Rozerîn Gultekîn

 

AMED - Dadîya Aştîye Afîfe Kartala ke çarçeweya hemleya "Abdullah Ocalanî rê azadî, problemê kurdî rê çareserîya sîyasî" de tewrê Nobeda Edaletî bî, Komploya 15ê Sibate ercnaye û vat: "Ma cayê xo raşteyan de girewt. 25 serrî yo ez mîyanê têkoşînî de ya. Venga şarê ma kena û vana ke sere çewt mekerê, wirzê serê payan." 

 

Rayberê PKKyî Abdullah Ocalan 9ê teşrîna verêne ya 1998î de Sûrîye ra vejîya û 15ê Sibata 1999î de bi komployê mîyanneteweyî teslîmê Tirkîya ame kerdiş. Serê komployî ra 25 serrî derbaz bî. Abdullah Ocalan Îmraliyî de yeno tepiştiş, wexto ke ardî Tirkîya ra nata binê tecrîdêk giran de yo û 35 aşmî yo ke tu xeberêke ci ra nîna girewtiş. 15ê Sibate hetê şarê kurdî ra sey ‘Roja Sîya’ yena binamekerdiş û çalakîyê ‘Şima nêeşkenê roja ma tarî bikerê’ ke dimayê komployî dest pêkerdbî 25 serrî yo dewam kenê. Tewr peynî hemleyê bêhûmare serra 99î ra nata ameyî eştiş û nika zî kampanyaya “Abdullah Ocalanî rê azadî, problemê kurdî rê çareserîya sîyasî” ke 10ê Teşrîna Verêne ya 2023yî de ame destpêkerdiş bi çalakîyê cîya cîyayan ke 74 merkezan de dîyayî destpêkerdiş, dewam kenê. Çarçeweya kampanyaye de dostê kurdan xeylê çalakîyan viraştî, zîndananê Tirkîya û Kurdistanî de zî grevê vêşanîye dîyayî destpêkerdiş, çarçeweya eynî kampanyaye de hetê merdimê tepişteyan ra Nobeda Edaletî dîya destpêkerdiş. 

 

Dadîya Aştîye Afîfe Kartala ke bi wesîleya serrgêra 15ê Sibate komployê mîyanneteweyî ke vera Abdullah Ocalanî de hetê Tirkîya ra dîya destpêkerdiş û nika Nobeda Edaletî ca gêna, ercnayîş kerd. 

 

Qorîcîtî qebûl nêkerd, dewa înan ame veşênayîş 

 

Afîfe 57 serrî ya û 30 serrî yo xover dana. Dewa Qizlale ya qezaya Farqînî ya Amedî de dadîya xo ra bîya. Afîfe hema tute bîya ameya zewecnayîş, hetê dewlete ra tedayê giran dîya. Afîfeye ke dewa aye serra 1993yî de bi bahaneyê ke qorîcîtî qebul nêkerdî ame veşênayîş, dima ra bi keyeyê xo reyde ameye merkezê Amedî. Tedaya serê Afîfe û 4 tutanê aye dewam kerd. 

 

Têkoşîne û Muhammed 

 

Kênaya Afîfeye Tekoşîne xeylê yena destbendkerdiş û netîce de Tekoşîne serra 2011î de tewrê PKKyî bena. Têkoşîne dimayê tewrbîyayîşê têgêrayîşî yê 7 serran Licê de pêrodayîşêk de dinyaya xo bedelnena û cenazeya aye poşetêk de teslîmê keyeyê aye ameye kerdiş. La reyna zî dadîya Têkoşîne Afîfe roja merasîmê cenazeya kênaya xo de zî fek vatişê aştîye ra nêverda. Dimayê Têkoşîne, lajê aye Muhammed 19 serrî ya xo de serra 2017î de bi bahaneye îfadeyê şahido eşkera yeno tepiştiş û 22 serrî cezaya zîndanî ci rê yena birnayîş. Semedo ke Muhammed Zîndanê Girewte yê Tîpê Lyî yê Antalyaye de tepişte yo, Afîfe nêeşkena xeylê reyna şêra pêvînayîşê lajê xo. 

