Elfazî Toral

 

STENBOL - Cinîyê ke bi çalakîkerê Nobeta Edaletî reyde kewtê paştîdayîş, vatî: “Ma no têkoşînê ercaye de waştişê xo yê aştî, azadî, têduştî û edaletî de bi israr ê. Heta serekatîyê ma û tepişteyî azad nêbê ma zî azad nêbenê. Ma kişta dadîyan de yê, her tim ma do bêrê nobete bitepişnê. Ma înan qet tena nêverdenê.”

 

Rayberê PKKyî Abdullah Ocalan ko 25 serrî yo Îmraliyî de binê tecrîdî de yeno tepiştiş ra no 35 aşmî yo xebere nîna girewtiş. Bi amancê azadîya fîzîkî ya Abdullah Ocalanî, zîndanê Kurdistan û Tirkîya de tepişteyê sîyasî 27ê Teşrîna Peyêne 2023yî de dest bi grevê vêşanîye kerdî. Bi eynî waştişan bajarê Kurdistan û Tirkîya de merdime tepişteyan dest bi Nobetê Edaletî kerdî. Yew cay ke nobete tede ame destpêkerdiş Stenbol bî. 44 rojî yo Stenbol de nobete bi zîyaretê hemwelatijan û eleqeyêk gird ê şarî dewam kena. 

 

Cinîyê ke şîyî zîyaretê çalakîye JINNEWSî rê qisey kerd. 

 

Waştişê dadîyan waştişê tepişteyan o 

 

Nebîhe Aydogane da zanayîş ke îqtîdarê AKP-MHPyî bi polîtîkayê şerê taybet hewl dano şar bipelçiqno û wina vat: “AKP şer de israr keno. Waştişê dadîyê tîya zelal o. Tutanê xo wazenê. Her roje îşkence bi tutanê înan yeno kerdiş. Tutê înan yenê qetilkerdiş û her tewirê binpaykerdişê heqan yeno kerdiş. Waştişê dadîyan no yo ke tutê înan serbest bêrê verdayîş û aştî pê bêra. Nêwazenê tutê kesêk bimiro. Ma zî wazenê waştişê dadîyan bêro ca. Wa kes nêmiro. Wa ne dadîyê kurdî û ne zî dadîyê tirkî nêbermê.”

 

‘Heta peynî waştişê edaletî de bi israr ê’ 

 

Nebîhe dewamê qiseykerdişê xo de ard ziwan ke dadî seba şer û tecrîd peynî bibo, kewtî Nobeta Edaletî û wina dewam kerd: “Dadî deste aştîye derg kenê. Yewine waştişê înan serbestverdayîşê tutanê înan o. Wa dewlete gamêke bierza. Ma her tewir game erzenê. La dewlete şer de bi israr a. Ma nê çîyî qebul nêkenê. Ma zî waştişê aştî, azadî û têduştî de bi israr ê. Ma do heta peynî têkoşîn bikerê.” 

 

Waştişê azadîya fîzîkî kenê 

 

Suat Karataş zî da zanayîş ke ganî azadîya fîzîkî ya Abdullah Ocalanî pê bêro û vat: “Ma ameyî Nobeta Edaletî û paştîdayîş danê embazanê xo. Têkoşînê dadîyan têkoşînê ma yo. Têkoşînêk ercayeye yo. Roniştişê înan ercayeye yo. Ez wazena heme dadî bêrê tîya de ronişê. Ma wayîrê dadîyan vejîyenê. Ma dej ant, wa kes dej nêanco. Nobeta tîya nobeta ma hemeyan a. Ma waştişê azadîya fîzîkî de, waştişê aştî û edaletî de bi israr ê.”

 

‘Serekatîyê ma azad nêbo ma zî azad nêbenê’ 

 

Aktîvîsta Têgêrayîşê Cinîyê Azade (TJA) Vetha Gunaya ke 16ê Çeleyî de ameybî destbendkerdiş û 19ê Çeleyî de serbest ameybî verdayîş wina vat: “Ma seba tepişteyan tîya de yê. Têkoşînêk ma yê hempar est o. Waştişê înan waştişê ma yo. Ma dadî tîya de yê û ma do tîya de bimanê. Heta peynî ma do têkoşînê xo dewam bikerê. Serekatîyê ma û tepişte azad nêbê, ma zî azad nêbenê. Ma kişta dadîyan de yê, ma do her tim bêrê û nobete bigîrê. Heta serekatîyê ma azad nêbo ma zî azad nêbenê. Wa dewleta tirkan baş bizana. Ganî heme komel vera polîtîkayê dewlete de têkoşîn bikero. Wa dadî heme bibê yew. Dest bidê yewbînan. Eke ma asayîşê komelî biwazê, ganî ma seba caardişê nê çîyî gam bierzê. Yan zî do kes keyeyê xo de asan nêciwîyo. Heta aştî û çareserî pê nêrê ma do têkoşînê xo ra gamêk tepîya nêerzê. Ma tîya de yê nêwizenê.”