Oznûr Deger

 

RIHA - Merdima Rayberê PKKyî Abdullah Ocalanî ya ke Amaraye de ciwîyena Emîne Ocalane wina vat: “Her kes ci sey merdimêk baş qalî keno. Sey merdimêk têkoşer yeno vatiş. Heqanê cinîyan paweno.” Ferehnaz Ocalane zî vat ganî bi lezkî pêvînayîş bi Abdullah Ocalanî reyde bêro destpêkerdiş. 

 

Rayberê PKKyî Abdullah Ocalan 9ê Teşrîna Verêne ya 1998î de Sûrîye ra vejîya û 15ê Sibata 1999î de bi komployê mîyanneteweyî teslîmê Tirkîya ame kerdiş. Serê komployî ra 25 serrî derbaz bî û a roje ra nata Abdullah Ocalan Îmraliyî de binê tecrîdê giran de yeno tepiştiş. 35 aşmî yo tu xeberêke ci ra nina girewtiş. 

 

10ê Teşrîna Verêne ya 2023yî de bi sloganê "Abdullah Ocalanî rê azadî problemê kurdî rê çareserîya sîyasî" kampanya dîya destpêkerdiş. Çarçeweya kampanyaye de tepişteyan 27ê Teşrîna Peyêna 2023yî de dest bi grevê vêşanîye kerd. Dima ra keye zî teber de dest bi Nobeta Edaletî kerdî. 

 

Her cayê dinya de çalakî dewam kenê. Tewr peynî zî eynî çarçewa de 1ê Sibate de Qers û Wan de ‘Rayîr ra Şîyayîşê Pîl ê Azadîye’ dest pêkerd û bi coşêk pîl dewam keno. Rayîr ra şîyayîş do heta 15ê sibate dewam bikero. 

 

Dinge peynî yê raywanan do dewa Amaraye ke Abdullah Ocalan tede ame dinya bo. Merdimê Abdullah Ocalanî yê Amaraye komployê 15ê Sibate ercna.

 

‘Ma pîlanê xo ra eşnawit’ 

 

Emîne Ocalana (52) ke hema Abdullah Ocalanî nêdîya da zanayîş ke aye Abdullah Ocalanî pîlanê xo ra eşnawita û nas kerda. Emîneye eşkera kerd ke aye nizdîbîyayîşê 15ê Sibate vera hîsina û wina vat: “Ma wazenê pêvînayîş bêro kerdiş. Wa bi lezkî tecrîd bêro şikitiş. Wa keye û avukat şêrê pêvînayîş. Semedo ke pêvînayîş çin o, ma şikin ê. Her kes qalê ci keno. Vanê merdimêk zaf baş bî. Vanê merdimêk têkoşer bî û heqanê cinîyan pawitêne. Heqanê heme kesî pawitêne.”

 

‘Ganî tewrbîyayîşê rayîr ra şîyayîşî pîl bibo’ 

 

Emîneye bale ant serê Rayîr ra Şîyayîşê Pîl ê Azadîye û wina peynî kerd: “Semedo ke her kes fikrê Abdullah Ocalanî esas gêno, ci ra tersenê. Ganî her kes tewrê Rayîr ra Şîyayîşê Azadîye bibo. Girse çend gird bibo hende lez tecrîd bişikîyo. Ganî tewrbîyayîş xurt bibo. O azad nêbo ma zî azad nêbenê. Ganî tecrîd bi lezkî bêro wedaritiş. Keye pêvînayîş bikero.” 

 

Şewêke dewe de mend 

 

Ferehnaz Ocalane (75) zî da zanayîş ke mêrde û hîrê tutê aye Abdullah Ocalanî ra zaf tesîr bîyî û tewrê PKKyî bîyî, dima ra tutêk aye dinyaya xo bedelnaye û wina dewam kerd: “Mi reya ewil Abdullah Ocalanî wexto ke pîyê ci wefat kerdbî dî. O wext ame dewe û şewêke dewe de mend. Bi ciwanan reyde kombîyayîş kerd. Nika pêvînayîş nîno kerdiş. Ma hîsin ê. Ganî pêvînayîş bêro kerdiş."

 

‘Apoyî to rêxistin kerdo’ 

 

Ferehnaz dewamê qiseykerdişê xo de vat: “Dima ke mêrdeyê mi tewrê PKKyî bî îşkence bi mi kerdî. Ez berdêne îşkence û dimayê îşkenceyî tepîya ardêne. Mi kiştêne. Vatêne ‘Apo to rêxistin keno’. Mi zî vatêne ‘mi ey qet nedîyo, tena wexto ke pîyê ci rehmet kerd reyêk ame dewe mi dî’. Berê mi şikitî Wina dekewtêne keyeyê mi. Lajê mi tewr bî. Dima ra mêrde û kênaya mi tewr bîyî. Kênaya mi şehîd bî. Lajê mi yê bîn zî şî.”

 

‘Wexto ke ame tepiştiş ma ameyî dewe’ 

 

Ferehnaze 15ê sibate wina vat: “Ez a roje Bîrecukî bîya. Senî ma eşnawit ameyo tepiştiş ma ameyî dewe. Her cayê dewe pirrî polîs û leşker bî. Her ca qerebalix bî. Ma rewşa ci xeylê meraq kerd. Ganî no tecrîd bi lezkî peynî bibo.”