Nazlican Nûjîn Yildiz

 

ÎZMÎR - Hanîfe Gumuşa ke Nobeta Edaletî de ca gêna serra 1990î de koçê Îzmîrî kerda û no 40 serrî yo têkoşînê azadî û edaletî rayîr ra bena. Hanîfeye dîyar kerd ke heta waştişê înan nêro qebulkerdiş do têkoşînê xo dewam bikerê.

 

Rayberê PKKyî Abdullah Ocalano ke 25 serrî yo Îmraliyî de tepişte yo, 35 aşmî yo xebere nîna girewtiş. Tepişteyê sîyasî 27ê Teşrîna Peyêne ya 2023yî de bi amancê azadîya fîzîkî ya Abdullah Ocalanî dest bi grevê vêşanîye kerdî û bi eynî waştişî zî merdime tepişteyan teber de dest bi Nobetê Edaletî kerdî. 

 

Yew xoverdayoxa Nobeta Edaletî ya Îzmîrî ra Hanîfe Gumuşe ya. Hanîfe Gumuşe serra 90î de vera teda û zilmî de têkoşînê ‘edalet, aştî û azdîye’ rayîr ra bena. 

 

Hanîfe û keyeyê xo 27 serrî verê cû qezaya Nisêbînî ya Mêrdînî ra koçê Îzmîrî kena. Lajê aye Mehmet Nezîr Gumuşe serra 1992yî de tedayan vera tewrê PKKyî beno, serra 1999î de yeno tepiştiş û 36 serrî ceza ci rê yeno birnayîş. Mêrdeyê Hanîfeye serra 1994î de hetê Hîzbullahî ra yeno qetilkerdiş. Hanîfeye dîyar kena ke wexto ke yena Îzmîrî serê erdê findiq û pemeyî de xebetîyena, fabrîqayan de xebetîyena. Lajê aye Nezîr xeylê zîndanan de maneno. Hanîfe nika seba lajê xo û tepişteyê bînan yê vera teda û tecrîdî têkoşîn kena û Nobeta Edaletî de vengê înan dana eşnawitiş. 

 

Lajê aye Tîpê Syî de yo 

 

Hanîfeye da zanayîş ke lajê aye zîndanê Mêrdîn, Otlu, Şakran, Kiriklar, Bandirmaye de mendo û wina vat: “19ê Çeleyî de surgunê zîndanê Tîpê Syî yê Burdurî kerdî. Nika hucreyê yew kesî de maneno. Tena kinc û betanî dîyenê ci. Nika hema kelepulê ci nêdîyenê. Ma zîndan gêrenê cewab nêdanê. Gelo merdimêk eşkeno tena bimano? Şewêke krîz derbaz kerd, sereye ci deja. No bêedaletîyêk gird o. Tutanê ma kenê hucreyan. Ma do zî semedê tutanê xo her çîyî bikerê.” 

 

Semedê keyeyê tepişteyan vengdayîş 

 

 Hanîfeye eşkera kerd ke na rewşe îşkence ya û vat: “Nîyetê dewlete no yo ke tepişteyan qetil bikero. Ganî seba tepişteyê nêweş bi lezkî game bêro eştiş. Wa tepişte serbest bêrê verdayîş. Ma dadî seba tutanê xo nobete de yê. Wa dadîyê tepişteyan paştîdayîş bidê ma. Wa wayîrê tutanê xo û serekatîyê xo bivej. Ma tutanê xo nê zilmî ra xelas bikerê.” 

 

‘Rayîra ra şîyayîşê azadîye silam kena’ 

 

Hanîfeye derheqê rayîr ra şîyayîşê azadîye ke Qers û Wan de destpêkerd de zî qisey kerd û wina peynî ard: “Ma çalakîkerî rayîr ra şîyayîşî silam kenê. Wa rayîrê înan akerde bo. Ma paştîdayîş danê înan. Çi destê ma ra bêro ma do bikerê. Ma înan pîroz kenê. Serkewtiş wazena. Wa tecrîd êdî bişikîyo. Ma do semedê wedaritişê tecrîdî têkoşînê xo dewam bikerê. Semedê dadîyan, semedê tepişteyan û çalakîkerê azadîye serkewtiş wazena.”