Rojda Aydin - Oznûr Deger

 

MÊRDÎN - Raywanê “Rayîr ra şîyayîşê Pîl ê Azadîye” Parlamentera DEM Partîye ya Colemêrgî Oznur Bartine dîyar kerd ke ganî wayîrê nê rayîr ra şîyayîşî bêro vejîyayîş û vat ke şar ver bi serewedarnayîşî ra şino. 

 

“Rayîr ra şîyayîşê Pîl ê Azadîye” ke waştişê “Rayberê PKKyî Abdullah Ocalanî rê Azadî û problemê kurdî rê çareserîya sîyasî” 1ê Sibate de bi di baskê Wan û Qersî destpêkerd, dewam keno. Rayîr ra şîyayîşê Azadîye ke herêma Serhadî ra ver bi Botanî û Botan ra zî resa Mêrdînî. Raywanê azadîye hetê şarî ra bi coş yenê pêşwazîkerdiş. 

 

Parlamentera Partîya Têduştîye û Demokrasîyî yê Şaran (DEM Partî) ya Colemêrgî Oznur Bartina ke mîyanê “Rayîr ra şîyayîşê azadîye” de ca gêna, xeylê bajar û qezayan de bi şarî reyde têkilî ronena, derheqê rayîr ra şîyayîşî de ercnayîş kerd.

 

‘Semedê cuyêke azad şar bi vengêk berz qîr keno’ 

 

Oznure dîyar kerd ke 1ê Sibate de bi di baskê Wan û Qersî dest bi rayîr ra şîyayîşî kerdî û vat: “Amancê rayîr ra şîyayîşî şikitişê tecrîdê serê Abdullah Ocalanî û çareserkerdişê problemê kurdî yê serê bingehê demokratîke yo. Destpêkerdişê rayîr ra şîyayîşî de vera tedayê sîstemî zî xoverdayîşêk xurt est o. Wayîrvejîyayîş û hîsêk gir dest bî. Bi nê moralî ma rayîr ra şîyayîşî xo dewam kerd. Wayîrvejîyayîş her ke şî gird bî. No waştişê hempar ê şarê kurdî û şaranê bindestan şikitişê tecrîdî yo. Şarê kurdî bi vengêk berz qîreno ke muxatab dîyarî ke no şer bêro vindarnayîş, problemê kurdî çareser bibo û pîya cuyêke azad awan bikerê. Bi taybetî Şirnex de xoverdayîşê vera polîtîkayê metîngerî bi zelalî dî. Ma eşkera dî ke ê şarî ra tersenê.”

 

‘Ma do biresê amancê xo’ 

 

Oznure ard ziwan ke vera tedayan zî Dadîyê Aştîye, cinî, ciwan, şar û esnaf bi temamî paştîdayîş danê rayîr ra şîyayîşî û wayîrvejîyayîşêk topyekun est o. Oznure wina dewam kerd: “Ma na bawerîye de yê ke ma do biresê amancê xo, çike paştîdayîşê şarî pey ma de yo. Semedo ke no rayîr ra şîyayîş bireso amancê xo tena şarê kurdî nê, ganî dezgeh û rêxistinê bînî zî tewr bibê. Amancêk hempar rest o. Rojhelatê Mîyanênî de xitimîyayîşêk est o. Semedê nê zî seba azadîya fîzîkî ya Birêz Abdullah Ocalanî û çareserîya problemê kurdî demêk lez de vengê hempar yeno berzkerdiş. Lazim o şarê ma nê rayîr ra şîyayîşî de ca bigîro û paştîdayîş bido ke ma pîya welatêke azad de biciwîyî û merg nêvirazîyo.”

 

‘Şar ver bi serewedarnayîşî ra şino’ 

 

Oznure qiseykerdişê xo yê peyênan de da zanayîş ke înan bi coşêk gird dest bi rayîr ra şîyayîşî kerd û no heyecan her ke şino qat qat zêde beno û wina peynî kerd: “Kombîyayîşê şarî de hêvîya şarî estbî. Bi moralêk ke ma şarî ra girewto rayîr ra şîyayîşê xo ma bi bawerîyêke gird dewam kenê. Ma zanê ke ma nê rayîr ra şîyayîşêk bi rûmet de yê. Raştî zî vatişê hîsê nê rayîr ra şîyayîşî zehmet o. Ganî êdî kes bêveng nêmano. Şar şîdet, teda û krîzê ekonomîye ra aciz bîyo û ver bi serewedarnayîşî ra şino. Semedê aştîyêke daîmî lazimî bi vengêke hempar est o. Ganî no rayîr ra şîyayîşî hîna xurt bibo û pîl bibo. Coka ra ganî her kes tewrê nê rayîr ra şîyayîşî bibo. Lazim o her kes paştîdayîş bido rayîr ra şîyayîşê semedê aştîya daîmî, semedê azadîye, semedê peynîkerdişê tecrîdî, semedê embazê ma yê grevê vêşanîye de yê, semedê dadîyê ma yê Nobeta Edaletî de xover danê.”