Oznur Deger

 

MÊRDÎN - Dadîya Aştîye Sultan Acibucaye qala rojêke ya Nobeda Edaletî kerd û wina vat: “Mi çimanê xo bi na dewaye akerd. Ez do bi na dewaye zî bigêra. Ma heme dadî yê. Her serê sibayî ma bi coş û moralêk gird yenê tîya. Ganî ma dest bidê yewbînan û nobete biresnê azadî û serkewtişî.” 

 

Kurdistan û Tirkîya de 27ê teşrîna peyêne ya 2023yî ra nata 100 ra zêde zîndanan de bi sloganê ‘Abdullah Ocalanî rê azadî problemê kurdî rê çareserî’ grevê vêşanîye dewam keno û heto bîn de zî merdimê tepişteyan bi eynî sloganî Nobeta Edaletî dayî destpêkerdiş. Amed, Wan, Edene, Mêrsîn, Stenbol, Îzmîr û Mêrdînî de Nobeta Edaletî dîya destpêkerdiş. Sere de merdimê tepişteyan û dadîyê Aştîye heme komel wayîrê nobete vejîyeno û seba azadîya fîzîkî ya Rayberê PKKyî Abdullah Ocalanî waştişê xo anê ziwan. 

 

Yew çalakîkera Nobeta Adaletî Sultan Acibucaye (74), cuya têkoşînê xo û rojêke Nobeta Edaletî vat. 

 

32 serrî verê cû kewt grevê vêşanîye 

 

Sultane 25 serrî yo endama aktîf a û dîyar kena ke dimayê 30 serrî xo nas kerda. Sultane da zanayîş ke dewlete wina nas kerda û wina dewam kerd: “Bi serran o çalakî kam ca de bibo ez uca de ya. Kam ca de grev bibo ez uca de ya. Ez 92yî de yewine rey Mêrdîn de tewrê greve vêşanîye bîya. Kênaya mi yew serrî û nîme bî. Mi kênaya xo da cîranan û hîri rojan tewrê grevê vêşanîye bîya. Ma 40 ten kewtî grevê vêşanîye. Ma salonêke de kewtî grev la dormeyê salone pirrî polîsî bî. Yew salone ra bivejîyayêne ameyêne destbendkerdiş. Destur nêdîyayêne ma çalakî pê bîyarê. Ma zî berê salona xo girewt. Ma nêeşkayêne tu lazimîyêk xo pê bîyarê. Wexto ke hêriş kerdî ma zî bi kursîyan pawitişê xo yê ceweherî kerd. Heyet Anqaraye ra ame û netîceyê muzakereyan de grev serkewte peynî bî.” 

 

‘Ma to xo rê, kênaya to zî fermandar rê benê’ 

 

Sultane dîyar kerd ke serra 1992yî de erzenê keyeyê aye ser de û wina vat: “Mêrdeyê mi berdî. Ewil keye de îşkence pê kerdî, berdî baxçe reyna îşkence pê kerdî. Dima ra berdî. Keyeyê ma serûbin kerdî. Heta dermanan her çî berdî. Roja bîn reyna eştî keye ser de. Na reye mi berdî. Keyeyê ma reyna serûbin kerdî. Tay pereyê ma keye de estbî, înan zî keye ra berdî. Vatî bibe îtîrafkar. Rayîr de vatî ‘ma do to xo rê, kênaya to zî fermandarî rê berê.’ Ez 16 rojan nezaret de menda. Îşkene bi mi kerdî. Vatî qisey bikere. Îşkence nêmend kerdî. Vengê embazê mi odeya bîn ra ameyêne. Wexto ke veng ameyêne mi ez zaf tesîr bîyêne. Roje de 3-4 reyan îşkence kerdêne. Dimayê îşkenceyî ez ameya dermankerdiş.” 

 

‘Serê îxbarêk de keyeyê mi heme ame destbendkerdiş’ 

 

Sultane qiseykerdişê xo wina dewam kerd: “Serê îxbarêk zûre de heme ferdê keyeyê mi ameyî destbendkerdiş. Lajê mi zî ame destbendkerdiş. Înan dabî ceyran. Her tewirê îşkenceyî bi înan kerdî. Hîri rojan binê îşkenceyî de mend, la seke hîrê aşman tepişte bimano bî. Reyna Îzmîr de semedo ke ez tewrê 8ê Adare bîya mi destbend kerdî. 7 serrî ceza dayî mi. Dima ra ceza xerepnayî.”

 

‘Na çalakîyêke pîroz a’ 

 

Sultane bale ant serê muhîmîya Nobedê Edaletî û wina vat: “Ma seba azadîya tepişte û serekatîye grev de yê. Ma azadîya serekatîyê xo wazenê. No 24 serrî yo Îmraliyî de tepişte yo û hîri serrî yo ci ra tu xeberêke nîna girewtiş. Ganî bi lezkî serbest bêro verdayîş. Na çalakîyêk pîroz a. Ma azadîya tepişteyan wazenê. Ma bi heme zerrîya xo kişta çalakîkeran de yê. Heta serekatî azad nêbo do na çalakî dewam bikera. Ma do her roje bêrê tîya ronişê. Ma wazenê şer peynî bibo û aştî bêra. Wa teda û zilm peynî bibê. Ma vîşêrê ziwanê xo ziwanêk bîn nêwazenê. Ma wazenê bi ziwanê xo perwerde bivînê. Ma seba azadîye Nobeta Edaletî de yê. Hema ke zîndanan ra cenaze nêvejîyaya ganî goş bidîyo nobete.”

 

‘Mi çimanê xo bi na dewa akerd’ 

 

Sultane qiseykerdişê xo yê peyênan de vat: “Mi çimanê xo bi na dewa akerd û ez do bi na dewa bigêra. Ma heme dadî yê. Her serê sibayî ma bi coş û moralêk gird yenê tîya. Saet 10.00î de ma tîya de yê. Ma heme dadî yê. Embazê camêrdî zî paştîdayîş danî. Tewrê çalakîya ma benê. Roja ma weş derbaz bena. Ma her çî pîya kenê. Ma nîmroje werdê xo pîya wenê. Ma çayê xo pîya şimnenê. Xeylê kesî yenê zîyaretê ma. Şar paştîdayîş dano ma. Ma deyîran vanê û sohbet kenê. Ganî ma dest bidê yewbînan û nobete biresnê azadî û serkewtişî.”