kerd û wina dewam kerd: “Tecrîd yeno manaya merg û kiştişî. Ganî tecrîd bêro wedaritiş. Ma nêwazenê kesêke dinyaya xo bibedelno. Ganî tecrîdê serê Serekatîyê ma û tepişteyanê ma bêro wedaritiş. Her cayê cuya ma de tecrîd est o. Ma şar ê û ma heqanê xo wazenê. Sewbîna eke tecrîdê hemverê Serekê ma bêro wedaritiş do tecrîdê serê ma zî wirzo." 

 

'Hemwelatijanê xo dano kiştiş' 

 

Herdem Koçere venga şarê kurdî kerd û vat: "Serekatî koyê edaletî yo. Hêvîya ma bi ci est a. Ma hêvî kenê ke do aştî û azadîye bîyaro. Semedo ke kesêke adilane yo vengê ci yeno birnayîş. Wexto ke başûrê Kurdistanî de hukmatê kurdî ame awankerdiş Mesud Barzanî vat 'Ez do kişta kurdan de ca bigêra' la nika çîyêk winasî çin o. Mesut Barzanî kurd o la kişta Erdoganî de ca gêno û tehemulê kurdan nêkeno. Welatê xo de cinî û hemwelatijanê xo teslîmê dewleta tirkan keno û dano kiştiş. Mi gore o kurd nîyo. Wa şerm bikero halê xo ra."

 

 'Kesê ke tecrîdî vînenê senî eşkenê biciwîyê’ 

 

Şukran Akkurte zî qiseykerdişê xo de sey cinîyê bînî venga wedaritişê tecrîdî kerd û wina vat: “Ez bêvengîya hemverê tecrîdî şermezar kena. Eke tecrîdê hemverê Serekê ma nêrijîyo do serê ma ra zî nêşêro. Nika heme cîhan tecrîdî ra xeberdar o. Ma seba edaletî tîya de yê. Kesê ke nê tecrîdî vînenê senî eşkenê biciwîyê.”