COLEMÊRG - Baskê 'Rayîr ra şîyayîşê Azadîye ya Pîlî' yê Wanî resa Şemzînanî û mesajê "Şarê Kurdistan û Tirkîya paweyê vengêk ke Îmraliyî ra bêro yê" ame dayîş. Rayîr ra şîyayîş merkezê bajarî de bi sloganê “Biciwîyo xoverdayîşê zîndanan” ame berzkerdiş û waştişê "aştîye" berz bî.

 

'Rayîr ra şîyayîşê Azadîye yê Pîlî' ke semedê azadîya fîzîkî ya Rayberê PKKyî Abdullah Ocalanî û çareserîya problemê kurdî dîyayo destpêkerdiş, roja xo ya diyîne de dewam keno. Sîyasetmedar û temsîlkarê rêxistinê girseyî yê demokratîke yê baskê Wanî ewro qezaya Şemzînanî ya Colemêrgî de rayîr ra şîyayîş pê ardî. 

 

Kesê ke tewrê rayîr ra şîyayîşî bîyî verbendikê ke serê ci de nuşteyê ‘Rayîr ra şîyayîşê Azadîye’ nuşte bî xora dayî û merkezê bajarî de şarî reyde ameyî têkişt.  

 

Bi sloganan rayîr ra şîyî 

 

Dekewtişê Şemzînanî de endamê partîye bi çepik û tilîlîyan 'Rayîr ra Şîyayîşê Azadîye yê Pîlî' pêşwazî kerd. Dekewtişê Şemzînanî ra heta Rêxistinê Qezaye ya Partîya Têduştîye û Demokrasîyî yê Şaran (DEM Partî) rayîr ra şîyayîş ame kerdiş. Temamê rayîr ra şîyayîşî de sloganê "Biciwîyo xoverdayîşê zîndanan", "Tecrîdî rê nê, aştî nika" û "Bimiro koletî, biciwîyo azadî" ameyî berzkerdiş. Rayîr ra şîyayîş de hemwelatijî ameyî silamkerdiş. Hemwelatijan bi nîşaneyê serkewtişî paştî dayî rayîr ra şîyayîşî. 

 

'Ma do bi qerardarî rayîr ra şîyayîşê xo dewam bikerê’ 

 

Verê awanîya qezaye ya DEM Partîye de çalakîkerî rayîr ra şîyayîşî bi çepik û sloganê "Biciwîyo xoverdayîşê zîndanan" ameyî pêşwazîkerdiş. Parlamenterê DEM Partîye yê Şirnexî Zekî Îrmez qisey kerd û vat: “No rayîr ra şîyayîşê aştî û demokrasîyî yo. 35 aşmî yo Rayberê Şarê Kurdî Abdullah Ocalanî ra xebere nîna girewtiş. Ganî no tecrîd bêro peynîkerdiş ke vengê aştî û demokrasîyî berz bibo. Îmrali de 25 serrî yo tecrîdêk giran yeno rayîr ra berdiş. Her gama ke Abdullah Ocalan tede yo de hêvîya aştîye berz beno. Şarê Tirkîya û Kurdistanî paweyê vengê aştîye yo ke Îmraliyî ra bêro eşnawitiş. Seba nê xeylê çalakî ameyî kerdiş. Embazê ma yê tepişte seba 'şikitişê tecrîdî’ kewtî grevê vêşanîye. Coka ra ma seba peynîkerdişê tecrîdî dest bi rayîr ra şîyayîşî kerd. Ma qerardar ê, ma do bi qerardarî rayîr ra şîyayîşê xo dewam bikerê. Şarê ma yê aştîwaştox ganî bi xurtî û bi coş çalakîyan verik bikero. Şemzînan seba demokrasî, aştî û wedaritişê tecrîdî vengê xo berz kerd. Ma înan pîroz kenê."

 

'Ganî birêz Ocalan azad bibo' 

 

Hemsereka MED TUHAD-FEDî Emîne Kayaye dîyar kerd ke rojê tarîxî derbaz kenê. Emîne dîyar kerd ke ê semedê azadîya Abdullah Ocalanî kewtî rayîr û vat: “Birêz Ocalan aştî wazeno. Eke na aştî pê bêra do bi destê birêz Ocalanî pê bêro. Coka ra lazim o birêz Ocalan bi lezkî azad bibo. Şarê kurdî êdî şîyar bîyo. Roj roja şarê kurdî û demokrasîyî ya. Ma bawer kenê ke do no tecrîd bêro peynîkerdiş.” 

 

Namzetê Hemşaredarîye yê Şemzînanî bale antî serê tecrîdê Îmraliyî û dîyar kerdî ke ganî aştî pê bêra. Hemserekê Qezaya Şemzînanî yê DEM Partîye Agît Tekînî zî vat: “Ameyîşê şima semedê ma tarîx o. Rayîr ra şîyayîş do bibo hetkar ke tecrîdê serê Raybertîyê ma bêro peynîkerdiş û tecrîdê serê tepişteyan peynî bibo."

 

Dimayê qiseykerdişan qezaye de bi deyîrê kurdî govende ameye çarnayîş. Şemzînan de Rayîra ra Şîyayîşê Azadîye bi nîşaneyê serkewtişî ame oxirkerdiş. 

 

Rayîra ra şîyayîş bi zîyaretê Geverî dewam keno.