Nazlican Nûjin Yildiz

 

ÎZMÎR - Cinîyê ke taxa Çîmentepe ya Konakî ya Îzmîrî de ciwîyenê dîyar kerdî ê wazenê DEM Partî bikewa weçînayîşan û vatî ke eke tîfaq bikerê zî wa no tîfaq şaran û kurdan bihewêno. 

 

Ver bi weçînayîşê herêmî ra ma mîkrofonê xo dergê cinîyan kerd. Taxa Çîmentepe ya Konakî ya Îzmîrî ke zafaneyê înan tede kurdî ciwîyenê, cinîyan persê ma yê derheqê weçînayîşî de cewab da. Cinîyan dîyar kerd ke ganî Partîya Têduştîye û Demokrasîyî yê Şaran (DEM Partî) Îzmîr de namzetê xo bivejno û vatî ke CHP wextê weçînayîşan de rayan wazeno, dimayê weçînayîşan kurdan xo vîr ra keno. Cinîyan dîyar kerd ke eke tîfaq bêro kerdiş ganî tîfaq de xirabî çinî bo û vatî ke ê wazenê şaredarîyan de kurdan rê raşte bêro akerdiş, kursê kurdî bêrê akerdiş. 

 

Cinîyan derheqê weçînayîşê herêmî de ajansê ma JINNEWSî rê qisey kerd. 

 

Sadîye Arslane da zanayîş ke qîmetê kurdan nîno zanayîş, aştî wazenê, erc, heskerdiş wazenê û wina dewam kerd: “DEM Partî û CHP tîfaq bikerê zî ganî tîfaq de xirabî nêbo. Ganî îxanet çinî bo. Bêhuqûqî û şer çinî bo. Ganî ma bibî dostê yewbînan, deste yewbînan bigîrê. Ganî ma yewbînan rê baş bê.” 

 

'CHP dimayê weçînayîşan kurdan xo vîr ra keno' 

 

Sadîye dîyar kerd ke eke Îzmîr de tîfaqêq bêro kerdiş zî ganî cinî û kurdan bihewêno û wina vat: “Wa vengê ma bieşnawê. Ma nê wazenê. Wa cinîyê kurdî her tim sereberz bê. Ma veng bidê înan, ê ma vîra kenê û wa wina nêbo. CHP wextê weçînayîşî de yeno kurdan ra rayan wazeno, dimayê weçînayîşan çîyêk nêkeno, kurdan xo vîr ra keno. Sere de senî bibo wina dewam keno.” 

 

‘Wa DEM Partî bikewo weçînayîş’ 

 

Asya Dogane zî eşkera kerd ke cinîyê kurdî wazenê Îzmîr de partîya înan bikewo weçînayîş, wazenê kurdî weçînayîşan de bêrê temsîlkerdiş. Asya wina ercnayîş kerd: “Ma wazenê ser bikewê. Ez Îzmîr de wazena partîya mi bikewa weçînayîş. Ma bikewê weçînayîş do kurdî rayê xo bidê xo. La wina nêbo do bidê CHPyî. Wina bibo zî ma wazenê şaredarî kursê ziwanî akera.”

 

 'Kurdî wazenê azad têbigêrê’ 

 

Cinîya bi nameyê Zubeyde Akinci zî wina vat: “Ma heqanê xo wazenê. Kurdî cayê ke ciwîyenê de wazenê azad têbigêrê. Cayo ke kurdî tede ciwîyenê seke cayê bînî bî yeno têgêrayîş. Nêtêduştî est a. DEM Partî namzet bivejno ma do rayanê xo bidê partîya xo. Ma do rayan bidê xo.” 

 

Şukrane Ay zî ard ziwan ke DEM Partî namzet bivejno raya xo do bida DEM Partî û wina peynî kerd: “Ma zerrî eşkena sewbîna çîyêk bivaja? Ziwanê ma tîya de yo. Zerrî ra derbaz beno. Ma kurd ê, zerrîya ma nê çîyî ma ra wazeno, kes nêwazeno. Ma wazenê şaredarî tîya de kursê kurdî akera.”

 

‘Yew kursêk kurdî çin o’ 

 

Wendekare Nazdare Dag zî da zanayîş ke ê wazenê şaredarî seba kurdan raşteyan akera û wina dewam kerd: “Ez sey ciwanêke kurde, semedo ke Tirkîya de pîl bîya mi kurdî xo vîr ra nêkerd. Ez kursê kurdî wazena. Çike ma nêeşkenê ziwanê xo qisey bikerê. Derheqê ziwanê ma de yew kursêk çin o. Heme tirkî yo. Heqê ma zî est ê. Ganî tay taxê kurdan ra biewnê, bala xo bidî nê cayan. Ma wazenê taxa ma pake biba, semedê ciwanan raşteyê kultur, huner û sporî bêrê akerdiş.”