Rojda Aydin

 

AGIRÎ - Namzeta Hemşaredarîya Agirîye Hazal Arase ard ziwan ke do Agirî de modelê cuye yê alternatîf ê DEM Partîye pêşkêşî ciwanan bikerê û vat: “Ma do dêsê burokratîkî birijnê. Bêrê ma îradeyê xo dîyar bikerê” 

 

Weçînayîşê herêmî yê 31ê Adare rê demêk kilm mend, partîyê sîyasî zî lez dayî xebatê xo. Agirîya ke şaredarî deste AKPyî de ya, weçînayîşê herêmî yê 2014î de Partîya Aştî û Demokrasîyî (BDP) şaredarîyêk bi dest fîna û serra 2016î de zî qeyûm ame tayînkerdiş. Weçînayîşê herêmî yê 2019î de zî AKP yewna reye şaredarî girewt dest. Her raşteyê bajarî ke tede weçînayîş yeno ercnayîş de atmosferê bajarî bi taybetî hetê Partîya Têduştîye û Demokrasîyî yê Şaran (DEM Partî) de ya. 

 

Agirî de Hazal Aras û Mehmet Akkuşî ke DEM Partîye ra bîyî namzet, raştê eleqeyê hemwelatijan yenê. Hazala ke namzetîya xo bi vatişê “Ma bîyî namzet ke hîkayeya xo ya ke nêqedîyaya, Agirî de biqedînê. Seba Agirîyêk ke tede bieşkê cuye bikerê û awan bikerê, ma bi waştişê şarê xo û embazanê xo yê partîye reyde bîyî namzet” ana ziwan. Hazale ajansê ma JINNEWSî rê derheqê weçînayîş û projeyê xo de qisey kerd.

 

‘Konseptêk çinîkerdişê ked û ercan o’ 

 

 

Hazale da zanayîş ke weçînayîşê 2014î de înan şaredarîyan bi dest fînayî, bi taybetî serê cinî û ciwanan de vindertî û wina dewam kerd: “Ma merkezê cinîyan, merkezê paştîdayîşê cinîyan û Mudirîya Polîtîkayê Cinîyan awan kerd. Raşteyan de ciwanan reyde xebetîyenê. Sewbîna kursê ziwan û kulturî ma dabî destpêkerdiş. Ma nê heme projeyan kerdbî dewre. Bi tayînkerdişê qeyûman reyde ewilî nê projeyî ameyî hedefgirewtiş. Dezgehê cinîyan, dezgehê ciwan û kulturî heme ameyî girewtiş. Seba çi înan hedef girewtî? Semedo ke cinî û ciwan hêzê nê koemlî yê û wayîrê hêzê bedilnayîşî yê. Komel serê înan ra rayîr ra şino. Coka ra cinî û ciwan ameyî hedefgirewtiş. Ê eşteyê zîhnîyetê yewperestî. Yew nijad, yew beyraqe, yew welat… Ma bi zîhnîyeto ke her çîyî yew hetin keno reyde rî bi rî yê. Cinî çinî hesibnenê. Wexto ke ma demokrasîyê herême raşte ra wedarnê, cinî komel de çin a. Amanc no bî ke cinî komel de çinî biba û çinî bêra hesibnayîş. Wexto ke ma 31ê Adare de bi serkewtişî bêrê Agirî, do reyna xebatê ma seba cinî û ciwanan dewam bikerê. ma do hewl bidê ke çîyê ke destê ma ra ameyî girewtiş tepîya bigîrê.”

 

‘Modelê cuye ya alternatîf pêşkêşû ciwanan bikerê’ 

 

Hazale dîyar kerd ke no yew aşme yo ke ê dest bi xebatê xo yê weçînayîşî kerdî û vat ke heta nika xeylê reyan kombîyayîşê cinîyan û pêroyî kerdî. Hazale ard ziwan ke ê zîyaretê dezgeh, komele, esnaf û hemwelatijanê xo kenê û wina qalê projeyê xo kerd: “Mîyanê pêvînayîşan de çîyê ke vejîyayî raşte ma do bikerê dewre. Ma do muhendîsîya komelî nêkerê. Ma do serê nameyê komelî qeraran nêdê. Ma do serê nameyê komelî polîtîkayan rayîra ra berê. Ma do bi pêroyî merkezê paştîdayîşê cinîyan, raşteyê cuye, raşteyê ke cinî û tutî eşkenê pîya şêrê, atolye, kooperatîf, merkezê kulturî yê ciwanan û projeyê merkezê kulturî ke eşkenê xeylê beşan de perwerdeyî bidê, spor ra bigîrê heta huner û edebîyatî û modele cuye ya alternatîf pêşkêşê ciwanan bikerê. Reyna kursê sînema, tîyatro, kursê ziwan û ûsn. do merkezanê ma yê kulturî de bêrê dayîş. Ma do spor teşwîq bikerê û paştîdayîş bidê klubê amatorî. Ma do bi sporî ciwanan bîyarê têkişt. Bi no hawa ma eşkenê ciwanan tîryakî û fuhuşî ra rizgar bikerê.”

