Marta Somek

 

STENBOL - Avûkata Baroyê Huqûqî yê Asrînî Suzan Akîpaye muracato ke semedê Rayberê PKKyî Abdullah Ocalanî CPTyî rê kerdî ercnaye û vat: “Semedo ke berpirsîyarî bigîro o wext rewna derbaz bîyo. CPT bi nê nizdîbîyayîşî paştîdayîş dano bêhuqûqîya ke yeno kerdiş û beno ortaxê tecrîdî.

 

Tecrîdo girankerde yê serê Rayberê PKKyî Abdullah Ocalanî ke 26 serrî yo Girawa Îmraliyî de yeno tepiştiş û 36 aşmî yo ci ra tu xeberêke nîna girewtiş, açarîya "incommunicado", yanî nêronayîşê têkilîye. Vera heme muracatan û cehdkerdişanê avukat û keyeyî seba pêvînayîşê bi Rayberê PKKyî reyde 36 aşmî yo tu xeberêke nîna girewtiş. Avûkatê Buroyê Huqûqî yê Asrinî ke avûkatîya Abdullah Ocalanî kenê, semedo ke bi Rayberê PKKyî û muwekîlê xo yê bîn ke Îmraliyî de yê Omer Hayrî Konar, Hamîlî Yildirim û Veysî Aktaşî reyde têkilî ronê, hewte de 2 reyan muracatê Serdozgerîya Komare ya Bursaye û Mudirîya Înfazî ya Îmraliyî kenê. La seba nê muracatan cewabê baş ya zî xirab nîno dayîş û pêvînayîş bi bahaneyê vengan yê sey "cezaya dîsîplînî" hetê Dadgerîya Înfazî ya Bursaye ra bi hawayêkê sîstematîk yenê astengkerdiş. 

 

Avûkata Buroyê Huqûqî yê Asrînî Suzan Akîpa derheqê pêvînayîşan û nizdîbîyayîşê Komîteya Vernîgirewtişê Muameleyo Xirab û Îşkenceyî ya Ewropa (CPT) de ercnayîş kerd. 

 

Muracatê CPTyî 

 

Suzane derheqê muracatê înan ê CPTyî de wina vat: “Seke rayaumûmî zî zano, Baroyê Huqûqî yê Asrinî tewr peynî CPTyî reyde pêvînayîş pê ard. Nê pêvînayîşî de ame vatiş ke vera heme muracatan zî no nizdîyê 3 serrî yo ke tu xeberêke Îmraliyî ra nîna girewtiş û na rewşe komelî xeylê fikarin kena. Grevê vêşanîye ewro nizdîyê 100 zîndananê Tirkîya de dewam keno û Nobedê Edaletî zî teber de dewam kenê. Dewamê nê pêvînayîşî de ame waştiş ke CPT demêk tewr kilm de raporê xo yê derheqê zîyaretê serra 2022yî de eşkera bikero û hemverê na rewşa mutleq a tecrîdî de, zîyaretê Zîndanê Îmraliyî bikero. Derheqê zîyaretê peynî yê CPTyî de tu malumatêk nêame dayîş. Ame vatiş ke pêvînayîşê ke bi dewleta tirkan reyde ameyî kerdiş, nêeşkenê bi avûkatan reyde bêrê parekerdiş. La dîyar kerdî ke Îmrali rojeva înan de yo.”

 'Hêvîya tewr pîl zîyaretê Îmraliyî yo' 

 

Suzane ard ziwan ke CPT wayîrê selahîyetanê zaf hîrayan o û wina vat: “Heqê ci est o ke bikewo her raşteyê zîndanan û bi asanî kontrol bikero. Coka ra hêvîya tewr pîl a huqûqnas û komelî no yo ke mekanîzmayê winasî ke bahaneyê awankerdişê vernîgirewtişê îşkenceyî yê, zîyaretê Îmraliyî bikero, cayê tewr tarî yê îşkence û çinîbîyayîşê têkilîyan o. No zî berpirsyarîya bingeyîn a CPTyî ya."

 

 'CPT bi nê nizdîbîyayîşê xo bêhuqûqî keno' 

 

Suzane dîyar kerd ke Zîndanê Îmraliyî de rejîmêk tecrîdî yê bêmaben yeno rayîr ra berdiş û vat: “Na rewşe bi raporê CPTyî zî yenê tesdîqkerdiş. Hetê CPTyî ra zî yeno zanayîş ke vera tespît û peşnîyarê CPTyî yê derheqê tecrîdî de, tecrîdê serê Birêz Ocalanî her ke şino xorî beno û CPT zî zano ke dewleta tirkan na babete de goreyê qanûnan tênêgêrena. Coka ra ganî CPTyo ke hetê têkoşînê heqê merdiman de wayîrê cayêk muhîm o, ganî berpirsîyarîya xo bigêra serê milê xo. CPT bi xo vat 'Zîndanê Îmraliyî her tim rojeva ma de yo'. Nêgirewtişê babeta Îmraliyî yê bernameyê xo yê Tirkîya nîno qebulkerdiş. CPT zî bi nê nizdîbîyayîşê xo bêhuqûqîyan keno. Mîyanê nê caardişan de para CPTyî zî est o.” 

 

Xebatê huqûqî do dewam bikerê 

 

Suzane ard ziwan ke her tim CPTyî ra hêvî û waştişê înan est o û vat: “Nê waştişê xeylê heqdar û meşru yê. Raporê zîyaretê peynî yê serra 2022yî zî nêame eşkerakerdiş. Waştişê ma do dewam bikero. Heme muracatê ke heta nika ameyî kerdiş, xebatê serê bingehê neteweyî û mîyanneteweyî yê seba wedaritişê qedexeyê pêvînayîşê serê avûkatan do dewam bikero.” 

 

Muracatê dezgehê sivîl bêcewab manenê! 

 

Suzane derheqê muracatê 14 dezgehê sivîl ke rêxistinê heq û huqûqî ra pê yenê de zî malumat da û wina dewam kerd: “12ê Çeleyî de seba CPTyîşêro Îmraliyî cigêrayîş bikero, nê muracatî CPTyî rê ameyî kerdiş. La heta nika tu cewabêk nêame dayîş. La vera heme vengê dezgehê sivîl, CPTyî ekse hêvîyan reyna zî raporê xo yê peynî yê serra 2022yî eşkera nêkerd û zîyaretê peynî de nêşî Zîndanê Îmraliyî.”

 

'Birêz Ocalan mifteyê çareserîye yo' 

 

Suzane dîyar kerd ke mifteyê çareserîye Abdullah Ocalan o û vat: “Tecrîdo ke Îmraliyî de dewam keno, heme huqûqê Tirkîya tesîr keno û dîyar keno. No qanûnê înfazî ke reya yewine tîya de ame caardiş û zîndananê bîn zî dîyar o. Ganî rewşa Îmraliyî hetê heqanê merdiman de zî nêra qebûkerdiş. Ganî avûkat û pawitoxê heqanê merdiman nê bêhuqûqîya serê Ocalanî qebûl nêkerê. No tecrîd tena zîndanan de nê, heme raşteyan de vila bîyo. Çîyo tewr muhîm zî şar tecrîdo mutlaq ke dewam de zî birêz Ocalanî ke Îmraliyî de yo mojna û dîyar kerd ke adresê çareserîye yo û mifteyê çareserîye yo.”