Şehrîban Aslan

 

AMED - Parlamentera DEM Partîye ya Wanî Gulderen Varliye bale ant serê tecrîdê giran ê serê Rayberê PKKyî Abdullah Ocalanî û vat ke nameyê çareserîya Rojhelatê Mîyanênî Abdullah Ocalan o. 

 

9ê Teşrîna Verêne ya 1998î de hemverê Rayberê PKKyî Abdullah Ocalanî de komployê mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdê giran de yeno tepiştiş. 35 aşmî yo tu xeberêke ci ra nîna girewtiş. Vera tecrîdî û seba azadîya Abdullah Ocalanî 10ê Teşrîna Verêne de 74 merkezanê dinya de bi sloganê "Abdullah Ocalanî rê azadî, problemê kurdî rê çareserîya sîyasî" kampanya dîya destpêkerdiş. 27ê Teşrîna Peyêne de zî zîndananê Kurdistan û Tirkîya de grevê vêşanîye bi eynî taleban dîya destpêkerdiş. Bi sloganê “Seba edaletî ma tecrîdî bişikinê, seba aştîye ma bibê vengê zîndanan” Wan, Amed, Mêrdîn, Êlih, Mêrsîn, Edene, Stenbol û Îzmîr de bî bi eynî taleban çalakîya "Nobeta Edaletî" dîya destpêkerdiş. 

 

1ê Sibate de bi eynî waştişan "Rayîr ra şîyayîşê Pîl ê Azadîye" bi di baskan Wan û Qersî ra destpêkerd. Parlamentera Partîya Têduştîye û Demokrasîyî (DEM Partî) ya Wanî Gulderen Varliya ke rayîr ra şîyayîşê azadîye de ca gêna derheqê komplo û tecrîdî de qisey kerd. 

 

‘Serekwezîrê ê wextî zî sebeb persayîne’ 

 

Gulderene da zanayîş ke bi hemkarîya dewletan komployê mîyanneteweyî pê ame û vat: “Paradîgmaya Birêz Ocalanî hetê cuye ya, tede cinî, ciwan û xoza est a. Panzehîrê vera dewletê kapîtalîstî yo. Birêz Ocalan bi komployêk teslîmê Tirkîya ame kerdiş. Serokwezîrê ê wextî zî sebebe na rewşe persayîne. Problemê mabenê kurdan û tirkan esasê xo de serê Birêz Ocalanî xorî bî. Sîstemê Îmraliyî sîstemê mîyanneteweyî yo. 25 serrî yo tecrîdo giran est o la no bi zelalî asîyeno; nameyê çareserîya Rojhelatê Mîyanênî Birêz Ocalan o. ” 

 

‘Heqanê merdimîye nînê dayîş’ 

 

Gulderene dîyar kerd ke ewro dewleta tirkan, kurdan çinî hesibnena û wina dewam kerd: “Abdullah Ocalan na nuqta de çareserî yo. La tu çareserîyêk aver nêkeweno. Çike komplo bi hawayêkê mîyanneteweyî pê ame û hema zî dewam keno. Seba ke şerê mabenê kurdî û tirkan peynî bibo, tu çîyêk nîno kerdiş. Tecrîdî giran kenê û heqê merdimîye nînê dîyîş.”

 

 ‘Heq û metodê demokratîke rona raşte’ 

 

Gulderene dewamê qiseykerdişê xo de bale ant serê heq û metodê demokratîke ke Abdullah Ocalan seba problemê kurdî ronayo raşte û wina vat: “Tecrîdê giran ê serê Birêz Ocalanî tesîrêk serê heme hetan de keno. Bi bahaneyê koy, herre, kerra û merdimî kurdî yenê çinîkerdiş. Şer yeno girankerdiş. Problemê kurdî nîno dîyîş û ciwanî dinyaya xo bedelnenê. Ma rayîr ra şîyayîşêk azadîye da destpêkerdiş. Dewlete bi israr bêçareserîye ferz kena û xîret kena ke vernîya ma bigêra. Ganî hem şarê kurdî û hem zî şarê tirkî kişta yewbînan de bî. Îqtîdar tena xo fikirîyeno. Ciwanan, cinîyan, kedkaran nêfikirîyeno. Ma caardişê şerê taybet vînenê. Fuhuş, tiryak û polîtîkayê bînî. Feqîrî giran bena. îqtîdarêk ke vera nînan de çim û goşanê xo girewto est o.”

 

 ‘50 serrî yo ma têkoşîn kenê’ 

 

Gulderene wina qiseykerdişê xo peynî kerd: “Seba çareserîya probleme kurdî, game nîna eştiş û tecrîd yeno dewamkerdiş. No bêçareserî giran keno. Bi 50 serrî yo ma têkoşînî rayîr ra benê. Xîretkerdişê înan çareserîyêk pê nêano. Ganî hîmê demokratîke de prosesêk bêro destpêkerdiş. 1ê Sibate de ma Rayîr ra Şîyayîşê Pîl ê Azadîye da destpêkerdiş. Têkoşînêk vera tecrîdî xora estbî. No rayîr ra şîyayîş de amanc û qerar pîl bî. Ez zî veng kena; Birêz Ocalan destê aştîye yo. Ganî veng bidîyo nê vengî. Birêz Ocalan muxatab o û ganî ci reyde bêro roniştiş û prosesêk demokratîke bidîyo destpêkerdiş.”