9ê Teşrîna Verêne ya 1998î de hemverê Rayberê PKKyî Abdullah Ocalanî de komployê mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdê giran de yeno tepiştiş. 35 aşmî yo tu xeberêke ci ra nîna girewtiş. Vera tecrîdî û seba azadîya Abdullah Ocalanî 10ê Teşrîna Verêne de 74 merkezê dinya de bi sloganê ‘Abdullah Ocalan rê azadî, problemê kurdî rê çareserîya sîyasî’ kampanya ameye destpêkerdiş.

 

27ê Teşrîna Peyêne zî zîndananê Kurdistan û Tirkîya de grevê vêşanîye bi eynî waştişî dîya destpêkerdiş. Bi sloganê ‘Semedê edaletî ma tecrîdî bişiknê, semedê aştîye ma bibê vengê zîndanan’ Wan, Amed, Mêrdîn, Mêrsîn, Edene, Stenbol û Îzmîr de zî bi eynî waştişî çalakîya "Nobeda Edaletî" dîya destpêkerdiş. 

 

Çarçeweya eynî kampanyaye de bi serkêşîya Partîya Herêmê Demorkatîke (DBP) do 1ê Sibate de ‘Rayîr ra şîyayîşê gird ê azadîye' Wan û Qers de dest pêbikero. Wan de 37, Qers de zî 38 kes do tewrê rayîr ra şîyayîşî bibê. Rayîr ra şîyayîş di hetan de pê yeno. Wan de do 1ê Sibate de verê awanîya Rêxistina Partîya Têduştîye û Demokrasîyî yê Şaran (DEM Partî) ya Rayîrê Armûşî eşkerayîyêke bêra dayîş û do startê rayîr ra şîyayîşî bêro dayîş. Sewbîna dimayê eşkerayîye girse do Parkê Musa Anterî de arê bibo û heta AVM yê Wanî rayîr ra şêro. 

 

Hetkara Hemsereka DEM Partî ya Wanî Herdem Acare semedê rayîr ra şîyayîşî veng kerd.

 

‘Tecrît heme raşteyan de vila bîyo’ 

 

Herdeme dîyar kerd ke 25 serrî yo tecrîdêk mutleq serê Abdullah Ocalanî de yeno rayîr ra berdiş û da zanayîş ke 3 serrê peyênan de tecrît hîna giran bîyo. Herdeme da zanayîş ke tecrîd tena serê Abdullah Ocalanî de nîno rayîr ra berdiş û vat ke tecrîd heme raşteyanê cuye de vila bîyo. Herdeme ard ziwan ke tecrîd bi taybetî serê cinî û tutan de hîna zêde bîyo û wina vat: “Coka ra ewro tecrîd serê pêroyê şarê kurdî de yeno rayîr ra berdiş. Hem semedê tecrîdî bişiknê, hem semedê azadîya fîzîkî ya Birêz Ocalanî û hem zî semedê peynîkerdişê çalakîya grevê vêşanîye ma dest bi rayîr ra şîyayîşî kenê.” 

 

Di baksan ra rayîr ra şîyayîş pê yeno 

 

Herdeme dîyar kerd ke baskê Wan û Qersî de do rayîr ra şîyayîş pê bêro û vat ke do siba saet 10.00î de Wan de bi eşkerayîyêke startê rayîr ra şîyayîşî bidê. Herdeme wina dewam kerd: “Saet 11.00î de Parkê Musa Anterî de do girse bêro pêser û heta AVM yê Wanî rayîr ra şêro. Do girse dima ra derbazê Payîz Ava û Elbakî bibo û şarî silam bikero. Girse tîya ra zî do derbazê Colemêrgî bibo. Baskê Wanî de nizdîyê 15 wekîl do ca bigîrê. Baskê Wan û Qersî do 13yê sibate de Amed de bireso yewbînan. Coka ra ma venga heme şarê xo kenê ke bêrê ma heyetê rayîr ra şîyayîşî bi girseyî bişirawê û paştîdayîş bidê nê rayîr ra şîyayîşî. Ganî no tecrîd bi lezkî peynî bibo.”

 

Semedê rayîr ra şîyayîşî vengdayîş 

 

Herdeme da zanayîş ke tecrîd tena Îmraliyî de nîno rayîr ra berdiş û vat ke tecrîd serê pêroyê şaran de est o. Herdeme peynîya qiseykerdişê xo de venga tewrbîyayîşê rayîr ra şîyayîşî kerd û wina vat: “Ganî her kes tecrîdî rê vajo êdî bes o. Bi taybetî ganî grevê vêşanîye yê zîndanan peynî bibo. Eke tecrît peynî nêbo do tepişteyê grevî de dest bi rojeyê mergî bikerê. Coka ra ma venga wayîrvejîyayîşê kenê. Ganî ma bibê veng.”