Elfazî Toral

 

STENBOL - Sîyasetmedarê cinî û cinîyê ke paştî dayî çalakîya Nobeta Edaletî dîyar kerdî ke hem hemverê Rayberê PKKyî Abdullah Ocalanî û hem zî hemverê şarê kurdî de tecrîdêk est o û vatî: “Seba ke tecrîd bêro şikitiş çi destê ma ra bêro ma do bikerê. Ma tepîya game nêerzenê û ma nizdîyê serkewtişî yê." 

 

35 aşmî yo xebere Rayberê PKKyî Abdullah Ocalanî ke 25 serrî yo Îmraliyî de binê tecrîdî de yo ra nîna girewtiş. Tecrîd tesîrê xo serê heme tepişeyan de kerdo, rewşa tepişteyê nêweşan her ke şina giran bena, sewbîna tepişteyê cezaya înan qedîyaya bi hawayêkê kêfî înfazê înan yeno veşênayîş, tahlîye yena taloqkerdiş. Komîsyonê Zîndanan ê Komeleya Heqanê Merdiman (ÎHD) yê Stenbolî 23yê Çeleyî de raporê binpaykerdişê heqan ê hîrê aşman weşêna û vat 2023yî de hezar û 596 binpaykerdiş ame ciwîyayîş. 

 

Sîyasetmedar û cinîyê ke paştî dayî Nobeta Edaletî derheqê polîtîkayê tecrîdî de JINNEWSî rê qisey kerdî. 

 

Vera tecrîdî de fek têkoşînî ra vera nêdanê 

 

Zekîye Ayike ya ke paştî dana Nobeta Edaletî dîyar kerd ke îqtîdar tecrîdî hem serê Rayberê PKKyî û hem zî serê şarê kurdî de pê ano û wina vat: “35 aşmî yo xebere Birêz Ocalan ra nîna girewtiş. Na nuqta de ma heme hîsên ê. Ganî ma tecrîdî peynî bikerê, azadîya fîzîkî pê bêra. Heta ke no bêhuqûqî peynî nêbo do têkoşîn ra zî tepîya game nêro eştiş. Seba ke tecrîd bêro şikitiş çi destê ma ra bêro ma do bikerê. Gelo bi çi amancî tecrîd pê yeno. Ganî komel baş fam bikero. Huqûq de cayê tecrîdî çin o. Ganî ma na babete de veng berz bikerê.”

 

Binpaykerdişê heqan peynî nêbeno! 

 

Zekîye da zanayîş ke ganî heme komel paştîdayîş bido têkoşînê şarê kurdî û wina dewam kerd: “No probleme her kesî yo. Ez venga têkoşînê hempar kena. Zîndanan de çi beno, ma nêzanê. Xeylê binpaykerdişê heqan yenê ciwîyayîş. Tena ma çîyê ke eşnawenê. Zîndanan de bi desan tepişteyê nêweş est ê. Nînê dermankerdiş, tehlîyekerdiş. Tepişteyî yenê qetilkerdiş. Her kes nê caardişan zano.”  

 

Her roje Nobeta Edaletî de ya 

 

Zekîye qiseykerdişê xo yê peyênan de ard ziwan ke paştîdayîş dana Nobeta Edaletî û wina vat: “Vera heme caardişanê dewlete de çalakîya ma dewam kena. Do dewam bikera zî. Ganî ma heme kişta dadîyan de ca bigîrê. Ez merdimê tepişteyêk nîya. La ez bi amancê paştîdayîşî yena tîya. Her roje yena bi dadîyan reyde nobete tepişena. Wa kes nêmiro. Ma mecburê veng bidê vengê înan. Kesê ke no bêhuqûqî rê veng nêkeno ganî wijdanê xo de cipersayîş bikero. Ganî her kes vengê xo berz bikero, gamêke bierzo.”

 

‘Ma nizdîyê serkewtişî yê’ 

 

Hemsereka Sancaktepe Ayşe Çîftçîye zî qiseykerdişê xo de dîyar kerd ke waştişê tepişteyan heqê înan o û wina dewam kerd: “Ma veşênayîşê înfazê embazanê xo şermezar kenê. No raşt nîyo. Ganî edalet bi lezkî bêro ca. No bê ehlaqî yo. Zîndanan ra cenazeyê tepişteyan vejîyenê. Çîyo ke dewlete kena bêhuqûqî yo. Ganî şar reaksîyon nîşan bido, şar heme kişta yewbînan de bo. No waştişê dadîyan û tepişteyan o. Nê prosesî de ganî ma zî wezîfeyê xo bîyarê ca. Ma nizdîyê serkewtişî yê. Ganî ma bi cesaret bê û fek têkoşînî ra vera nêdê. Wa fek sîyasetê lêşin yê serê kurdan ra biverdê. Şarê kurdî êdî tepîya game nêerzeno.”