Marta Somek

 

STENBOL - Hemsereka DEM Partîye ya Stenbolî Gonca Yangoze da zanayîş ke çarçeweya serrgêra komployê mîyanneteweyî yê hemverê Rayberê PKKyî Abdullah Ocalanî de keye bi keye, tax bi taxe gêrenê û xebatan rayîr ra benê. Goncaye wina vat: “Ma dimayê 15ê sibate berê ke aştîye rê abenê wazenê. Ma têkoşînê xo na hete de rayîr ra benê. Ma venga heme şaran kenê ke wayîrê dewaya xo bivejê û pîya aştîye bîyarê.” 

 

9ê Teşrîna Verêne ya 1998î de hemverê Rayberê PKKyî Abdullah Ocalanî de komployê mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdê giran de yeno tepiştiş. 35 aşmî yo tu xeberêke ci ra nîna girewtiş. Vera tecrîdî û semedê azadîya Abdullah Ocalanî 10ê Teşrîna Verêne de 74 merkezanê dinya de bi sloganê "Abdullah Ocalanî rê azadî, problemê kurdî rê çareserîya sîyasî" kampanya dîya destpêkerdiş. 27ê Teşrîna Peyêne de zî zîndananê Kurdistan û Tirkîya de grevê vêşanîye bi eynî taleban dîya destpêkerdiş. Bi sloganê “Seba edaletî ma tecrîdî bişiknê, seba aştîye ma bibê vengê zîndanan” Wan, Amed, Mêrdîn, Êlih, Mêrsîn, Edene, Stenbol û Îzmîr de bî bi eynî taleban çalakîya "Nobeta Edaletî" dîya destpêkerdiş. 1ê Sibate de zî “Rayîr ra Şîyayîşê Pîl ê Azadîye” Qers û Wanî de dest pêkerd û 14 rojî yo rayîr ra şîyayîş dewam keno. 

 

Partîya Têduştîye û Demokrasîyî (DEM Partî) bi çalakî û bernameyê cîya cîyayî paştîdayîş dana hemleya ke dîyaye destpêkerdiş. Hemsereka DEM Partîye ya Stenbolî Gonca Yangoze derheqê komployo ke 25 serrî xo pey de verda de ajansê ma rê qisey kerd. 

 

Vera tecrîdî de têkoşîn 

 

Goncaye wina vat: “Tecrîdê serê Birêz Abdullah Ocalanî vernîya azadî, demokrasî û aştîye gêno. Tecrîd sucê merdimîye yo. Hemverê Rayberê şarê kurdî ke prosesê çareserîye rayîr ra beno, aştî û azadîya welatî wazeno de çîyêk winasî pê yeno. Ma heme polîtîkayê şer, feqîrî, fatureyê krîzê ekonomîye ya ke şarî rê yena birnayîş bi nê tecrîdî reyde girê danê. Heqê ke ameyî destfînayîş destê ma ra yenê girewtiş. Dormeyê şerî de xurtkerdişê faşîzmî îqtîdarî hîna hêz keno. Ma hîşmendîya nê de têkoşînê xo rayîr ra benê.” 

 

Keye bi keye gêrenê 

 

Goncaye bale ant serê Rayîr ra Şîyayîşê Pîl ê Azadîye û wina dewam kerd: “Ma bi fîîlî uca de nêbê zî ma paştîdayîşê xo danê, ma parçeyêk nê rayîr ra şîyayîşî yê. Nobetê Edaletî û grevê vêşanîye est ê. Ma paştîdayîş danî nê çalakîyan, rojeva ma de nê est ê. Seba ke ma vengê înan bidê eşnawitiş ma tax bi taxe, raşte bi raşte, keye bi keye gêrenê û derheqê şikitişê tecrîd û azadîya fîzîkî ya Abdullah Ocalanî de xebatan rayîr ra benê. Rayîr ra Şîyayîş, Nobetê Edaletî, grevî do heta 15ê Sibate dewam bikerê. Ma do çalakîyê xo na çarçewaye de bê maben rayîr ra berê.”

 

 'Têkoşîn do dewam bikero’ 

 

Goncaye wina ard ziwan: “Ma parçeyeke nê têkoşîno ke bi waştişê azadîye yeno rayîr ra berdiş ê. Heta netîce nêro girewtiş do têkoşînê ma dewam bikero. Ma feqîrî û polîtîkayê şerî nêwazenê. Ma nêwazenê cenazeyî bêrê. Ma wazenê nê welatî de azadî û çareserî pê bêrê. Ma no het ra têkoşînê xo dewam kenê.”

 

 'Çareserî Abdullah Ocalan o' 

 

Goncaye qiseykerdişê xo wina peynî kerd: “Seba aştîye ganî tecrîd bêro şikitiş. Ganî bi muxatabê nê Birêz Ocalanî reyde na rewşe bêra çareserkerdiş. Lîderêk ke vano ma pîya têkoşîn bikerê, est o. Vera nê de ma pîya rayîr ra şinê. Ma venga heme kesî û akademîsyenan kenê. Huqûqnas, akademîsyen, rêxistinê komelê sivîl veng kerdî ke veng bidê nê waştişan. Ma zî venga heme şarê xo kenê ke wayîrê na dewaye bivejê.”