Rojda Aydin

 

ŞIRNEX - “Rayîr ra Şîyayîşê Gird ê Azadîye” ke Wan ra destpêkerd, raywanê azadîye ke şinê her dingî waştişê xo yê “Abdullah Ocalan rê azadî û problemê kurdî rê çareserîya sîyasî” anê ziwan ser. Raywanê azadîye vera vewra ke varena û serdî rayîr ra şîyayîşê xo bi qerardarî dewam kenê.

 

“Rayîr ra Şîyayîşê Gird ê Azadîye” ya ke Wan û Qers de sey di baskan 1ê Sibate de seba azadîya Rayberê PKKyî Abdullah Ocalanî dîyabî destpêkerdiş, roja 6ine de dewam keno. Raywanê rayîr ra şîyayîşê azadîye, vera vewra ke varena û hewayo serdin rayîr ra şîyayîşê xo bêmaben dewam kenê û bi qerardarîyêk gird rayîr ra şinê. Raywanê azadîye ke şinê her bajar û qezaye bale ancenê serê tecrîdê giran ê serê Abdullah Ocalanî û qala muhîmîya wedaritişê tecrîd û azadîya fîzîkî kenê.

 

Raywanê azadîye ke “Rayîr ra Şîyayîşê Gird ê Azadîye” Wan ra dayî destpêkerdiş roja ewile merkeze Wan de rayîr ra şîyayîşê xo dayî destpêkerdiş û dingê înan ê ewilî qezayê Payîz Ava û Elbakî bî. Roja dimayê ci raywanî tîya ra derbazê qezayê Şemzînan û Geverî yê Colemêrgî bîyî. 

 

Raywanê azadîye 3ê Sibate de zî tîya ra derbazê Colemêrgî bîyî û hetê bi desan kesan ra bi sloganê “Biciwîyo xoverdayîşê Îmralîyî”, “Biciwîyo xoverdayîşê Zîndanan” û “Biciwîyo Serek Apo” ke ameyî berzkerdiş ameyî pêşwazî kerdiş. sewbîna heyeto ke derbazê Colemêrgî bibo şî zîyaretê “Pirdê Ciwanan ê Şorişgêr” ke serra 1969î de hetê Denîz Gezmîşî ra ameybî viraştiş. 

 

Binê vewre de bi meşaleyan rayîr ra şîyî 

 

Raywanê azadîye 4ê Sibate de dewa Aşût a qezaya Çêlê de hetê hemwelatijê dewe ra ameyî pêşwazîkerdiş. Vera vewra ke varayêne bi çepik û sloganê “Biciwîyo Serek Apo” û “Jin jiyan azadî” rayîr ra şîyî. Heyeto ke goş nêda varayîşê vewre, dimayê rayîr ra şîyayîşî bi coş û heyecanêk gird ame oxirkerdiş. Raywanê azadîye dimayê herêma Siwarêkûtra meşale tafîna, bi tililîyan rayîr ra şî. Raywanê azadîye binê vewre de govenda azadîye çarna. 

 

Rayîr ra Şîyayîşê azadîye bi koyan xemilîya 

 

Heyet, dima ra derbazê Elkê ya Şirnexî bî. Raywanê azadîye vere ke biresê qezaye mabenê koyanê ke bi vewre xemilîyabî de rayîr ra şîyayîşê xo bi deyîran û sloganan dewam kerd. Koyê Elkê zî şahidîya “Rayîr ra Şîyayîşê Gird ê Azadîye” kerd û bi heybetîya xo silam da raywanan. 

 

Qerardarîya şarî: Biciwîyo azadî, bimiro koletî 

 

Raywanê azadîye dimayê raywanîya 4-5 saetan Çelê ra heta Elkê ameyî, tîya ra bi sloganê “Biciwîyo azadî, bimiro koletî” û “Biciwîyo xoverdayîşê Îmralîyî” ameyî pêşwazîkerdiş. Raywanan tîya de zî waştişê xo yê wedaritişê tecrîdî û azadîya fîzîkî ya Abdullah Ocalanî ancî kerdî. Şar amcî raywanê azadîye tena nêverda, bi slogan, tilîlî û çepikanê xo wayîrê rayîr ra şîyayîşî vejîya. 

