DÊRSIM - Endam û îdarekarê DEM Partî ke waştêne  şêrê Erzîngan û ameyî astengkerdiş dîyar kerdî ke berpirsyarê bobelatê Îlîç de qewimya AKP yo. 

 

Vizêr qezaya Îlîçî ya Erzînganî de madenê zerdî de hezaz virazîya. Endam û îdarekarê Partîya Têduştîye û Demokrasîyî yê Şaran (DEM Partî) zî waştî şêrê Erzîngan la ameyî astengkerdiş. Nê ser de partiyijan vernîya awanîya xo de eşkerayîye dayî. Hemserekê DEM Partîye yê Dêrsimî Ozcan Gurtaş vat ke destûr nêameyo dayîş ke bajarî ra vejîyê. 

 

Ozcanî, wina vat: “No astengkerdiş zî şibîyeno astengkerdişê semedê hedîseyê bînî. Semedê pîlkerdişê sermayeyî terefgirê îktîdarî, serê cografya ma talan kenê. Wazenê netîceyê nê talanî rayaûmumî ra biniminê.” 

 

Dewam de Ozcanî bale ant serê siyanûrê dimayê bobelatî û qiseykerdişê xo wina qedêna: “Ganî no ocaxê madenî bêro padayîş. Wayîrê nê madenî şîrketê kanadayî Angagold o û şirîkê înan zî Çalik Holdîng o. Berpirsyarê nê bobelatî îqtîdarê AKPyî yo ke çimanê xo nê karesatî rê padayî.”