Nazlican Nujin Yildiz

 

ÎZMÎR - Endama MYKyî ya SGDFyî Sînem Çelebîye da zanayîş ke seba paştîdayîşê tepişteyanê ke kewtî grevê vêşanîye dest bi grevê vêşanîye yê hîrê rojan kerdî û vat ke ganî heme sosyalîst û şorişgêrî veng bidê grevê vêşanîye. 

 

Çalakîya grevê vêşanîye ya ke semedê azadîya fîzîkî ya Rayberê PKKyî Abdullah Ocalano ke Girawa Îmraliyî de tepişte yo û 35 aşmî yo ci ra tu xeberêke nîna girewtiş, dîyaya destpêkerdiş, dewam kena. Bi eynî waştişan keyeyê tepişteyan zî teber de Nobeta Edaletî dewam kenê. 

 

Partîya Sosyalîst a Bindestan (ESP) û Federasyonê Komeleyê Ciwananê Sosyalîst (SGDF) bi amancê paştîdayîşê tepişteyan xeylê bajaran de dest bi grevê vêşanîye û Nobetê Edaletî kerdî. Endama MYKyî ya SGDFyî Sînem Çelebîye derheqê prosesî de qisey kerd û vat ke berpirsîyarîya şorişgêrî vera dest bi grevê vêşanîye kerdî û vat ke xeylê tepişteyê sîyasî sewqê zîndanê Tîpa S, R û Yyî ameyî kerdiş.

 

Sîneme ard ziwan ke semedê teda û tecrîdê zîndanan peynî bibo tepişte kewtî grevê vêşanîye û wina dewam kerd: “No berpirsîyarîya ma ya şorişgêrî bî. Bi amancê paştîdayîşî ma dest bi nê çalakîyan kerd. Ma ewro mecbur ê bibê vengê tepişteyan. Vera tepişteyan de hêrişêk gird est o. Tepişteyê nêweşî terkê mergî ameyî kerdiş. Tehlîyeyê tepişteyan yeno astengkerdiş. Pêvînayîş yeno astengkerdiş. Xeylê kesê ke bi tepişteyan reyde kewenê têkilî yenê destbendkerdiş û hêriş yeno kerdiş. Rojanê verênan de Îzmîr de 33 kes bi operasyonan ameyî destbendkerdiş û nînan ra 4 kes ameyî tepiştiş.” 

 

‘Tepişteyî zîndanan de yenê tecrîdkerdiş’ 

 

Sîneme da zanayîş ke tepişteyî yenê tecrîdkerdiş û nê çîyan vat: “Xeylê probleme ke tepişteyî ciwîyenê est ê. Her ca de kamera ameyî cakerdiş û no tecrîdî hîna giran keno. Nika zî zîndanê Tîpê S, Y û Ryî de tepişteyan zîndanan de sey çalî de tecrîd kenê. Nê zîndananê sey çalî de asmên zî nîno dîyîş. Nika tepişteyan sewqê nê zîndanan kenê.”

 

‘Tecrîdo tewr giran Îmraliyî de yo’ 

 

Sîneme bale ant serê tecrîdî û vat ke tecrîdo tewr giran Îmraliyî de yeno rayîr ra berdiş û wina dewam kerd: “Zîndanê Îmraliyî ke Birêz Abdullah Ocalan tede yeno tepiştiş esasê xo de cayê îşkenceyî yo. Dezgehê mîyanneteweyî wina kerd. Vera hende çîyan reyna zî tecrîdê Îmraliyî de israr kenê. Tecrîd sere de Îmraliyî de heme zîndanan de serê tepişteyan de bi hawayêkê giran yeno rayîr ra berdiş. Tepişteyî vera sucê merdimîye de grevan de yê. Ma sey SGDFyî zî vera tecrîd û polîtîkayê îşkenceyî ke sey sucê merdimîye yeno ercnayîş grevê vêşanîye de yê.” 

 

Biciwîyo xoverdayîşê zîndanan! 

 

Sîneme venga têkoşînê hempar kerd û wina qiseykerdişê xo peynî kerd: “Têkoşînê vera tecrîdî ganî tena sosyalîst û şoreşgiran rê nêro verdayîş. Ganî her kes nê çîyî bikero rojeva xo. Semedo ke faşîzm tesîrê xo serê ma hemeyan de keno. Do roje bêra faşîzm ma hemeyan bigîro. Yê ke ewro bêvengî zî do bêrê tepiştiş. Ganî ma bibê vengê grevê vêşanîye. No têkoşînê vera şovenîzmî yo. Ma venga heme sosyalîst, şorişgêr, rêxistinan û şarî kenê ke têkoşîn bikerê. Biciwîyo xoverdayîşê zîndanan!”