Oznûr Deger

 

MÊRDÎN - Dayîka Aştîye Besna Gunaya ke Nobeta Edaletî de ca gêna, Rayîr ra Şîyayîşê Azadîye ercnaye û vat: “Vera teda û zilmî de rayîr ra şîyî. Şîyî kam ca şar zî bi înan reyde şî. Kesê ke bi înan reyde rayîr ra şîyî têduştî, azadî û edalet qîrayî.” 

 

Zîndanan de 27ê Teşrîna Peyêne ya 2023yî bi waştişê azadîya fîzîkî ya Abdullah Ocalanî û çareserîya problemê kurdî çalakîyê grevê vêşanîye dîyayî destpêkerdiş û çalakîyê grevê vêşanîye 3 aşme xo pey de verda. Merdime tepişteyan û Dayîkê Aştîye zî dimayê grevî xeylê bajaran de Nobetê Edaletî dayî destpêkerdiş. Nobetê xeylê bajaran dewam keno. Sewbîna 1ê Sibate de çalakîya "Rayîr ra Şîyayîşê Pîl ê Azadîye" pê di baskan Wan û Qersî ra dîya destpêkerdiş û 15ê Sibate de Amara de peynî bî. 

 

Sere de Kurdistan û her ca de seba peynî ardişê tecrîd û azadîya fîzîkî ya Abdullah Ocalanî çalakî pê yenê. Dayîkê Aştîye yê ke Nobeta Edaletî de yê, derheqê çalakîya xo ya ke dewam kenê û rayîr ra şîyayîşê azadîye de ercnayîş kerdî.

 

‘Wa Rayîr ra Şîyayîşê Azadîye bibo rayîr ra şîyayîşê serkewtiş û têduştî’ 

 

Dayîya Aştîye Nafîye Demîra ke Nobeta Edaletî ya Mêrdînî de ca gêna, da zanayîş ke ganî dayîkî paştîdayîş bidê nobete û vat: “Ma wazenê serekê ma û şarê ma azad bibo. Ma wazenê tecrîdê serê serekê ma peynî bibo. Rayîr ra Şîyayîşê Azadîye pê ame. Ez raywanan pîroz kena. Ma zî Mêrdîn, Nisêbîn û Qoserî ra tewrê rayîr ra şîyayîşî bîyî. Ma seba serekê xo rayîr ra şîyî. Wa rayîr ra şîyayîşê azadîye bibo rayîr ra şîyayîşê serkewtiş û têduştîye.”

 

‘Vera teda û zordarîyan de rayîr ra şîyî’ 

 

Dayîka Aştîye Besna Gunaye zî ard ziwan ke seba azadîya Abdullah Ocalanî dest bi Nobeta Edaletî kerda û vat: “Rayîr ra Şîyayîşê Azadîye pê 75 kesan dest pêkerd. Raywan 15 rojan rayîr ra şîyî. Vera zilm û tedaye de rayîr ra şîyî. Her kes bi înan reyde rayîr ra şî. Kesê ke pêşwazî kerdî zî azadî û edalet qîrayî. Tutê ma zî grevê vêşanîye de yê. Waştişê ma têduştî û yew o. Ma nobete seba tutanê xo û serekê xo da destpêkerdiş. Heta ê azad nêbî ma do nobeta xo dewam bikerê. ma wazenê tutê ma serbest bêrê verdayîş. Wa heme dadî paştîdayîş bidê nobete. Ma do têkoşînê xo heta peynî bidê.”