Dîlan Babat - Melek Avci

 

ANQARA - Dadî û Dadîyê Aştîye yê ke merdimê înan grevê vêşanîye de bî, Anqara de bî û venga caardişê edaletî kerdî û vatî: "Eke vengê zîndanan nêro eşnawitiş do sey dadî bikewê grevê vêşanîye."

 

Dadî û Dadîyê Aştîye ke merdimanê înan grevê vêşanîye de bîyî, vizêr ameyî Anqara. Dadîyê ke xeylêk cayê Tirkîya û Kurdistanî Nobetê Edaletî dewam kenê, ewil şî Merkezê Pêroyî yê Partîya Têduştî û Demokrasîyî yê Şaran (DEM Partî). Cinîyê ke tewrê Koma Parlamentoyî ya Cinîyan ê DEM Partîye bîyî, semedo ke Wezaretê Edaletî waştişê zîyaretî qebûl nêkerd, dimayê kombîyayîşê kome verê Berê Çapemenîye yê Meclîsî eşkerayîye dayî.

 

Dadîyê ke Anqara de bî, ajansê ma JINNEWSî rê qisey kerdî û bale antî serê amancê zîyaretê xo.

 

'Semedê caardişê edaletî ameyî Anqara'

 

Dadîya Aştîye Nazîme Yurek ya Amed ra ameye, dîyar kerd ke semedê edaletî ameyê Anqara û wina vat: "Dadî semedê tutanê xo û serekî grev de yê. 25 serrî yo tecrîd est o û pêvînayîş çin o. Ganî no tecrîd bêro şikinayîş. Heta tecrîdê serê serekî nêro wedaritiş do tecrîdê zîndanan zî dewam bikero. Verê awe, şekir û sole dayîne. Nika tepişteyî grev de yê kerdê hucreyê yew kesî û çîyêk nêdanê. Canê dadîyan veşeno. No ezîyet o. Ez venga pêro sazgehê xerîbî kena, wezaretê edaletî kena. Semedê tecrîdî bikewê tevger û tecrîdî peynî bikerê. Gelo do no îşkence heta key dewam bikero."

 

‘Çîyê şima Efrîn û Rojawanî de est o'

 

Nazîme da zanayîş ke ganî no îşkence peynî bibo û wina vat: "Ma aştî û têduştî wazenê. Mal û warê ma talan kenê. Leşkeran şirawenê operasyonan û dinyaya xo bedelnayî. Ciwanê kurdî hemverê zulmî şînê koyan. No zilm qîm nêkeno. Ma vanê êdî bes o. Çi wazenê ma ra. Gelo çiyê înan Efrînî est o şinê uca bombebaran kenê? Êdî bes o. Wa ne dadîyê gerîla, ne zî yê leşkeran bibermê.”

 

‘Ma do zî bikewê grevan’

 

Cevahîr Temel ke Edene ra ameya zî wina vat: "Ma aştîye wazenê. La Tirkîya eksê ci kenê. Tepişteyî grev de yê. Heta tecrîdê serê Abdullah Ocalanî dewam bikero, ma do zî binê tecrîdî de bê. Cinî, tutî her kes. Ma nika nobeta edaletî de yê. Hewce bikero ma zî bikewê grev. Ma pey edaletî de yê. Ganî no cidî bêro girewtiş. Ganî waştişê ma bêrê ca. Wa zindanan ra cenaze nêvejîyê. Wa gonîya tutanê ma nêrijîyo."