DÊRSIM - 8ine roja “Rayîr ra Şîyayîşê Azadîye yê Pîl” de raywanê ke resayî Dêrsimî tîya de hetê hezaran kesan ra ameyî pêşwazîkerdiş. Qiseykerdişê ke ameyî kerdiş de wina ame vatiş: “Nika wextê aştî û çareserîye yo. Bêrê ma veng bidê Abdullah Ocalanî ke seba aştîye şansêk o." 

 

8ine roja “Rayîr ra Şîyayîşê Azadîye yê Pîl” ke semedê azadîya fîzîkî ya Rayberê PKKyî Abdullah Ocalanî û çareserîya meseleya kurdî dîya destpêkerdiş de raywanê rayîr ra şîyayîşî resayî Dêrsim û ver bi merkezî kewtî rayîr. Tîya de hetê bi seyan kesan ra raywanî ameyî pêşwazîkerdiş. 

 

Serê pirda ke Gulistan Doku tewr peynî uca de ameye dîyîş eşkerayî 

 

 

Raywanî şîyî serê pirda ke Gulistan Doku tewr peynî uca de ameybî dîyîş û uca de eşkerayî dayî. Parlamentera DEM Partîye Kezîban Konukcuye tîya de wina vat: “Gulistan Doku tewr peynî tîya de ameye dîyîş. Seba ke ma aye yad bikerê ma tîya de vindertî. Vînîbîyayîşê Gulistane kolonyalîstîyê serê na herre nîşan dano. Her cayê welatî de cinî yenê qetilkerdiş. Her çend ke hende kamera bibê zî kiştoxî nînê dîyîş. Ma seba heme şaran azadî wazenê. Heta azadî bêra do rayîr ra şîyayîşê ma dewam bikero." 

 

Dimayê qiseykerdişan cinîyan qurnefîl tîya de rona.

 

Bi coşêke gird ameyî pêşwazîkerdiş 

 

 

Dekewtişê bajarî de raywanî bi coşêk gird ameyî pêşwazîkerdiş. Sloganê "Jin jiyan azadî", "Biciwîyo xoverdayîşê zîndanan" ameyî berzkerdiş. 

 

Dima ra raywanî ameyî Raşteyê Seyîd Rizayî. Parlamentera DEM Partîye Gulistan Koçyîgîte dîyar kerd ke serê herra Elî Şêr, Sakîne û Mazlûman de yê û vat ê vera zîhnîyeto ke vano meseleya kurdî çin a vejîyayî serê rayîr. Gulistane vat ke bibê vengê Birêz Ocalanî. 

 

Dima ra Hemsereka DBPyî ya Pêroyî Çigdem Kiliçgun Uçare da zanayîş ke seba azadîye rayîr ra şinê û vat ke Ocalan tena seba Kurdistanî nê seba heme dinya lîderêk muhîm o. 

 

Hunermendê NÇMyî tîya de bi deyîranê xo paştîdayîş dayî rayîr ra şîyayîşî û dimayê rayîr ra şîyayîşî de govende ame çarnayîş.