MEREŞ -  Mereşo ke yew merkezê tewr muhîmî yê erdlerzî yo, saetê serê sibayî ra serdayîşê Goristanê Kapiçamî ke yew goristanê kesê erdlerzî de dinyaya xo bedelnabî û uca de defin bibî, ame kerdiş.

 

Yewin serrgêra erdlerzo ke 6ê Sibata 2023ine de merkezê Mereşî de virazîya û bi des hezaran kesî dinyaya xo bedelnayî, yenê yadkerdiş. Serrgêra erdlerzî de saetê serê sibayî ra serdayîşê Goristanê Kapiçamî ke yew goristanê Mereşî yo û tewr zêde kesî ci de defin bîyê ame kerdiş.

 

Bi qurnefîlan şî serê gorê merdimanê xo

 

Sey demê erdlerzî de, serrgêra erdlerzî de zî şar bi serdayîşê gorê kesê ke dinyaya xo bedelnayî, bi xususî goristanê bêkesan de, serdayîşê xo dest pêkerd. Welatijî goristanan qurnefîlê destê xo de, bi saetan verê gorê merdimanê xo nişnenê ro, hetêk ra bi hêrs ê, heto bîn ra zî semedê kesê dinyaya xo bedelnayî, dua kenê.

 

Gorê merdimanê xo bi hûmaran nas kenê

 

Goristan de gorê zêdeyêr 5 hezar kesê ke erdlerzî de dinyaya xo bedelnayî û nêzdîyê 150 kesê nasnameyê înan nêdîyar zî goristan de est ê, semedo ke xeylêk gorî est ê, ziyaretwanî bi taqîbkerdişê hûmaran hewl danê gorê merdimanê xo bivînê.

 

Şovê Erdoganî yê goristanî

 

Binê sîwanê pêro dej û azaran de goristanî açarnayî raşteyê şovî. Temamê goristanî vernîya ziyaretê Serokomar Tayyîp Erdoganî bi alaya Tirkîya ame xemilnayîş. Tayyîp Erdogan bi asayîşêk pîl û konvoyêk ke xeylêk wesayît ci de bî, kewt goristan.