Dîlan Babat

 

ŞIRNEX - Cinîyê Koçerî ê ke netîceyê hêrişê serê koyanê Kurdistanî de binê bombardûmanî de ciwîyenê, dîyar kerdî ke hem weşikî û hem zî zehmetîyê koçerî est ê. 

 

Kulturê kurdî yê koçerîye hem nameyêk bîn ê cuya xozayî û hem zî nimuneyê cuya komînal o. Problemê tewr pîl ê Koçerê ke xeymeyê xo nizdîyê koyanê herême ke dûrê merkezê bajarê Şirnexî de ronayî û reng danê herême no yo ke wexto ke Cûdî, Gabar û Herakolî de xeymeyanê xo ronenê, binê bombardûmanî de ciwîyenê. Cinîyê ke ma herêmê Sarix Haberli û Koyê Spî yê qezaya Hezexî de bi înan reyde qisey kerdî, zehmetîyê şertê cuya xo ardî ziwan. Cinîyan dîyar kerd ke vera heme hêrişan fek raşteyê xo yê cuye ra nêverdenê û vatî: "Eke ma reyna bêrê dinya, ma wazenê reyna bibê Koçer." 

Sêrtî ra heta Botan… 

 

Yew cinîyê Koçer yê ke Sêrtî ra ameyî Botan, Ayşe Gunbaye ya. Ayşe vana ke wexto ke aye serê sibayî lez hewn ra wirzena, semedo ke hewa serd o, ewil seba tutanê xo areyî hadre kena û sobe tafînena. Ayşe vat: “Dimayê nê karan ma şinê verê heywanan. Bado ke ma heywanan çir kenê, şivanê ma heywanan beno cayê dûran ê çerênayîşî. Ma heta şewe nêvindenê, heta ke pez şinê ma seba tafînayîşê adirî dormera qirş û qalan arê danê. Mîyanê di aşman de ma do tîya ra nêvejê û şêrî zozanan. Ma şinê zozanê Eledagî û 3-5 aşman uca de manenê. Herêmê nizdîyê zozanê ke ma tede manenê zî yenê bombardûmankerdiş. Wexto ke ma uca ra derbaz bibê, ma xebere danê hukmatî û vanê ke ma koçer ê. Heta ke ma derbaz bibê, ma qet nêvindenê û dima ra reyna bombardûman kenê.” 

 

'Çîyo tewr xirab no yo ke tutê ma nêeşkenê biwanê' 

 

Ayşe ard ziwan ke her tim vengê ke koy yenê bombardûmankerdiş eşnawenê, na rewşe înan zaf hîsin kena, la nêeşkenê vengê xo berz bikerê û wina vat: “Çîyo tewr xirab ê koçerîye no yo ke tutê ma nêeşkenê biwanê. Ma timî koyan de yê, ma nê koyî ra şinê koyê bînan. Her ke yeno vîrê mi ez koçer a. Keyeyê mi zî koçer bî. Keyeyê keso ke ez ci reyde zewecîyaya zî koçer o. Cuya mi do bi koçerîye dewam bikero.” 

 

'Heta bomberdûman peynî bibo ma konê xo de manenê’

 

Zehra Gunbayira ke mîyanê kesê ke Sêrtî ra ameyî Koyê Spî de ya nê çîyan vat: “Ma her tim koyan de yê. Dimayê yew aşme ma do reyna xo arê bidê û şêrê zozanan. Eke uca de hewa xirab bibo, ma do şêrê herêmêk bîn. Heme bar serê mile cinîyan de yo, ma her çîyî kenê. Xeymeyan ra bigîrê hera çirkerdiş, pewtişê nanî ra bigîrê heta weyekerdişê tutan. Şewe heywanê ma çerênayîş ra yenê û ma reyna înan çir kenê. Ma par herêma Herekolî de bî. Dest bi bombardûmankerdişî kerdî la çîyo ke ma bikerê çinî bî. Ma xeymeyanê xo de manenê heta ke bombardûman peynî bibo."