Rojda Aydin

 

AGIRÎ - Namzeta Hemşaredarîye ya Panosî ya ciwane Rojbîn Kartala ke vera sîstemê pederşahî û îqtîdarî de bî namzet, ard ziwan ke sîstemê “hemserekatîye” pawenê û vat: “Ez na bawerîye de ya ke do cinî mi tena nêverdê. Ez wazena ê bibê vengê mi, ez zî biba vengê înan.” 

 

Weçînayîşê herêmî ke do 31ê Adare de pê bêro rê demêk kilm mend. Partîya Têduştîye û Demokrasîyî yê Şaran (DEM Partî) ke demê vîyarteyan de verweçînayîş pê ard, hetê delegeyan ra namzetanê xo dîyar kerd. Verweçînayîşo ke dinya de reya yewine hetê DEM Partîye ra ame kerdiş, sey nimune ame mojnayîş. Bi nê verweçînayîşan reyde bajarê Kurdistanî de namzetê DEM Partîye yê hemşaredarîye dîyar bîyî. Qezaya Panosî ya Agirî de verweçînayîşo ke ame kerdiş de Rojbîn Kartal û Kerem Kirtayî sey namzetê hemşaredarîye ameyî mojnayîş. Namzetê Panosî dima ke ameyî weçînayîş tîya ra qezaye de xebatê xo yê weçînayîşî dayî destpêkerdiş. 

 

Namzete Rojbîn Kartale derheqê namzetîya xo û projeyê xo de qisey kerd. 

 

Rojbîn Kartale kam a? 

 

Namzeta Hemşaredarîye ya Partîya DEMî ya Panosî Rojbîn Kartale serra 1997î de qezaya Panosî de dayîke ra bîya. Rojbîne wendişê xo heta lîseye Panos de dewam kerda. Kişta xebatê ciwanan yê DEM Partîye de sey aktîvîsta Têgêrayîşê Cinîyê Azade (TJA) de xeylê çalakîyan de ca girewta. Sewbîna Merkezê Kulturê Serhedî ya Panosî de xebatê kultur û hûnerî de ca girewta. Kişta înan de Merkezê Paştîdayîşê Perwerdeyî yê Panosî û Merkezê Paştîdayîşê Perwerdeyî yê Wanî de xebatê seba perwerdeyî rayîr ra berda. Rojbîna ke 26 serrî ya, dadîya 2 tutan a. Rojbîne kişta emrê xo yê kije de seba ke biba vengê cinîyanê Panosî bîya namzet. 

 

 ‘Ma têduştîya cinî û camêrdî pawenê’ 

 

Rojbîne da zanayîş ke wexto ke seba namzetîye muracat kerda hîsêk xeylê weş ciwîyaya û wina vat: “Wexto ke mi muracat kerd xeylê kêfweş bîya. Muracatê mi seba mi xeylê bi heyecan bî. Seke şima zanê ma komelêk feodal de ciwîyenê. Her çend ke ma zehmetîyan biciwîyî zî ma xoverdayîşê xo serê payan de vindarnenê. Amancê ma zî şikitişê zîhnîyetê feodal o. Bi taybetî bajarê Kurdistanî de cinîyan rê teda yena kerdiş. Emrê mi hema tay o, xeylê kesî zî nê çîyî anê ziwan. Ma sey namzetê şaredarî seba cinîyan xeylê çîyanê weşan fikirîyenê ke bikerê. Coka ra mi zî vera nê sîstemê feodal de muracat kerd. Ez wazena ke biba vengê cinîyan. Mi waşt ez bida mojnayîş ke cinî zî her ca de yê. Seke yeno zanayîş sîstemê ma yê hemşaredarîye est o. Ma têduştîya cinî û camêrdî pawenê.”

 

 ‘Ma do têkoşînê xo pîl bikerê’ 

 

Rojbîne dîyar kerd ke dima ke bîya namzet hetê şarî ra raştê eleqeyêk pîl ameya û ameya pêşwazîkerdiş. Rojbîne wina vat: “Semedo ke ez namzetêk cinî û ciwan a, şar bi hawayêkê pozîtîf mi pêşwazî kerd. Wayîrvejîyayîşêk pîl est o. Eleqeyêk gird est o. Sîstemê feodalî vera tay kesan zî qebûl nêkerd. La zafaneyê komelî eleqeyêk pîl mojna. Dimayê namzetîye ma dî ke şar cinî û bîyayîşê aye qebûl kerdo êdî. Ma têkoşînê xo da û ma ser kewtî. La nê mird nêkeno, ma do hîna zêde têkoşîn bikerê. Dimayê 31ê Adare zî ma do têkoşînê xo pîl bikerê.”

 

 ‘Ma sîstemê ‘hemserekatîye’ danê ferzkerdiş’ 

 

Rojbîne dewamê qiseykerdişê xo de vist vîr ke weçînayîş rê demêk kilm mendo û vat ke xebatê ke rayîr ra benê de qerardarîya şarî vînenê. Rojbîne eşkera kerd ke keye bi keye tax bi taxe û esnaf bi esnaf gêrenê û zîyaretê şarê xo kenê û wina dewam kerd: “Xora germîyêk estbî, la nika ma germiye pîl kenê. Şar wayîrvejîyayîşêk pîl mojneno. Tîya de verweçînayîşêk demokratîk pê ame. Ma bi vengê şarî heta ewro ameyî. Sîstemê ma yê hemserekatîye hem Tirkîya û hem zî heme dinya de nimuneyêk ewil o. Sîstemêk xeylê weş û muhîm o. Sîstemê ma têduştîya cinî û camêrdî paweno. Wexto ke ma zîyaretê şarê xo kenê, şar ma rê persê ‘kam şima ra serek o?’ perseno. Ma zî cewabê ‘ma wirdî zî hemserek ê’ danê. Kişta ma de tena serekêk çin o. Dewlete û sîstem bi ma ‘serekêk’ danê ferzkerdiş. La ma zî ‘hemserekatîye’ bi înan danê ferzkerdiş. Ma seba ke nê sîstemê feodal birijnê çi destê ma ra bêro ma do bikerê.”

 

 ‘Do bibî vengê mi, ez zî biba vengê înan’ 

 

Rojbîne qiseykerdişê xo yê peyênan de venga şarî kerd ke 31ê Adare de şêrî raya xo bierzê. Rojbîne sewbîna venga cinîyan kerd û wina qiseykerdişê xo peynî kerd: “Ma tîya de bêveng nîyê. Ez hêvî kena ke do cinî 31ê Adare de şêrê serê sindoqan û vera sîstemî de raya xo bierzê. Sewbîna ez na bawerî de ya ke do cinî mi tena nêverdê. Ez wazena ê bibê vengê mi, ez zî biba vengê înan. Vatişêk kurdan est o ‘Şêr şêro, çi cinî yo çi camêr o.’ Ma do 31ê Adare de cewabê xo bidê. Ma do xebatê xo bi cinîyan reyde bikerê.”