Pelşîn Çetînkaya-Gulistan Gulmuş

 

AMED - Menîce Rumeysa Gulmeze da zanayîş ke şerê Rojhelatê Mîyanênî yeno ciwîyayîş ke tewr zêde cinî û tutî tesîr benê û vat sebebê şerî îslamîyet nîyo, sebeb waştişê serdestîye yo. 

 

Sîstemê dewlet-camêrdî Rojhelatê Mîyanênî kerdo merkeze şer û no tesîrê xo heme şaran ser de keno, sere de zî serê cinî û tutan de keno. Hetgira Serekatîya Pêroyî ya Partîya Merdim û Azadîye Menîce Rumeysa Gulmeze derheqê şerê Rojhelatê Mîyanênî ke binê nameyê dînî de yeno rayîr ra berdiş, tesîr û netîceyê ci de ercnayîş kerd.

 

‘Her kes Rojhelatê Mîyanênî de serdestîye wazeno’ 

 

Menîce dîyar kerd ke her cayê dinya de yê ke tewr zêde şerî de zirar vînenê cinî û tut ê û vat: “Dewlete wazena Rojhelatê Mîyanênî de serdestîye awan bikera. Na cografyaye de bi raştî îslam pê biameyêne do bi cinî û tutî û heme gandaran zilm nêameyêne kerdiş. Rojhelatê Mîyanên de merdimîye ameyo ciwîyayîş. Cayo ke pêxember tede ameyî war o. Coka ra dewlemendîyê herême heme hêz wazeno ke herême de serdest bê. Coka ra şer vejenê û wazenê bi ca bibê.”

 

‘Sebebê şerî îslamîyet nîyo, serdestî yo’ 

 

Menîce ard ziwan ke sebebe şerî îslamîyet nîyo, dewlemendîyê Rojhelatê Mîyanênî yo û wina dewam kerd qiseykerdişê xo: “Serkêşê Rojhelatê Mîyanênî zî wazenê dewletê bînî îşxal bikerê û serê na herre de serdest bê. Ma eşkenê nimune zî bidê. Wextêko nizdî de Rojawan û Îran hemverê rojhelatî de şer dayî destpêkerdiş. Tedayê Îsraîlî yê hemverê Fîlîstînî est o. No bi temamî serdestîya ke yeno waştiş vera yo. Dewletî semedo ke bibê wayîrê dewlemendîyê tîya, nê şerî danî rayîr ra berdiş. Tu eleqeya şerî bi dînî reyde çin o. Babete îslamîyet nîya, babete serdestîya ke yeno watiş bêra awankerdiş a.” 

 

‘Dînê dewlete çin o’ 

 

Menîce qiseykerdişê xo yê peyênan de nê çîyan vat: “Semedo ke îslam ke Rojhelatê Mîyanênî de zêde yo, ame vatiş ke dewletî binê nameyê Îslamî de serdestîye kenê. Dewletê ke îdia kenê ke dewletî îslamî yê, rayîrberîyê îslamî pê nêanê. Îran semedo ke nameyê dewleta îslamî xo ra dayo, nîno na mana ke dewleta îslamî ya raşt a. Îran hetê mezhebo ke vano îslamo radîkal o ra yeno rayîr ra berdiş. Dînê dewlete çin o. Wexto ke merdim terzê cuya înan ra ewnîyeno merdim vîneno ke Îslamî nêciwîyenê. Çareserî Îslamo raşt de yo û ganî merdim verê xo bido îslamo raşt.”