QERS - Baskê "Rayîr ra şîyayîşê Azadîye yê Pîlî” yê  Qersî ke semedê azadîya fîzîkî ya Rayberê PKKyî Abdullah Ocalanî û çareserîya demokratîke ya meselaya kurdî amebî destpêkerdiş, kuçeyê bajarî de bi sloganê "Bijî berxwedana Îmralî" dewam kerd. mesajê "Serkewtiş yê kesê ke kewtê rayîr” ame dayîş.

 

Baskê "Rayîr ra şîyayîşê Azadîye” yê Qersî ke semedê azadîya Rayberê PKKyî Abdullah Ocalanî û çareserîya sîyasî ya meselaya kurdî ameyo destpêkerdiş, bi eşkerayîyêke çapemenî dest bi rayîr ra şîyayîşî kerd. Dimayê eşkerayîya çapemenîye Verfekê Kongreya Demokratîke ya Şaran (HDK) Cengîz Çîçek, Hemsereka Partîya Herêmê Demokratîke (BDP) Çîgdem Kiliçgun Uçar, Hemsereka Partîya Têduştî û Demokrasîyî yê Şaran  (DEM Partî) Tulay Hatimogullari û Hemserekê MED TUHAD-FEDî Kerem Canpolat û girseyê şarî zî mîyan de bi sloganan heta merkezê bajarî rayîr ra şîyî. Rayîr ra şîyayîş de sloganê "Bijî berxwedana zindanan", "Bijî berxwedana Îmralî" û "Rayîrê xelasî yo, rayîrê şaran o" ameyî berzkerdiş û welatijê derûdorê zî paştdayîş dayî. Rayîr ra şîyayîşê ke kuçe de bi çepik û sloganan ameyî pêşwazîkerdiş, dima ra ver bi awanîya bajarî ya DEM Partî ra kewtî rayîr. Bi seyan kesê ke uca de kom bîyî sloganê "Bijî Serok Apo" berz kerdî, amancê rayîr ra şîyayîşî şarî rê qalî kerdî.

 

'Azadîya fîzîkî ya Birêz Ocalanî problemê ma pêrûne yo'

 

Verfekê HDKyî Cengîz Çîçekî qisey kerd û vat, “Problemê kurdî, problemê statuyî yo. Berpirsiyarîyê ma yo ke ma azadîya fîzîkî ya Birêz Ocalanî misoger bikerê. No tercîhê ma nîyo, wezîfeyê ma yo. Serewedaritiş ma ard na roje. Ganî ma nê ruhî misoger bikerê. Eke şar wayîrê azadîya xo vejîyo do qetî bireso azadîya xo. Serkewtiş yê kesê ke vejîyayê rayîr rê yo. Ganî ma nê coşî her roje pîl bikerê û heta serkewtişî rayîr ra şêrê. Ma şar ê û ganî her kes semedê azadîya xo çi dest înan ra yeno bikero. Sîstem wazeno ma rojeva ma ra dûr bifîno. Semedê nê zî pêwa qirkerdiş û zextan rojeva ma birêz Ocalan a. Rayîr ra şîyayîşê ma heta ke birêz Ocalan şert û mercê azadî de şarî reyde pêvînayîş bikero do dewam bikero. Roja pêvînayîşî do bibo roja azadîya ma.”