 

Waştişê ‘azadî’ yê merdime Roboskî 

 

Dingê bîn zî bî Goristanê Roboskî. 28ê Kanûna 2011î de Roboskî de netîceyê bombardûmanê teyareyê F-16î de 19ê ci tutî, pêro pîya 34 kes ameybî qetilkerdiş. Keyeyê ke merdimanê xo vînî kerdî bi fotografê tutan û merdimanê xo raywanê azadîye pêşwazî kerdî. Tîya de Halîme Encu ya ke lajê xo vînî kerd, bi vatişê “Bêrê ma destê xo bidê destê yewbînan. Êdî wa qirkerdişî pê nêrê. Ma tena azadî û aştîye wazenê” raywanê azadîye silam kerd. 

 

Serê Qirkerdişê Roboskî ra 13 serrî derbaz bî, dadîyê Roboskî hema zî bi vatişê xo yê cuyêka azad û aştîyane talebanê xo anî ziwan ser. Heyet dima ra tîya ra hetê keyeyan ra ame oxirkerdiş. Rayîr ra şîyaîyş cayo ke mendbî ra dewam kerd û verê xo da Qilabanî. 

 

Govenda azadîye çarnayî 

 

Heyetê raywanê azadîye vizêr zî qezaya Qilabanî de bi coşêk gird zîyaretê esnafan kerd û bi hemwelatijan reyde rayîr ra şî. Rayîr ra şîyayîşî ra ver raywanî û hemwelatijî awanîya DEM Partî ya Qilabanî de “Govenda azadîye” bi sloganê “Biciwîyo xoverdayîşê Îmralîyî” tepiştî. 

 

Tilîlîyê dadîyanê Botanî raşteyan de zima 

 

Heyet, dimayê Qilabanî verê xo da Gundikê Melê. Tîya de zî dadîyê Botanî yê laçik spî yê ke bîyî sembola azadîye, bi sloganê “Jin jiyan azadî”, “Biciwîyo azadî, bimiro koletî”, “Xoverdayîş cuye yo”, “Biciwîyo Xoverdayîşê Zîndanan”, “Biciwîyo xoverdayîşê Îmralîyî” raywanê azadîye ameyî pêşwazîkerdiş. Pîya heta awanîya DEM Partîye ya bajarokî rayîr ra şîyî. 

 

Bi kîlometreyan rayîr ra şîyî 

 

Heyet,dima ra zî ver bi Şirnexî kewt rayîr. Raywanê azadîye bi sloganê “Biciwîyo xoverdayîşê Îmralîyî”, “Biciwîyo Serek Apo”, “Jin Jiyan Azadî” û “Tecrît merg o, azadî cuye ya” bi kîlometreyan rayîr ra şîyî û xo resnayî Şirnexî. Her çend ke polîsan cehd bikerê ke hêrişê hemwelatijan û raywananê azadîye bikerê zî cinîyê Botanî bi rayîrê bînan tewrê rayîr ra şîyayîşî bîyî. Cinîyêke Botan ra bi raywanan reyde rayîr ra şî û heta peynî dua kerd. Cinîyê Botanî bi kiras û fîstananê xo û deyîranê xo govenda azadîye çarna. Hemwelatijê Botanî vera polîtîkayê şerê taybetî sey her timî ewro zî nizdîbîyayîşê xo yê azadîye ardî ziwan û paştîdayîşê xo yê “Rayîr ra Şîyayîşê Gird ê Azadîye” nîşan dayî. Raywanî tîya de nêqedîya û 6 taxê Şirnexî de şewe zî dewam kerd. Raywanî, tewrê kombîyayîşê şarî bîyî û tîya de waştişê hemwelatijan goşdarî kerdî û mesajê girdkerdişê xoverdayîş û têkoşînî dayî. 

 

Raywanê azadîye Serhed ra heta Botanî, bi eynî coş û heyecanî rayîr ra şîyayîşê xo yê azadîye dewam kerdî. Raywanê azadîye mabenê Koyanê Cûdî û Gabarî de rayîr ra şîyayîşê xo dewam kenê.