ÎZMÎR - Cinîyê Çigliyî hemverê şîdetê serê cinî û qirkerdişê serê cinîyan de vindenê, Koroyê Deniz Poyraz awan kerdî.

 

Cinîyê Çigliyî hemverê şîdetê serê cinî û qirkerdişê serê cinîyan de vindenê, koroyêk awan kerdî. Cinîyan nameyê koroyî kerdî, Koroyê Deniz Poyraz. Denîz Poyraz awanîya HDPyî ya Îzmîrî de amebî qetilkerdiş. 

 

Hatice Erdogan derheqê koroyî de qisey kerd. 

 

Hatice da zanayîş ke aştîye wazenê û vat, ê do deyîranê kurmanckî, kirmanckî, ermenkî û tirkî, deyîranê aştîye bivajê. 

 

'Ma wazenê cinîyê ke ameyê qetilkerdiş bidê ciwîyayîş'

 

Hatice dîyar kerd ke wazenê cinîyê ameyê qetilkerdiş, bidê ciwîyayîş û vat: "Ma waşt ma nameyê hevala xo ya ke awanîya HDPyî de ameye qetilkerdiş, bidê ciwîyayîş. No koroyêk cinîyan o, xoser o. Amancê ma oyo ke ma pêro cinîyê ke ameyê qetilkerdiş, nêdê xovîrrakerdiş. Her sazgehê cinî nê koroyî de est ê. Ma wazenê pêro cinîyan xo verike bikerê.”

 

Do deyîranê aştîye bivajê

 

Hatice dîyar kerd ke cinî aştîye wazenê û vat, ê do deyîranê kurmanckî, kirmanckî, ermenkî û tirkî, deyîranê aştîye bivajê û vat: "Ma hema newe awan kerd û coka ma hîna semedê repertuarî qerar nêdayo. Ma sazgehê cîya de hewteyêk reyke prova kenê. Ma do 8ê Adare de, 25ê Teşrîna Peyêne de zî vejîyê serê sehneyî. Ma wazenê ziwanêk aştîyane bişuxilnê. Ma cinî tim aştîye wazenê."

 

Do xebatî hîra bibê

 

Hatice da zanayîş ke cinî hunerê komelî kenê û vat tewrbîyayîş xurt o. Hatice wina dewam kerd: "Cinî kursê erbane û tenbûrî zî wazenê. Coka do dimayê 8ê Adare de xebatê ma bibê."

 

Hatice tewr peyîn venga cinîyan kerd ke cinî hemverê şîdetî de verê înan de ca bigîrê.