STENBOL - Dadîyê Şemeyî aqûbetê Mehmet Nezîr Dumanî yê 31 serrî verê zîndan de ame vînîkerdiş persayî û dîyar kerdî ke ê do fek waştişê edaletî yê semedê pêro vînîbîyayeyan vera nêdê.

 

Dadîyê Şemeyî reya 985ine Raşteyê Galatasarayî de semedê aqûbetê merdimanê xo yê ke zîndan de ameyê vînîkerdiş û qetilkerdiş bipersê û failê înan bêrê muhakemekerdiş, kom bîyî. Dadîyê Şemeyî no hewte aqûbetê Mehmet Nezîr Dumanî persayî. Çalakîya ke Dadîyê Şemeyî, temsîlkarê Komeleya Heqê Merdiman (ÎHD) Şubeyê Stenbolî û Weqfê Heqê Merdiman ê Tirkîya (TIHV) zî amade bî, pankartê fotografê kesê ke destbendkerdişî de ameyî vînîkerdiş, ameyê wedaritiş.

 

Temsîlkarê TÎHVyî yê Stenbolî Ûmît Efe bi wendişî eşkerayîya çapemenîye dîyar kerd ke ganî dem semedê nimitişê sûcî nêro şuxilnayîş. Ûmîtî xîtabê meqamanê edlî kerd û vat, “Pêro qerarê qanûnî yê dosyaya Mehmet Nezîr Dumanî de ameyê girewtiş, wedarnê. Bi cigêrayîş û cipersayîşêk bi tesîr reyde rastî eşkera bikerê û edaletî misoger bikerê."

 

Çalakî de mektube cinîya Nezîrî ke Elmanya de ciwîyena, ame wendiş. Dimayê mektube Ûmîtî dîyar kerd ke ê do fek edaletî yê Mehmet Nezîr Duman û pêro vînîbîyayeyan vera nêdê û ard vîr ke ganî dewlete çarçewaya huqûqê unîversalî de têbigêra. 

 

Çalakîye dimayê qurnefîlan Raşteyê Galatasarayî de ameyî verdayîş û peynî bîye.