Oznur Deger

 

MELETÎ – Merkezê ci Mereş de 6ê Sibate de di erdlerzî pê ameyî û tesîr serê xeylê bajaran de kerd.  Nê bajaran ra yew zî Meletî bî. 24ê Çeleyê 2020î de Xarpêt de erdlerz virazîyabi û tesîrêk gird serê Meletîye de zî kerdbî. Ame zanayîş ke awanîyê ke nê erdlerzî de xisar dîbî nêameyî viraştiş.

 

6ê Sibata 2023yî de merkeze ci Mereş de di erdlerzî virazîyayî û 11 bajaran ser de tesîr viraşt. Erdlerz de goreyê dayeyê fermî 50 hezar û 783 kesî dinyaya xo bedelnayî. Yew bajaro ke xesarêk gird dî Meletî bî.

 

35 hezar awanîyî bi giranî xesar dî

 

Goreyê dayeyê fermî Meletî de hezar û 237 kesî dinyaya xo bedelnayî, 6 hezar û 44 kes birîndar bî. Sewbîna bi hezaran awanî rijîyayî û 35 hezar û 891 awanî zî xesarê giran dîyî. Goreyê dayeyanê fermî hûmara awanîyê rijênaye, ganî bi lezkî bêrê rijnayîş û bi xesarin 45 hezar û 668 a.

 

Erdlerzê 6ê Sibate de zafaneyê nê awanîyan rijîyayî

 

Yeno texmînkerdiş ke hûmara awanîyê bi xesarin dayeyê fermîye ra hîna zêde yo. Ame zanayîş ke awanîyê ke erdlerzê 24ê Çeleyê 2020î yê Xarpêtî ke girdîya ci 6.8 bî, Meletî û xeylê bajaranê bînan de tesîr viraştbî, zirar dîyî nêameyî viraştiş. Seba xeylê awanîyan qerarê kêm xesarin ame dayîş û tadilat nêame kerdiş. Erdlerzê 6ê Sibate de zafaneyê nê awanîyan rijîya û tay zî xesarê giran dîyî.

 

Eynî awanîyan rê dimayê wirdî erdlerzan tespîtê xesarê ci eynî yo

 

Dimayê erdlerzê Xarpêtî seba awanîya Halis Yedî Daghanî ya 4 qatin ke taxa Haci Abdî ya qezaya Batalgazî ya Meletî de bî xesarê orte ame dayîş. Awanî dimayê erdlerzî rewşêk ke merdim tede bimano ke nîyê û hema zî nêameyê rijnayîş. Tay hemwelatijê awanîyan bi paştîdayîşê kîra ya 5 hezar TL sewbîna awanîyan de ronişenê û tay zî konteyniran de ciwîyenê. Tay zî dewan de ca bîyî.