STENBOL - Rêxistina ESPyî ya Stenbolî ke çalakîya grevê vêşanîye yê hîrê rojan ke semedê paştîdayîşê Nobeta Edaletî dabî destpêkerdiş, peynî kerd. Çalakîya Nobeta Edaletî û grevê vêşanîye dewrê Samsûnî kerdî û do çar bajaran de çalakîya xo dewam bikera. Zuleyha Muldure ya ESPyî da zanayîş ke heta ke tecrîd bêro peynîkerdiş do her ca de çalakîya xo dewam bikerê. 

 

9ê Teşrîna Verêne ya 1998î de hemverê Rayberê PKKyî Abdullah Ocalanî de komployêk mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdêk giran de yeno tepiştiş. 34 aşmî yo ke ci ra tu xeberêke nîna girewtiş. 27ê Teşrîna Peyêne de zî zîndananê Kurdistan û Tirkîya de grevê vêşanîye bi eynî waştişî dîya destpêkerdiş. Bi sloganê ‘Semedê edaletî ma tecrîdî bişikinê, semedê aştîye ma bibê vengê zîndanan’ Wan, Amed, Mêrdîn, Mêrsîn, Edene, Stenbol û Îzmîrî de zî bi eynî taleban çalakîya "Nobeda Edaletî" dîya destpêkerdiş. Partîya Sosyalîste ya Bindestan (ESP) ya Stenbolî û Federasyonê Komeleya Ciwananê Sosyalîst (SGDF) semedê paştîdayîşê tepişteyan reyde 23yê Çeleyî de awanîya DEM Partî ya Sancaktepeyî de startê çalakîya grevê vêşanîye yê hîrê rojan da. 

 

Do çar bajarê bînan de zî dewam bikero 

 

Endamê ESPyî û SGDFyî ke hîrê rojan çalakîya xo dewam kerdî, vizêr çalakîya xo bi dadîyê Nobeta Edaletî reyde dewrê Rêxistina Merkezê Edene kerdî. Dima ra zî do Îzmîr, Samsur û Dêrsîm de sey rêxistina ESPyî Nobeta Edalet û grevê vêşanîye bêro rayîr ra berdiş. Endama ESPyî Zuleyha Muldure derheqê çalakî û waştişanê xo de ajansê ma rê qisey kerdî. 

 

Amancê înan no yo ke bibê vengê tepişteyan 

 

Zuleyhaye eşkera kerd ke amacê înan no yo ke bibê vengê tepişteyanê ke 61 rojî yo çalakîya grevê vêşanîye dewam kenê û wina vat: “Amancê ma no yo ke ma bi çalakîya xo veng berz bikerê û bi dezgeh, çapemenî û komelî reyde nê vengî bidê eşnawitiş. Amancê ma no yo ke na babete bikewa rojeva înan. Çalakîya tepişteyan di aşmî yo dewam kena. Vengê teberî yê tepişteyan dadîyê Nobeta Edaletî yo. Ma zî bi çalakîya xo ya hîrê rojan rayaumûmîye de veng da.” 

 

‘Heta tecrîd bişikîyo do têkoşînê ma dewam bikero

 

Zuleyhaye ard ziwan ke waştişê xo bi grevê vêşanîye anî ziwan û wina vat: “Ma taleb kerd de tecrîdê serê tepişteyan bêro wedaritiş, qedexeyê pêvînayîşî bêro wedaritiş, cigêrayîşê zitî, tecrîd bêro wedaritiş. Ma waştişanê xo ard ziwan. Çalakîya ma do dewam bikera. Heta tecrîd nêro peynîkerdiş do talebê ma rojeve de bimanê. Ma çalakîya xo dewrê rêxistina Edene kerd. Ê zî do bi Nobeta Edaletî waştişan bîyarê ziwan. Dima ra zî do Samsun de eşkerayî bêra dayîş. Dima ra do ê zî dewrê Îzmîrî bikerê. Bi no hawa ma do waştişanê xo rojeve de biverdê. Ma venga hîsgerîye bi Rayaumûmîye kenê.”

 

‘Tecrîd bi tepiştişê Abdullah Ocalanî dest pêkerd’ 

 

Zuleyha da zanayîş ke ganî tecrîdê zîndanan bêro peynîkerdiş û vat: “Caardişê kêfî serê tepişteyan de est o. Heme raşteyê cuya înan yeno sînorkerdiş û astengkerdiş. Tecrîd bi binpaykerdişê heqan dewam keno. Eke tecrîd bêro peynîkerdiş do destkewtişêk gird bibo seba merdimayî. Tecrîd bi tepiştişê Abdullah Ocalanî dest pêkerd. Ganî ma tecrîdî hîna zêde bîyarê rojeve. Tecrîd tena problemê kurdî û yê Abdullah Ocalanî nîyo. Tecrîd problemê heme tepişteyanê sosyalîst û şorişgêran o. Ganî ma nê tecrîdî her tim rojeva rayaumûmîye de biverdê.” 

 

‘Ma do çalakîye her ca de dewam bikerê’ 

 

Zuleyha qiseykerdişê xo yê peyênan de mesajê do çalakîyê xo dewam bikerê da û wina peynî kerd: “Ma do bi vatiş, çalakî û pankartê xo raşteyan de bê. Ma bi çalakîya hîrê rojan ê grevê vêşanîye sînorkerde nêmanenê. No têkoşînê ma yê polîtîkî hewêneno. Ma do çalakîya xo her ca de dewam bikerê.”