Rozerîn Gultekîn

 

AMED - Kordînatora Pêroyî ya Merkezê Cigêrayîşê Raşteyê Polîtîkî yê Komelî Yuksel Gençe weçînayîş ra ver derheqê tayînkerdişê qeyûman ke do tesîrêk senî serê tercîhê weçînitoxan de bikero, ercna. Yuksele da zanayîş ke bêçareserîya problemê kurdî tesîr rayê weçînitoxan de keno. 

 

Bajaranê Kurdistan de mabenê serranê 2016-2019î de di deman de qeyûm tayînê şaredarîyan ameyî kerdiş û îradeyê şarî ame xespkerdiş. No 8 serrî yo îradeyê şarî ameyo xespkerdiş û şaredarî hetê hemşaredarê ke ameyî weçînayîş nê hetê qeyûmê ke ameyî tayînkerdiş ra yenê rayî ra berdiş. Kurdistan de şar nika xo amade keno ke şêro serê sindoqan. Atmosferê weçînayîşî ke do 31ê Adare de pê bêro Kordînatora Pêroyî ya Merkezê Cigêrayîşê Raşteyê Polîtîk û Komelî Yuksel Gençe ercnaye.

 

‘Şar kewt atmosfere weçînayîşî’ 

 

Yuksele da zanayîş ke Kurdistan de goreyê demê verênan şar kewto atmosferê weçînayîşî û wina vat: “Weçînayîşê 2019î hetê herêmî ra xeylê bi motîvasyon û heyecan bî. Bi taybetî tayînkerdişê qeyûman ê serra 2016î ra nata weçînitox bi motîvasyonêk xurt îsrarê xo yê şaredarîyan de îlan kerdbî. 2015-2016î ra dima bi xerepnayîşê prosesê aştîye ra dima şikîyayîşêk vejîya raşte û tesîrê ci weçînayîşê 2019î de ame dîyîş. Nika hîssê şarê herême sey serra 2019î ‘ma qeyûman nêwazenê, ma red kenê, ma rayîrberîyê xo wazenê, wayîrê înan vejîyenê’ tena bi tesîr nîyo. Motîvasyonê nika ‘Şima se kenê bikerê ez tercîhê xo nêbedelnena’ serdest o û xo wina amade kenê.”

 

‘Di partî herême de bi tesîr ê’ 

 

Yuksele derheqê xebatê weçînayîşî ke pê ardî de wina vat: “Şima serra 2019î de raye da kam ci partî? Weçînayîşê 2023yî de şima da kamî? Ewro weçînayîşêk herêmî pê bêro şima do raya xo bidê kamî? Weçînayîşê pêroyî bibo şima raye danî kamî? Sebebê raydayîşê şima çi yo? Eke şima bê qerar bî sebebê ci çi yo? Herême de hema di partî DEM Partî û AKP bi tesîr ê. Weçînayîşê serra 2019î de se bibayêne zî lazimî estbî ke cewab bidîyo dewlete. Nika ma vînenê ke vera cewabdayîşê qeyûman, xizmet û kesê ke wazenê înan temsîl bikerê zêde bîyî.”

 

'Bêçareserî rayîrê weçînitoxan tesîr keno’ 

 

Yuksele dewamê qiseykerdişê xo de dîyar kerd ke bêçareserîya probleme kurdî, atmosfere sîyasî yê Kurdistanî zêde bîyo û dewam kerd: “Herême wayîrê tabanêke rêxistinkerde, polîtîk ya ke wazena nasnameyê xo bigêra ya. Bêçareserîya problemî serê cuya sîyasî û cuya komelkî de tesîr virazeno. Bi kilmî atmosferê sîyasî herême de analîzê prosesê sindoqan zî mumkun keno. DEM Partî û adetê sîyasî yo ke ci ra yeno her tim bi tedaye reyde ameyo rî bi rî. La weçînitoxî her tim vera tedaye de partîya xo de ca girewtî. Weçînitoxê DEM Partîye partîya xo ra paweyê pawitişê gamê somut û berardişê polîtîkayê xurt de yê. Weçînitoxî êdî nêvanê ‘Her şertî de partîya min a, ez raya xo dana xo’. Eynî wext de vanê ‘Wa kesê ke mi temsîl kenê bivejê, wa waştişê ma bivînê, wa polîtîkayê derheqê lazimîyê ma de eşkera bikerê’.” 

 

Waştişê cinîyan 

 

Yuksele da zanayîş ke weçînayîşê herêmî de têkilîya partîyan ya ke bi herême reyde ameya awankerdiş verê çiman de yeno tepiştiş û rayê xo şuxilnenê û wina dewam kerd: “Cinî cuya rojane de nêtêduştîya cinsîyetî ya komelî bi hawayêkê giran hîs kenê. Cinî seba xo û seba îstîhdamê xo kurs û hemleya perwerdeyî pawenê. Wazenê xizmetê ewnîyayîşî ra fêde bigîrê. Xebatê hişmendîyan muhîm vînenê. Lazimî bi perwerdeyîyê hişmendîya cinsîyetê komelî vînenê. Cinî heme raşteyan de şertê têduştî û asan, bi asayîş wazenê.”

 

Çi tesîr bi weçînitoxan keno? 

 

Yuksele qiseykerdişê xo wina qedêna: “Sebebê dayîşê rayan ê seba DEM Partî û AKPyî cîya yo. Weçînitoxê DEM Partîye bahaneye raydayîşê xo ewil bi babeta kurdî reyde girê danê. Ê diyîne zî DEM Partî goreyê partîyê sîyasî yê bîn hîna demokratîk o û zafaneyan temsîl keno. AKP zî verê cu ra nata bi babeta dînî rayan gêno.”