Elfazî Toral

 

STENBOL - Cinîyan bi nizdîbîysyîşê 8ê Adare reyde lez dayî xebatê xo. Temsîlkarê rêxistinê cinîyan ê Stenbolî venga cinîyan kerd û vat: “Vera feqîrî, kedwerî, şer, şîdet û serdestîya camêrdî de raşteyan û kuçeyan de kom bibê. Semedê azadîya cinîye vengê xo berz bikerê. Wext wextê cinî û serewedarnayîşî yo. 

 

Xeylêk bajaran de startê xebatê 8ê Adare Roja Cinîyê Dinya ame dayîş. Platformê Cinîyan ê 8ê Adare Stenbol de lez da xebatê xo. Platform raşte û taxan de vilawekan vila kenê û venga tewrbîyayîşê rayîr ra şîyayîş û çalakîyan kenê. 3yê Adare de Kadikoyî de bi sloganê ‘Vera feqîrî, şîdet, kedwerî û şerî de têkoşînê ma est o’ pêvînayîşê cinîyan est o. 8ê Adare de zî “Rayîr ra Şîyayîşê Şewe yê Femînîstan” do pê bêro. Cinî amadekarîya rayîr ra şîyayîşî zî kenê. 

 

Temsîlkarê rêxistinê cinîyan derbarê amadekarîyê 8ê Adare de ajansa ma JINNEWSî rê qisey kerdî.

 

'Ma do 8ê Adare de raşteyan de bê’ 

 

Endama Kedkarê Cinîyan Delal Erole dîyar kerd ke 8ê Adare 1857î ra heta ewro her cayê dinya de cinî raşteyan de xover danê û vat: "Vera kedwerî, şer, şîdet û serdestîya camêrdî de têkoşîn kenê. Sey her serre emserr zî do 8ê Adare de têkoşînê xo dewam bikerê. Emser ma 8ê Adare de mîyanê feqîrîye de pêşwazî kenê. Sewbîna her roje cinîyêk nê welatî de yena qetilkerdiş. La cinî vera her tewir astengîyan bi hêz ê. Serewedarnayîşêke cinîyan est o. Ma tîya ra venga heme cinîyan kenê ke 8ê Adare de raşteyan de bê."

 

'Wext wextê cinîye yo' 

 

Endama Kedkarê Cinîyan Ceyda Gedîke da zanayîş ke vera feqîrîye do Stenbol de bê û wina ard ziwan: "Ma vanê wext wextê cinîye yo û bivejê raşteyan. Vera kedwerî, şîdet û feqîrîye de do cinî serewedarnayîş de bê. Ma vera tedaye de gamêk tepîya nêerzenê.”

 

'Ma keyeyê pîroz nêwazenê' 

 

Aktîvîsta Pîrebokê Kampusî Hîda Canbaze zî dîyar kerd ke do hemverê polîtîkayê îqtîdarî de bêveng nêmanê û wina vat: “Ma do şan de zî kuçe û raşteyan terk nêkerê. Hemverê hêrişanê îqtîdarî de do raşteyan de mîyanê serewedarnayîşî de bê. Tedaya înanî ya keyeyê pîrozî qebûl nêkenê û ma azadîya wargehê wendekaran wazenê.”

 

'Ma kampusê azad wazenê' 

 

Bêrîvan Çingirlara ke endama Pîrebokê Kompusî ya wina vat: "Hemverê destkewtişê cinîyan nika qanûnê newe yenê amadekerdiş. Ma sey wendekarê cinî yê unîversîteye vera şert û mercê ekonomîye de mehkumê wargehan yenê kerdiş. Ekonomîye vera ma nêeşkenê xo rê keye kîra bikerê. Ma kampus, raşte û raşteyê azad wazenê. Ma ver bi 8ê Adare ra şinê û vanê vera keyeyo ke pîroz yeno mojnayîş azadîye taleb kenê. Ma raşte û raşteyanê xo kesêk bîn rê nêverdenê. Ma tena nîyê. Nika îqtîdar xîret keno ke polîtîkayêke çinîkerdişî aver bifîno. La eke ma destê yewbînan bigîrê, xo rêxistin bikerê ma do bi hêz bê. Coka ra ma 8ê Adare de paweyê şima yê.” 

 

'Ma do raşteyan de biqîrê' 

 

Çîgdem Altepe zî bale anat serê muhîmîya 8ê Adare û wina vat: “Ma ver bi 8ê Adare ra şinê û ma veng kenê û vanê vera qetilkerdişê cinîyan de bêveng mebê û vengê xo berz bikerê. Ma do vera her tewir argumanê şîdetî de raşteyan de bê. Ma vera kedwerî û tedaye de raşteyan de biqîrê.”