 

Nobeda Edaletî de têkoşînê xo dewam kena 

 

Afîfeya ke xeylê reyan raştê tedaye yena fek têkoşînê xo ra nêverdena, vera probleme xo yê weşîye hema hema her çalakîye de ca gêna. Afîfeye na rey çarçeweya kampanyaya "Abdullah Ocalanî rê azadî, problemê kurdî rê çareserîya sîyasî" de Nobeda Edaletî ya ke hetê merdimanê tepişteyan ra 4ê Kanûna 2023yî de Taxa Rezanî de awanîya DEM Partîye de dîya destpêkerdiş de têkoşînê xo dewam kena. 

 

'Ganî êdî mîyanê şarê xo de bo’ 

 

Afîfeye dîyar kerd ke aye cuya xo her tim bi têkoşînî derbaz kerda û komployê mîyanneteweyî yê 25 serrî yê vera Abdullah Ocalanî şermezar kerd. Afîfeye vat: “Çi heqê înan est o ke Serekatî teslîmê dewleta tirkan kerdî? Ez seba serekatîye kewta mîyanê têkoşînî. Ez wazena êdî çareserî û aştî pê bêrê. Wa zîndan ra bivejîyo û bêro mîyanê şarê xo. Eke o azad bibo, ma zî azad benê. Tutê ma serê şopê ci de yê, ma zî serê şopê tutanê xo de yê."

 

'25 serrî yo ma raşteyan de xover danê’ 

 

Afîfeye da zanayîş ke no 25 serrî yo komployê mîyanneteweyî dewam keno û Komîteya Vernîgirewtişê Muameleyo Xirab û Îşkenceyî ya Ewropa (CPT) zî hemverê nê komployî de bêveng mendo û vat ke no bêvengîye nîno qebulkerdiş. Afîfe wina dewam kerd: “3 serrî yo CPT pêvînayîş û raporê xo bi kurdan reyde pare nêkeno. Tena bi dewleta tirkan reyde pare keno. Ma zî nêzanê Ocalan weş o yan nê. Ma na çalakîye seba peynîkerdişê tecrîdî û azadîya şarê kurdî pê anê, ma sey dadîyê serkeşe na çalakîye virazenê. Ma baş zanê ke tersê Ocalanî vera rayîr nêdanê ke malumat ci ra bêro girewtiş. Ocalan hem seba şarê kurdî û hem zî seba tirkan eşkeno xeylê çîyan bikero. Tebîî, 25 serrî yo Abdullah Ocalan yeno tecrîdkerdiş, la ma zî 25 serrî yo raşteyan de yê û cayê xo mîyanê têkoşînî de gênê.” 

 

'Nika seba azadîya ci xover danê’ 

 

Afîfeye dîyar kerd ke dadî tutanê xo pawenê û zerrîya ma Ocalanî paweno û paştîdayîş dano. Afîfeye wina dewam kerd: “Ma serê şopê tutanê xo de yê. Ma aştî, asayiş û azadîye wazenê. Seba azadîya fîzîkî ya Ocalanî heme dinya xover dano. Eke Ocalan azad bibo do her kes azad bibo. La eke azad nêbo do no zilm dewam bikero. Ewropa ra zî ameyî zîyaretê nobeda edaletî. Kesê ke bêveng manenê dewlete pawenê. Eke heme kurdî xover bidê do çareserî pê bêra.”

 

'Ma do komployî puç bikerê’

 

Afîfeye qiseykerdişê xo yê peyênan de ard ziwan ke bi vistişê odeya yew kesî, yeno waştiş ke têkilîya Abdullah Ocalanî bi şarî reyde bêra birnayîş, la no 25 serrî yo têkilîya Abdullah Ocalanî bi şarî reyde nêameya birnayîş û vat: "Ma do heta peynî xover bidê. Ma nê rayîrî de merdî. 25 serrê bîn zî zîndan de bimano ma do xover bidê. Ma do komployî puç bikerê. Venga mi şarî rê no yo; sere çewt mekerê, wirzê serê payan. Ma do nobeda xo dewam bikerê. Rayîr ra şîyayîşo ke ameyo destpêkerdiş do bibo rayîr ra şîyayîşê azadî, aştî û têduştî."