Dîlan Babat

 

ŞIRNEX - Namzeta hemşaredarîya Hezexî ya DEM Partîye Turkan Kayira ke bi serran verê cu bi dayîka xo reyde herra xo ra vejîyabî, 39 serrî ra tepîya agêraye û rayîrberîyê herêmî de bi namzed. Turkane da zanayîş ke do cuyêke ke heme şar bieşkê tede biciwîyê pîya awan bikerê. 

 

Suryanîyê ke yew şarê qedîm yê tarîxê Mezopotamyaye yê, sey şarê kurdî û xeylê bawerîyê bîn, nasnameyê înan çinî ame hesibnayîş, bi qirkerdiş, asîmîlasyon û çinî hesibnayîşî reyde ameyî rî bi rî. Zafaneyê suryanîjan polîtîkayê îqtîdarî vera koç kerdî û yê mendî zî lebate ame kerdiş ke bêrê asîmîlekerdiş. La suryanîyê ke fek têkoşînê xo ra nêverdayî, dimayê serran tepîya agêrayî herra xo.

 

13 serrîya xo de kewte rayîrê koçberîye 

 

Nê suryanîjan ra yewe zî Turkan Kayire ya. Turkane Partîya Têduştî û Demokrasîyî yê Şaran (DEM Partî) ya Hezexî sey namzeta hemşaredarîye ameye weçînayîş. Turkana ke heta 12 serrî Hezex de manena bi dayîk û waya xo ya nêweşe reyde koç kena. Turkana ke vana ez nêwazena tîya terk bikera semedo ke dayîka aye tena bî, koç kena. Turkane herra xo vîra nêkena û rihê demê newe zerrîya xo de hewênena. 

 

Agêraye serê kokê xo 

 

Turkan û keyeyê xo Swîsre de bi ca benê. Dimayê mektebî zewecîyena û hîrê tutê aye yenê dinya. Turkane 23 serrî ra tepîya serra 2004î de yena Hezex. Turkane wina vana: “Herra ma bê wayîr ameya verdayîş. Baş nêewnîyayî herra ma. Cuya ke şar heq nêkeno meşru ameybî dîyîş. Hezex êdî kewtêne hewnanê mi. Mi 23 serrî pay nêda serê herra xo. Mi lewna herra xo û ez bermaya.” 

 

‘Ez xerîbê na herre nîya’ 

 

Turkana ke serra 2019î de bi temamî agêrena Hezex, binê banê DEM Partîye de bena wayîrê îdîayê rayîrbera Hezexî û bena namzeta hemşaredarîye. Turkane wina vat: “Babeta namzetîye de xeylê fikirîyaya. 39 serrî ez Ewropa de ciwîyaya û ameya tîya. Coka ra îdîayêk winasî de bîyayîş asan nîyo. Wexto ke ez newe ameya mi rewşa herra xo dî, mi qerar da ke ez nê karî bikera. Merdim şaş mendî. La şar paştîdayîş da mi. Ez xerîbê na herre nîya. Ez bi eslê xo tîya ra ya. Ez cinîyêk suryanî ya. Ez qet xo sey nîjadêk tay nêvînena. Ez na herre ra ya. Xo xerîb hîs nêkena.”

 

Projeyê Hezexî 

 

Turkane da zanayîş ke proseso ke Swîsre de bî, raşteyê sey têkoşînê vera şîdetê serê cinîyan, zîhnîyetê cînsîyetê komelî de xebatan rayîr ra berda û derheqê projeye xo yê seba Hezexî de wina vat: “Seba ma çîyo esasa no yo ke ma Hezexî bikerê bajarê cinîyan. Heta ke cinî azad nêba komel zî azad nêbeno. Ma do dest bi perwerdehîyê hişmendîye bikerê. Ma do taxan de bi cinîyan reyde dewreyê atolyeyan pê bîyarê. Hetê ekonomî û îstîhdamê cinîyan de projeyê ma est ê. Cinîyê ke şîdet dîyî do hetkarîya psîkologî bigîrê. Seba ke cinî azad biba, vatişê xo vaja ma do bixebetê.”

 

‘Ma do Hezexî newe ra awan bikerê’ 

 

Turkane da zanayîş ke qezaya Hezexî de hema hema tu darêke çin a û ard ziwan ke do raşteyê şînayî zêde bikerê, xebatê ramitişê daran bikerê. Turkane wina qiseykerdişê xo peynî kerd: “Ma do seba heywanê teberî zî bixebetê. Problemê rayîrî est o. Wexto ke varan vareno her ca beno çamur. Ewil ma do rayîran virazê. La na babete de lazimîya ma bi hetkarîya şarê ma est a. Ez seba şarê Hezexî spas kena ke hetê mi de tercîhê xo kerd. Ma do Hezexî bi hezexîjan reyde newe ra awan bikerê.”