Dîlan Babat

 

ŞIRNEX - Namzeta Hemşaredarîya Şirnexî Bêrîvan Kutluya ke emrê xo yê şenik ra nata têkoşînê xo dewam kena, da zanayîş ke do projeyê ke cinîyan tewrê cuye kenê do bikerê dewre. 

 

Bi hawayêkê sistematik Kurdistan de polîtîkayê çinîkerdişî dewre de yê. Polîtîkayê qeyûman zî nê çîyan rê xizmet kenê. Bi tayînkerdişê qeyûman reyde ewil dezgehê cinîyan ameyî girewtiş. Polîtîkayê şerê taybet kewenê dewre, fuhuş û şuxilnayîşê tîryakî serê şarê kurdî de yenê ferzkerdiş. 

 

Vera nê polîtîkayan de hemwelatijê Şirnexî xoverdayîşê xo dewam kenê û weçînayîşan de îddîa kenê ke do qeyûman bişirawê. 

 

Namzeta Hemşaredarîya DEM Partîye ya Şirnexî Bêrîvan Kutluye problemê bajar û projeyê xo JINNEWSî rê pare kerd. 

 

Bêrîvane serra 1985î de Navyana Şexa de dayîka xo ra bîye û hema emrê xo yê şenike de herra xo ra yena dûrîfînayîş û Silopîye de bi ca bena. Heta 14 serrîya xo bi keyeyê xo reyde Silopî de manena û semedo ke keyeyê aye welatparêzo lez têkoşînî nas kena, mîyanê ci de ca gêna. Serra 2002yî de partîya sîyasî nas kena. Vera emrê şenike de tewrê xebatê raşteyan bena. Serra 2014î de zî tewrê xebata ciwanan bena. Berîvane serra 2007î de xebatê Meclîsê Cinîyanê Ciwanan de ca gêna. Serra 2010î de partîya sîyasî de hemserekatîye kena û 2011î de na rey çarçeweya operasyonê KCKyî de yena tepiştiş. O wext yew serrî û 7 aşmî zindan de manena. Bêrîvane dimayê tehlîyebîyayîşî reyna mîyanê xebatan de ca gêna. 

 

Di herêmê ke tede ameye weçînayîş rê qeyûm ame tayînkerdiş 

 

Bêrîvane serra 2014î de Dêrgulî de bî hemşaredara şaredarîye û bado ke di serrê aye wezîfe de debeno, qeyûm tayînê herinda aye yeno kerdiş. Reya hîrêne ameye tepiştiş. 7 aşme û 20 roje zîndan de manena. Vera heme tedayan têkoşînê xo dewam kena. Berîvane binê banê HDPyî de xebatê xo dewam kena û na rey serra 2019î de seba hemşaredarîya Cizîre yena weçînayîş. Berîvane 5 aşman uca de kar kena la dima ra qeyûm yeno tayînkerdiş. Berîvane vera qeyûman zî xebatê xo yê Cizîrî dewam kerd û na rey sey namzeta hemşaredarîya Şirnexî ameye weçînayîş.

 

 'Yeno waştiş ke cografya û kultur bêrê çinîkerdiş’

 

Bêrîvane da zanayîş ke xeylê polîtîkayî serê cinî, tutan de yenê rayîr ra berdiş û wina dewam kerd: “Şirnex seba kurdan û seba partîyê sîyasî cayêk muhîm o. Vindertiş û nasnameyê şarê Şirnexî dîyar o. Tarîx ra heta nika Botan de tedayêka zêde est a. Na teda ewro zî dewam kena. Vera heme tedayan de şarê Şirnexî fek vindertişê xo ra nêverdeno. Coka ra zî polîtîkayê tewr lêşinan serê şarî de yenê rayîr ra berdiş. Wazenê nasnameyê şarê Şirnexî asîmîle bikerê. Qeyûmê AKPyî seba şarî tu çîyêk nêkerdî. Semedo ke şarê Şirnexî nê çîyan qebul nêkeno, coka ra zî xizmet ra yeno mexdurkerdiş.”

 

 'Wazenê komelêk bênefes awan bikerê’ 

 

Bêrîvane da zanayîş ke yeno waştiş ke şar bê nesef bêro verdayîş û wina vat: “Weçînayîş de şarê Şirnexî her çend ke wayîrê îradeyê şarî bivejîyo zî kayê ke ameyî kaykerdiş vera şar ame xespkerdiş û şar zî qebul nêkerd. Wazenê şarê Şirnexî bê qîmet bikerê. Yew nimuneyê tewr somut zî no yo ke seba cinîyan tu xebatêke nêame kerdiş. Cinî se kenê, bi çi meşgul benê? Derheqê na babete de tu çîyêk nêame kerdiş. Goreyê înan cinî ganî keye de biewna tutan û kare keyeyî bikera. Na rewşe tena seba cinîyan nê, seba ciwanan zî derbazdar a. Wazenê ciwanî kulturê xo û ziwanê xo ra dûrî bibê.” 

 

Projeyê Şirnexî 

 

Bêrîvane tewr peynî qala projeyanê xo kerd û vat: “Wexto ke ma şaredarîyan bigîrê karê ma yê ewil do akerdişê merkezê paştîdayîşê cinîyan bo. Ma do cayê perwerde, weşî, kulturî akerê. Vera polîtîkayê şerê taybetî de ma do bixebetê. Ma do seba tutan raşteyê kreşî akerê. Ma do vera polîtîkayê asîmîlasyonî de raşteyê kulturî akerê. Ma do xîret bikerê ke ciwanî mîyanê kulturê xo de bê. Ma do ciwananê xo madeyê zirarin ra dûrî bifînê. Ma do seba nê çîyan zî cayê tedawî û perwerdeyî akerê. Ma do vera fuhuşî de zî eynî çîyî bikerê. Wexto ke ma kewtî mîyanê sîyasetî ma barêk giran wedarit, ma do vera polîtîkayê çinîkerdişê komelî xover bidê. Ma ser bikewê zî nêkewê zî ma do têkoşînê xo dewam bikerê.”