Mîdye Miqted

 

Taxa Şêxmeqsûdî ya bajarê Helebî projeyê çinitişî bi hemkarîya cinîyan yeno awankerdiş û hîrakerdiş. No proje zî hetê Komîteya Ekonomîye ya Kongra Starî ra taxe de ame destpêkerdiş ke herêma bi nameyê Şiqeyêfî ya ke kewena milê xerbî ya taxe de sîr, pîyaz, darê hinarî, îsot, bacan, baqil û gulî ameyî çinitiş. No proje do bêro hîrakerdiş. Demê verênan de seba çinitişê tewirê bîn ê sebze û fêkîyan cinî do xebatê xo hîra bikerê. Na xebate zî semedo ke hemwelatijê taxe rê biba hetkarî yena kerdiş. 

 

'Çinitiş mîyanê komelê kurdî de bîyayîşê xo pawit' 

 

Endama Komîteya Emonomîye ya Kongra Starî Zeyneb Ehmede destpêkerdişê qiseykerdişê xo de qalê çinitişê bi destê cinîyan kerd û vat: "Çinitiş sey kulturêk o û cinîyan nê kulturî pawitî. Destpêkerdişê komelbîyayîşê merdiman ra nata, taybetî zî prosesê neolîtîkî de cinî timî bi çinitiş û arêdayîşî reyde meşgul bîyî. Her çî bi destê xo kenê û semedê caaardişê lazimîyê xo û komelî rolê awankarî de bîya. Bi temamî cinî o wext hîna zêde bi xoza û çinitişî reyde meşgul bîya. Cinîyan no kar sey kulturêk xo reyde ardî heta roja ma ya ewro. Bi taybetî mîyanê komelê kurdî de no kultur hîna zêde xo pawito.”

 

'Efrîn hîna zêde bi çinitişî reyde meşgul bîyêne’ 

 

Zeynebe ard ziwan ke çinitiş mîyanê şarê Efrînî de hîna zêde aver kewtbî û wina vat: “Komelê Efrînî nê komelan ra yew o ke tewr zêde bi çinitişî reyde meşgul bîyêne û bi çinitişê darê zeytunan yeno naskerdiş. Cinî zî bi kare çinitişî reyde meşgul bîyêne. Şarê Efrînî şîyêne kam ca uca de dar ronayêne û xo rê kerdêne wargeh.” 

 

'Semedê demê verênan ma do projeyê xo yê çinitişî hîra bikerê' 

 

Dewamê qiseykerdişê xo de Zeynebe bale ant serê amancê înan ê semedê awankerdişê nê projeyî û wina vat: “Taxa Şêxmeqsûdî 6 serrî yo binê ambargoyî de ya. No ambargo xeylê hetan ra tesîr serê taxe de keno. Çîyo tewr muhîm zî tesîrê ekonomîye yo. Ma semedo ke ekonomîya taxe newe ra berz bikerê, xebetîyenê. Semedê demê verênan ma do projeyê xo yê çinitişî hîra bikerê." 

 

'Bi hetkarîya komînê ma, no proje ser kewt' 

 

Qiseykerdişê xo de Zeynebe da zanayîş ke bi hetkarîya komînê taxe û bi taybetî bi hetkarîya cinîyan ewro no proje ser kewt û vat: "Temamê cinîyê komînê me yê xoser ê taxe semedê serkewtişê nê projeyî ma reyde zêde bîyî hetkar. Semedê averberdişê ekonomîya cinîye ma do nê projeyî bidê dewamkerdiş."

 

'Semedê serkewtişê komelî esasê bingeyîn ekonomî ya' 

 

Qiseykerdişê xo yê peyênan de Zeynebe dîyar kerd ke do hîna zêde komîteya xo ya ekonomîye aver berê û vat: "Serra 2019î de na taxe de komîteya ekonomîye ame awankerdiş la zêde xo aver nêberdbî. Roja ma ya ewro de komîte xo zêde aver berd. Semedê zêdekerdişê ma yê mîyanê meclîsî û komînê taxe ma xebetîyenê. Semedê serkewtişê komelî esasê bingeyîn ekonomî ya.”