 

‘Hêvîya ma pîl a’ 

 

 

Hazale ard ziwan ke wexto ke xebatê weçînayîşî rayîr ra benê heqê şarî ra raştê eleqeyêk pîl yenê û wina dewam kerd: “Hîsê bawerîye est o. Ma bi AKP yo ke rincan bîyo reyde rî bi rî yê. Vera ma de bawerî û hêvî est a. Tena zemînê ma ra nê, zemînê AKPyî ra zî seba ma hêvî est a. Çike şar sîyasetê pêroyî yê welatî ra aciz bîyo. Tena polîtîkayê çareserîye ra nê. Hema hema seba heme beşê komelî, ez eşkena îdîa bikera ke MHPyijê ke bajar de ciwîyenê rê zî ma bîyî hêvî. Coka ra barêk zaf pîl serê milê ma de yo.”

 

‘Ma do dêsê burokratîk birijnê’ 

 

Hazale tayînkerdişê qeyûman sey “konseptê şerê taybet” biname kerd û vat ke tayînkerdişê qeyûman awankerdişê kede rê, ercan, ziwan, kultur, cinî, ciwan û îradeyê komelî rê hêrişêk bîyo. Hazale da zanayîş ke wexto ke reya yewine serra 2014î de qeyûm tayînê şaredarîyan ameyî kerdiş şar reaksîyonêk pîl nêmojnayo û wina dewam kerd: “O wext ma zî zîndan de bî. Serra 2019î de eynî konsept reyna kewt dewre. La ma o wext reyna nizdîbîyayîşêk xurt nêda mojnayîş. Rewşêka xeylê zehmetina ke merdim di deman de raştê polîtîkayê qeyûmî bêro. Şar û rayîrberî pîya na rewşe vera mexdur bîyî. Nê demî do şar bibo wayîrê hêzî.”

 

‘Ganî şar nizdîbîyaîyşêk baş bido mojnayîş’ 

 

 

Hazale qiseykerdişê xo yê peyênan de venga şarî kerd û nê çîyan vat: “Venga mi şarî rê no yo ke; şar xo û îradeyê xo bipawo. Şar ganî nizdîbîyayîşêk baş bido mojnayîş. Ma bawer kenê ke do wina bibo. Do no weçînayîş de, sindoqan de îradeyê xo nîşan bidê û çîyê ke ma ra ameyî girewtiş zî ma do reyna înan ra bigîrê.” 

 

Hazal Arase kam a? 

 

Hazal Arase serra 1975î de Agirî de dadîya xo ra bîya. Unîversîteya Înonu de Fakulteya Zanistê Ekonomî û Îdarî û Unîversîteya Anadoluye de zî beşê komelnasî wenda û qedênaya. Hazale weçînayîşê herêmî yê serra 2004î de sey endama Meclîsê Pêroyî ya DEHAPî ya Agirîye ameye weçînayîş. Kongreyê DEHAPî ke serra 2004î de ame viraştiş de sey endama Meclîsê Partîye ya DEHAPî ameye weçînayîş. Dima ra Kongreyê Partîya Komelî ya Demokratîke (DBP) ya Agirîye de sey rayîrbera merkezî û 1ine Kongreyê Asayî yê DTPyî de zî sey endama PMyî ameye weçînayîş. Xebatê xo yê Bazîdî de çalakîyê 8ê Adara 2012yî yê Roja Cinîyê Dinya de ameye tepiştiş. Hazala ke nizdîyê 7-8 aşman zîndan de mende, serra 2013yî de ameye tehlîyekerdiş. Dima ke serbest ameye verdayîş xebatê xo Akademîya Sîyasî ya Cinîye de dewam kerd. Hazale weçînayîşê herêmî yê 30ê Adara 2014î de zî Partîya Aştî û Demokrasîyî (BDP) ra sey Hemşaredara qezaya Gihadine ameye weçînayîş. Hazale serra 2016î de wexto ke hemşaredar bî ameye tepiştiş û nizdîyê yew serrî û nîme zîndan de mende. Hazale tewr peynî serra 2018î de ameye tepiştiş û 6 aşman zîndan de mende.