AMED - Hemsereka OHDyî ya Amedî Gîzem Mîrane da zanayîş ke amancê zêdekerdişê tîpê S û Yyî polîtîkayê tena verdayîşî yo û vat: “Ganî bi lezkî awankerdişê S û Yyî bêrê vindarnayîş û vengkerdiş.” 

 

Zîndananê Kurdistan û Tirkîya de şertê tepişteyê sîyasî her ke şino zehmetin beno û tecrîd yeno rayîr ra berdiş. Îqtîdar nika plan keno ke zîndanê tîpê S û Yyî zêde bikero û bi tecrîdê serê tepişteyan sîstemê cezakerdişî awan bikero. Nê zîndanan de kapasîteya înan 300-400 yo, tepişte tede tîje, roje nêvînenê û nêeşkenê yewbînan bivînê û cuye ra yenê îzolekerdiş. Komîsyona Zîndanan a Komeleya Huqûqnasê Hemdemî (ÇHD) derheqê zîndanan de serra 2023yî de rapor weşana û goreyê raporî Tirkîya de tewr tay 16 asayîşê berzî est ê, 4 heb yê tîpê Y û 6 zî tîpê S est ê. Goreyê raporo ke ame dîyarkerdiş mîmarîya tîpê Yyî yê bînan ra cîya yo û goreyê tecrîd û xesp û binpaykerdişan ameyo awankerdiş. 

 

Hemsereka Komeleya Huqûqnasê Seba Azadîye (OHD) Gîzem Mîrane derheqê zîndanê tîpê S û Yyî de ercnayîş kerd.

 

‘Ma muracatê dezgehê dewlete kenê’ 

 

Gîzeme da zanayîş ke binpaykerdişê heqan her ke şino zêde beno û nizdî ra bi tepişteyan reyde eleqedar bena. Gizeme bale ant serê grevê vêşanîye û vat: “Grevê vêşanîye bi waştişê çareserîya probleme kurdî û peynîkerdişê tecrîdê serê Abdullah Ocalanî dîya destpêkerdiş. Ma zî sey komele ge-ge derheqê rewşa tepişteyan de zîndanan zîyaret kenê û raporan amade kenê. Na babete de ma muracatê dezgehê dewlete kerd.”

 

‘Hucre roje nêvînenê’ 

 

Gîzeme dîyar kerd ke tîpê S û Yyî zêde benê û vat: “Nê zîndanî Tîpê Fyî ra hîna giran kewtî rewşa rejîmêk înfazî. Tîpê S û Yyî de îzolasyon yeno amanckerdiş. Hucre roje nêvînenê. Peynîya hucreyan bi hawayêkê ke roje nêvîna ameyî viraştiş. Şibakê hucreyan zî goreyo ke roje tay dekewa zerre ameyî viraştiş û bi telan ameyî piştiş. Seba heme tepişteyan saetêk û nîme heqê hewayî yeno dayîş. La qanûnan de zî zaf zelal yeno vatiş ke vîşêrê kesê ke muebetê giran girewtî, serê sibayî ra heta hûmartişê şewe berê hewagirewtişî yenê akerdiş.”

 

‘Pêvînayîş yenê astengkerdiş’ 

 

Gîzeme ard ziwan ke zîndanê S û Yyî seba tenaverdayîşê merdiman ameyî viraştiş û vat: “Wexto ke tîpê S û Yyî ra tepişteyan sewqê nêweşxane yan zî roniştişê dewaye kenê bi wesayîtê rîngî yê yew kesî benê. Nê zîndanî bi temamî serê îzolasyonî de ameyî awankerdiş û esasê ci de sîstemê tecrîdî yo. Nê zîndanî cayê duran de ameyî awankerdiş. Tepişteyan ser de tedaya psîkolojîk yena kerdiş. Pêvînayîş bi hawayêkê cidî yene astengkerdiş. Xeylê keye şertan vera nêeşkenê xo biresnê zîndanan.”

 

‘Caardişê teberê merdimîye’ 

 

Gîzeme amancê zêdekerdişê tîpê S û Yyî ercanaye û wina vat: “No sucê merdimîye yo. Rayîr vernîya texrîbatanê girdan akenê. No demo ke vernîya sîyasetê demokratîke ameyo girewtiş de xeylê binpaykerdişê heqan welat de yenê ciwîyayîş. Merdim asayîş de xo hîs nêkeno. Tîpê S û Yyî parçeyê nê çîyî yê. Zîndanê Tîpê S û Yyî serê rih û bedene merdiman de texrîbatê gird virazenê.”

 

‘Ganî awankerdişê nê zîndanan bêro vindarnayîş’ 

 

Gîzeme da zanayîş ke nê zîndanê tesîrêk gird serê tepişteyanê nêweşan de kenê û vat: “Nê zîndanî roje nêvînenê. Hewa nêgênî. Hucreyî bi nemin ê. Cile înan zuha nêbena. Amancê zêdekerdişê tîpê S û Yyî polîtîkayê tenaverdayîşî yo. Ganî bi lezkî awankerdişê tîpê S û Yyî bêrê vindarnayîş û bêrê vengkerdiş.”