AMED - Nobeta Edaletî ya ke Amed de seba azadîya fîzîkî ya Rayberê PKKyî Abdullah Ocalanî û seba çareserîya meseleya kurdî dîya destpêkerdiş roja 59î de dewam kena. 

 

Çarçeweya kampanyaya ‘Abdullah Ocalanî rê azadî, problemê kurdî rê çareserîya sîyasî’ ke 10ê Teşrîna Verêne de bi waştişê azadîya fîzîkî ya Rayberê PKKyî Abdullah Ocalanî ke Girava Îmraliyî de binê tecrîdêk giran de yeno tepiştiş dîya destpêkerdiş, 27ê Teşrîna Peyêne de tepişteyê sîyasî seba paştîdayîşê kampanyaye dest bi grevê vêşanîye kerdî. Merdimê tepişteyan zî çarçeweya kampanya û paştîdayîşê tepişteyan de dest bi Nobeta Edaletî kerdî. 

 

Çalakîya Nobeta Edaletî Amed de bi serkêşîya Komeleya Hetkarîya bi Keyeyê Tepişteyan Reyde (TUAY-DER) dîya destpêkerdiş, awanîya Rêxistina Partîya Têduştî û Demokrasîyî yê Şaran (DEM Partî) a qezaya Rezan ya Amedî de roja 59ine de dewam kena. Çalakîkerê nobete ewro zî verbendikê ke serê înan de "Tecrîd sucê merdimîye yo" nuşte bî xora dayî û dest bi çalakîya xo kerdî. 

 

Hemserekê DBPyî, endamê ci, Hemserekê DEM Partîye yê Farqînî şîyî zîyaretê Nobeta Edaletî. 

 

Nobeta Edaletî de deyîr ameyî vatiş, cinîyan sloganê " Biciwîyo xoverdayîşê zîndanan" berz kerd.