Melek Avci

 

ANQARA - Temsîlkara EŞÎKî ya Komeleya Cuya Têduştîye Nazîk Işike da zanayîş ke ganî heme namzetî hişmendîya cinsîyetê komelî de bê û vat: “La goreyê ma cayo ke zîhnîyet û cinsîyet nêrê têkiştî de mabenê cinî û camêrdî de zî cîyayê çin o.” 

 

Weçînayîşê herêmî nizdî beno û lîsteya namzetan zî her ke şino zelal beno. AKP goreyê weçînayîşê herêmî yê serra 2019î beşêk namzetê cinîyan zêde kerd. DEM Partî bi hemserekatîye şino weçînayîşan. Temsîlkara Platforma Cinîyan a Semedê Têduştîye (EŞÎK) a Komeleya Cuye ya Têduştîye Nazîk Işike derheqê namzetê ke ameyî eşkerakerdiş de qisey kerd. 

 

Nazîke nizdîbîyayîşê hemverê temsîlkarîya têduştîye ya îqtîdar û muxalefetî ercnaye û vat: “Îqtîdar nê zîhnîyetî ra dûrî yo. Tîfaqê Cumhur û partîyê sîyasî yê dormeyê înan de têkilîyê înan bi têduştîye cinsîyetî çin o. Nizdîbîyayîşêk înan yê pragmatist est o. Babeta namzetîya cinîyan de xêrcê cînsîyetê biyolojik ra wetêr şuxilnayîşê çekuyê cînsîyetî çi heyfo ke çin o. Namzetê CHPyî zî hema hema dîyar bîyî. Weçînayîşê verên de hezar cayî de bi ÎYÎ Partî reyde kewt weçînayîş. Na rey pêkerdişê înan yan do eşkera bibo yan zî nimite. Eşkerayî dewam kenê. DEM Partîye de bi temsîlkarîya têduştîye sîstem dewam keno. No seba ma cinîyan muhîm o.” 

 

‘Peymeyo ke ma waştêne hema nêameyo destfînayîş’ 

 

Nazîke vat ke hema namzetî heme dîyar nêbîyî û dewam kerd: “La çîyo ke ma waşt nêbî. Temsîlkarîya têduştîye ya baş çin a. Îzmîr de hîrê şaredarê cinî yê CHPyî est ê. Nika 9 namzetê cinî ameyî eşkerakerdiş. No averşîyayîşêk o tebîî la temsîlkarîya têduştîye ra dûrî yo. Çîyo ke ma waştêne hema nêameyo destfînayîş. Dem zî kêm mendo. 20ê Sibate de lîsteya namzetan yena teslîmkerdiş. Peymeyo ke ma waştêne hema nêameyo destfînayîş.” 

 

‘Hemserekatî muhîm o la yewine mekanîzma nîyo’ 

 

Nazîke ard ziwan ke kişta temsîlkarîya têduştîye de sîstemê hemserekatîye ya ke DEM Partî pê ana zî çîyêk muhîm o û wina vat: “EŞÎK her hewte babeta rojeve qisey kena. Heto bîn de seba averşîyayîşî gamî yenê eştiş. Hedefê ma temsîlkarîya têduştîye yo. Ma paştîdayîş danê her tewirê têduştîye. Înan ra yew zî Hemserekatî yo. Hetê ma ra muhîm o. Tena mekanîzmayo ke est o nîyo la ma erc danê. Bîyayîşê ci bi fêde yo.” 

 

Bedilnayîşê zîhnîyetê cinî û camêrdî 

 

Nazîke ercnayîşê xo wina dewam kerd: “Goreyê ma cayo ke zîhnîyet û cinsîyet nêrê têkişt de mabenê cinî û camêrdî de zî cîyayê çin o. Çîyo muhîm no yo ke seba cinîyan dinyayêke têduşte bêra awankerdiş. No seba ma muhîm o. Nê prosesî de ma heme namzetanê xo ra nê taybetîyan wazenê. Ganî wayîrê nizdîbîyayîşê cînsîyetê komelî yê raşteqîn bê û erc bidê nê çîyan. Ganî têduştî verê çiman de bêro girewtiş û her çî bi hawayêkê têduştî bêro rayîr ra berdiş. Nêtêduştîya mabenê cinî û camêrdî ganî raşte ra bêro wedaritiş. Ganî bedilnayîşê zîhnîyetê cinî û camêrdî pê bêro. Ganî namzetî hişmendîya cînsîyetê komelî de bê.” 

 

Nazîke qiseykerdişê xo yê peyênan de qala xebatê paştîdayîşê seba namzetê cinîyan kerd û wina qiseykerdişê xo peynî kerd: “Ma sey EŞÎKî weçînayîşan de semedê temsîlkarîya têduştî xebatan rayîr ra benê. Ma seba namzetan xebate rayîr ra benê. Goreyê verê cu nika vernamzetê cinî zêde yê. No averşîyaîyşêk muhîm o. Her ke namzetî dîyar bibê ma do xebatê xo goreyê nê rayîr ra berê.”