Rabîa Onver

 

MÛŞ - Raywana "Rayîr ra Şîyayîşê Girdî yê Azadîye" û parlamentera DEM Partîye Newroz Uysala ke Baskê Qersî de ca gêna, wina bale ant serê rayîr ra şîyayîşî: “Ma seba bi destfînayîşê azadîya fîzîkî ya Birêz Abdullah Ocalanî têkoşînê xo dewam kenê. Ma sey raywanê azadîye zî vengê bi milyonan kesî resnenê û ma do xoverdayîşê xo dewam bikerê.”

 

"Rayîr ra Şîyayîşê Girdî yê Azadîye" ke Wan û Qersî ra sey di baskan 1ê Sibate de semedê azadîya Rayberê PKKyî Abdullah Ocalanî dîyabî destpêkerdiş, roja 6ine de dewam keno. Baskê Qersî "Rayîr ra Şîyayîşê Gird ê Azadîye" bi sloganê "Xoverdayîş cuye yo ", "Biciwîyo xoverdayîşê zîndanan", "Tecrîdî rê nê aştîye hema nika" dewî, bajarok, qeza û bajaran de bi coşêk gird yenê pêşwazîkerdiş.

 

Raywana "Rayîr ra Şîyayîşê Girdî yê Azadîye" û parlamentera Partîya Têduştîye û Demokrasîyî (DEM Partî) ya Şirnexî Newroz Uysale ajasê ma rê qisey kerd.

 

'25 serrî yo tecrîdêk est o' 

 

Newroze dîyar kerd ke do 15 rojan rayîr ra şîyayîş dewam bikero û vat: "Rayîr ra şîyayîşê semedê azadîya Birêz Abdullah Ocalanî pê yeno. 25 serrî yo tecrîdêk est o û 3 serrî ra zêde yo zî tu xeberêke nîna girewtiş. Sewbîna 70 rojî ra zêde yo ke zîndanan de grevê vêşanîye est o. Çar hetê dinya de kampanyayê azadîye dewam kenê. Tewr zêde azadî ma şarê kurdî eleqeder keno." 

 

'Ver bi Amaraye ra şêrê’ 

 

Newroze da zanayîş ke bakurê Kurdistanî de semedê azadîya Abdullah Ocalanî xeylê bername yenê organîzekerdiş û wina dewam kerd: "No 'Rayîr ra şîyayîşê Gird ê Azadîye' semedê azadîya Birêz Ocalanî û semedê çareserîya problemê kurdî ameyo destpêkerdiş û bi no hawa şaran ano têkişt û waştişan hîna zêde ano dîyayîş. No çî semedê ma xeylê muhîm o. Ma sey Baskê Qersî û Baskê Wanî do Amed de biresê yewbînan, rayîr ra şîyayîşê xo Amara de peynî bikerê.” 

 

'Şar waştişê azadîya Birêz Ocalanî keno' 

 

Parlamentere Newroze ard ziwan ke her roje şinê zîyaretê 3 cayan û wina dewam kerd: "Cayê ke ma şinê tede manenê zîyaretê esnafan, keyeyan kenê û taxan de kombîyayîşê şarî organize kenê. Dewî û bajarokan de ma zîyaretê qehwexaneyan kenê û waştişê xo anê ziwan. La ma vînenê ke hemwelatijî edalet û têduştîye ra zêde azadîya Birêz Ocalanî wazenê.”

 

'Ma do têkoşînê xo dewam bikerê’ 

 

Newroze qiseykerdişê xo yê peyênan de vat: “Zîyaretanê ma de vatişê Birêz Ocalanî her tim yenê ziwan. Zîyaretê ma yê keyeyan, rayîr ra şîyayîşê ma yê merkezan hêzêk gird dano ma. Ma pîya, şar zî ma reyde rayîr ra şino. Sewbîna nuşteyê Birêz Ocalanî yê ke zîyaretan û kombîyayîşan de yenê wendiş zî tesîrîn ê. No moralêk gird dano ma. Her cayê ke ma şinê, bi coşêk gird ma yenê pêşwazîkerdiş. Heta azadîya Birêz Ocalanî pê bêro, ma do bibî vengê milyonan û ma do têkoşînê xo dewam bikerê."